شركات كروت الشاشة ، إيه الفرق بين الموديلات الكتير !
سؤال بيتكرر كتير ، و مفيش فيه إجابة أو موضوع شامل
وقتها حسيت إني لازم أتدخل 😃
النهاردة هنتكلم بشكل واضح و مفصل عن
الفرق بين شركات كروت الشاشة و موديلاتها /
كلامنا عن الشركات المصنعة لكروت NVIDIA تحديداً
و بعض الشركات إللى هنذكرها بتصنع AMD برضو
--------
خلينا ف البداية نعرف حاجة
كل شركة من صناع الكروت .. ليها فئات لمختلف الأنواع
و الكلام هنا عن فئات تصنيع الكروت
مش فئات الموديلات نفسها ك أجيال
1 - فئة منخفضة
2 - فئة متوسطة .. إقتصادية
3 - فئة عُليا .. هاى إيند
و لازم نحدد إحنا بنتكلم ف أي فئة عشان نعرف نحكم عليها كويس
عشان كدا مقياس حكمنا ف الفرق بين موديلين
لازم يبقى شرط أساسي فيه إن الكروت تبقى من نفس الفئة
مينفعش كارت فئة منخفضة شركة (س)
و نقارنه بكارت فئة عالية من الشركة (ص)
دا غلط جداً و مش هيدينا مقارنة سليمة
------
شركات تصنيع الكروت حالياً كتير عن الأول
خلينا نعرفهم كـ أشهر أسماء /
1 - إسوس .. Asus
2 - إم إس أي .. MSI
3 - جيجا بايت .. GigaByte
4 - إي فيجا .. Evga / >> تصنيع كروت NVIDIA فقط
5 - زوتاك .. Zotac / >> تصنيع كروت NVIDIA فقط
6 - جالاكس .. Galax / >> تصنيع كروت NVIDIA فقط
7 - باليت ..Palit / >> تصنيع كروت NVIDIA فقط
8 - سافاير .. Sapphire / >> تصنيع كروت AMD فقط
و فيه شركات تاني بالرغم إنها متواجدة من فترة كبيرة
لكنهم لسة متشهروش أوي ف السوق المصرى
زي / Gainward - Manli - Afox - Powercolor - Colorful
و التعامل معاهم عادى جداً ، بس يكون كأخر إختيار مش أولوية
-----
سؤال أي شركة هى الأفضل ، دا مش صح !
و مفيش إجابة موحدة عليه ، مينفعش نقول الماركة دي الأفضل دايماً
لإن كل الشركات بتحاول تضيف مميزات
مش موجودة فى الكروت التانية من نفس الفئة و التنافس شديد
فـ التقييم هيبقى لكل موديل لوحده ، مش لـ الماركة كـ كل
وارد ف الفئة الإقتصادية مثلاً تكون جيجا بايت أفضل من إسوس
لكن ف الفئة العالية يكون التفوق لـ إسوس ، و هكذا
----
هرد ع السؤال دا لإنك معجبكش الإجابة و عاوز تفضيل فى المطلق
شايفك ياللي هناك 😃
ف وجهة نظري الشخصية ، بشكل عام
أولاً / بعتبر الموضوع ثقة و راحة نفسية
ف المقام الاول ، براند عارفه و جربت منتجات شركته و بتثق فيه
و حابب تشتريه دايماً كل ما تحدث
ثانيا / زى ما وضحت فوق ، لازم مقارنة إمكانيات كل فئة من الشركات
لنفترض أنا عاوز كارت إقتصادي ، و بحب جيجا بايت جداً
و لقيت نظيره الأسوس بنفس السعر و أعلى ف الإمكانيات
هل هفضل حبي لـ جيجا بايت على حساب الإستفادة العملية ؟
المنطق يقول لأ
ثالثا / أنا بحاول أجيب جهازي كله ماركة واحدة ، يعني لو البوردة إسوس
يبقى الكارت إسوس و هكذا ، بيبقى توافق كويس و جهازك براند موحد
دا مش شرط طبعاً لو لقيت نفس الفئة فى براند تاني أكتر قوة
بس بتبقى دي أولوياتي شخصياً لو كله زي بعضه فى الإمكانيات
---------
توجهي الأول من حوالى 5 سنين كان كروت ( جيجا بايت - GigaByte )
بعدها كان كروت ( إسوس - Asus )
بعدها كان ( إي فيجا - Evga )
و من سنة ولغاية وقت قريب كان ( إم إس أي - MSI )
و جربت أغلب البراندات المعروفة و المجهولة من الكروت
بمختلف الموديلات و الفئات
-------------
التفضيل لازم يكون لـ فئات محددة مش لـ براند كامل
الـ 7 شركات إللى كاتبهم فوق ، دا ترتيبهم ف وجهة نظري كـ براندات
و وارد يتغير كل فترة عادي جداً حسب التطور
1 - إسوس .. Asus
2 - إم إس أي .. MSI
3 - جيجا بايت .. GigaByte
دول الصفوة فى السوق المصري ، و خليهم أولوياتك ف الإختيار
لإنهم من أقدم الشركات الموجودة و محققين نجاحات كبيرة
4 - إي فيجا .. Evga
بعض فئاتها تتفوق ع شركات من الصفوة ، براند مظلوم ف مصر
5 - زوتاك .. Zotac
6 - جالاكس .. Galax
يعيبهم الإهتمام بالفئات العالية فقط
و إنهم مركزين على تخفيض السعر و بس فى باقي الفئات
لكنهم متواجدين دايماً ف الفئة المتوسطة و المنخفضة
و بينافسوا ف الفئات العالية و بيتفوقوا على بعض الشركات
7 - باليت .. Palit
براند جديد نسبياً فى السوق ، لكنه بينافس بـ سعر و خامات معقولة
8 - سافاير .. Sapphire
ملك الكروت الـ AMD بالتخصص و بدون منافس حتى الأن
----------
خلينا نعرف إحنا بندور على إيه فى الكارت عشان نعرف نختار صح ؟
بتدور على كسر سرعة و مهووس بـ كل فريم هيزيد !
و لا بتدور على كارت أدائه مستقر و يعيش معاك فترة أطول ؟
و لا عاوز كارت بينور و شكله حلو مش أكتر ؟
و لا عاوز كل دا ؟ و لامحتاج إيه بالظبط ؟
الخلاصه عن تجربة لـ كتير جداً من الكروت
رقم واحد إللي تدور عليه دائماً و أبداً فى نظري
هو التبريد القوي ، و بعده الماتريال
أه هنحتاج التردد و الكسر و الـ RGB إللي بتنور و نقلب الجهاز فرح 😃
لكن يبقى التبريد و الماتريال المحترم هما الشئ الأساسي الأهم
خصوصا إن التردد و كسر السرعة فرقهم مش خرافى فى الأداء
الفرق طفيف و مش ضخم كتأثير
--------
كـ مثال /
كارت تردده هو الأعلى فى الفئة ، لكنه بدون تبريد جيد و حرارته بتوصل 90
و كارت تردده أقل ، و لكنه بتبريد محترم و حرارته أخرها 75
الأداء هيرجح كفة التاني و هيقدم أداء أفضل طبعاً
لإن الحرارة مؤثر أساسي ع الأداء و ع العمر الإفتراضي
و طبعاً جودة الخامات نفسها بتأثر ف الاداء
أنا شفت كروت البلاستيك بتاعها ردئ جداً ، ما بالك بـ مكوناتها الداخلية
فيه كروت تحس إنها ممكن يصنعوها بدون علبة قدام شوية 😃
من كتر ما عاوزين يوفروا ف التكاليف
و للأسف الموضوع دا أصبح يتشاف فى كروت غالية كمان
------
و كـ مثال ف النقطة دي ، فى كاميرات 16 ميجا بموديلات كتير
لكن مش كلها نفس الجودة ، مع إن كلها نفس الإمكانيات كأرقام
غير ان ف كاميرات 12 ميجا نوع تاني ممكن تتفوق عليها كمان !
و اللعبة هنا ، لعبة ماتريال مش مجرد أرقام و زيادات
ع خامة سيئة و توافق ضايع
------
خلينا نوضح كل كارت من كل فئة و الموازي ليه
للتسهيل ف الإختيار و معرفة الفرق
دا توضيح تقريبي للفئات المتوازية مش لـ الأفضل /
1 - فئات الهاي إيند ، الجيمنج
و دي فئات بيبقى مكسور سرعتها مصنعياً و تقدر تكسره تاني
و مزودة بتبريد إحترافي ، غالباً 3 مراوح ، أو مروحتين كبار
وكمان فيها إضائة RGB أو LED
حجمها بيبقى كبير ، و إستهلاكها للكهرباء هو الأعلى
كمثال /
Asus Strix / Gigabyte G1 Gaming
Msi Trio & Gaming X
Aorus Extreme / Evga FTW
Zotac Extreme / Galax HOF
و فيه منهم بعض الإصدارات بتبريد مائي معدل ، و فيه إصدارات خاصة
لكن دي هي أغلب الفئات الأساسية إللي ف السوق
----------
2 - فئات إقتصادية ، متوسطة
و دي فئات بيبقى متاحلك تعملها أوفر كلوك
و بتجيلك ستاندرد مش مكسور سرعتها ف الأغلب
تبريدها بيبقى عادي ، مروحتين فى الغالب ، مفيهاش إضائة
إستهلاكها للكهرباء طبيعي ، حجمها متوسط
كمثال /
Asus Dual / Gigabyte WindForce / Msi Ventus & Mech
Evga Sc / Zotac Amp / Galax Exoc
-------
3 - فئات منخفضة
كروت الديسكتوب و الأجهزة البسيطة
فئة مينفعش تعملها أوفر كلوك و بتجيلك ستاندرد مش مكسور سرعتها
تبريدها بيبقى مروحة واحدة ، و أوقات بيبقى مشتت صامت بدون مروحة
إستهلاكها للكهرباء هو الأقل ، و غالباً مش بتحتاج كابل باور
إسمها الكروت الميني أو اللو بروفايل ، و حجمها صغير
و فيه بعض الشركات مؤخراً عملت إمكانية كسر سرعة
لـ الكروت المينى عشان تتميز بالنقطة دي
كمثال /
Asus Phoenix Mini / GigaByte Mini / Msi Aero Mini
Evga Mini / Zotac Mini / Galax Mini
-------------
الكروت دي هي الأشهر ف كل الفئات و الأكثر إنتشاراً
ممكن تلاقى إصدارات تانية مش مكتوبة
زي الإصدارات الخاصة بأي مناسبة
أو الإصدارة الأساسية إللي بتنزل من الشركة نفسها
مش شركات الأفتر ماركت
أو إصدارات مُعدلة من الشركات ، ممكن تتحط بين فئتين كـ ترتيب
يعنى بين العالية و المتوسطة ، و ما شابه ذلك
---------
و بالنسبه لـ الكروت ، مش كل موديل بيبقى متوفر منه كل الفئات
يعنى مثلا مفيش كارت GTX 1080 TI ميني أو بدون مروحة !
نظرا لقوة الكارت و إستهلاكه للكهرباء و إحتياجه لتبريد قوي
و برضو مفيش كارت GT 1030 فئة عالية جيمنج بـ 3 مراوح !
نظراً لضعف الكارت و عدم إحتياجه لتبريد أو تكاليف إحترافية
و هكذا بإختلاف الموديلات و الفئات
----------
الفئات المنخفضة أو المتوسطة مش بالضرورة إنها وحشة
بالعكس حاليا بيطوروها جداً عشان تقرب للفئات العالية
كمثال نسخة الـ TUF الأخيرة من ASUS
إللي فاضلها شوية و تبقى Strix بس خجولة شويتين
كمان نسخ الـ EAGLE من Gigabyte
إللي تعتبر زي الـ GAMING G1
و غيرهم كتير من نسخ متقاربة ف فئاتها
-----
فـ مش لازم دايماً تدفع 300 جنيه مثلاً فيما فوق زيادة ع براند
إلا لو إنت حابب تقفل العداد ف كل شئ و ميزانيتك تسمح
لإنك برضو مش هتخسر لو جيبت الفئة الأقل ، عادي خالص
دايماً حاول تدور ع إحتياجاتك و وفقها حسب ميزانيتك
الفروق بين الفئات المختلفة للكروت مش ضخمة كـ أداء
بس برضو مش قليلة ، و بتفرق ف أوقات كتير
فـ ركز ع النقاط إللي وضحتهالك ف الإختيار عشان تجيب كارت كويس
التبريد و الماتريال ، بعد كدا شكليات
-------
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس 😃
------
 |
تعليقات
إرسال تعليق
سيب أستفسارك وهرد عليك يانجم