البوست دا مش هتلاقي حد يكلمك ف موضوعه
و دا عشان زي ما إنت عارف البروموترز (( المرتزقة ))
ميهمش غير المصلحة و بيتبعوا الأوامر و بياكلوا عيش
و مفيش مراجعين عندنا ف مصر بيهتموا غير بـ القطع إللي بتجيلهم
و طالما مفيش معونة بتتبعت من الشركة و لا المحل ، زيرو محتوى
(( إلا من رحم ربي و الناس المحترمة القليلين جداً ))
تعالى ركز معايا ف الكلمتين دول 🙂
----
الكولر الغالي ، ف معظم الأوقات ، ميستاهلش أبداً قيمته
و كل عروض المحلات عليه ، أو كلام المراجعين
أكل عيش مش خدمة ليك ، نقطة و من أول السطر
و للأسف أغلب الناس بيدفعوا ف كولر مائي شكله حلو
فلوس تكاد تكون أد تمن المعالج بتاعهم أصلاً
زي الكارثة إللي ف الصورة دا
بالمناسبة أنا جربته من فترة بنسخة مختلفة
و كانت التجربة ع معالج Ryzen 5 - 3600X
و ملقيتوش قدم فرق تبريد خرافي
عن كولر زي Hyper 212 مثلاً ، إللي بـ 850 جنيه !!!
إنت متخيل إن ف ناس بتروح تشتري معالج زي R5-3600X مثلاً
بـ 3600 جنيه ، و يجيبوا ليه كولر بـنفس سعره !
دا إسمه غباء سياسي ، و رمي فلوس ف الأرض
-----
عشان تعرف تختار كويس
مفروض النسبة تكون 1 لـ 4
كتحديد لقيمة الكولر و إختياره مقابل سعر المعالج
يعني لو المعالج بـ 2000 جنيه
منشتريش كولر بـ أغلى من 500 جنيه ماكسيمم
لو معالج بـ 10.000 جنيه ، يبقى أخرنا كولر بـ 2500 جنيه
3000 جنيه ، لو معانا فلوس زيادة ، و هكذا
لكن لو النسبة بعدت عن المُعدل الشهابي دا ، يبقى كدا إحنا بنهزر
بالظبط زي العميل إللي بيضحي بـ بوردة أو كارت أعلى
عشان يشتري كيسة RGB أو رامات بتنور !!!
------
كلمة أخيرة ، حافظ ع النسبة الشهابية ف التقييم و التحديد
و متشتريش الكولر الغالي ع المعالج بتاعك ، لإن كدا حرام
و فكك من نفخ المراجعين و تصويرهم و الهري دا كله
المائي زي الهوائي زي البتنجاني ، الفروق لا تُذكر و مش جذرية
طالما المعجون محترم و أصلي ، و الكيسة واسعة و تهويتها كويسة
و الكولر ف إطار المتوسط فيما فوق ، هتاخد أداء محترم
------
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم