هيا بنا .. Valiant Hearts ♥
............................................
اللعبه دى من نوع البلاتفورم ... Platform Games
و النوعيات دى من الجيمز بتبقى الكاميرا فيها تصوير جانبى فقط
و بتحل ألغاز طول ما إنت ماشى ...
من أول الجيمز إلى حضرتها و عملت الموضوع دا لعبة / OddWorld
و دا كانت سنة / 1997 .. و لعبتها وقتها ع وندوز / Millennium
و كانت لعبه ثوريه وقتها .. و حققت نجاحات كبيره جدا
و فضلنا سنين طويلة مفيش إهتمام من المطورين بالنوعيات دى من الألعاب
حتى الجيمرز نفسهم مكنوش بيهتموا بـ النوع دا أو بيتابعوه
لغاية 2010 لما ظهرت لعبة LIMBO
و وقتها لاقت نجاح كبير جدا و كانت فريده من نوعها
فـ الجيمرز و المطورين نفسهم إتفتحت ع النوعيه دى
و دا فتح الباب لـ ماسورة البلاتفورم إلى ضربت 😃
ظهر بعدها عناوين كتيره زى / Unravel - inside - Ori And Blind
و Assassins Creed عملت سلسله إسمها Chronicles
و كمان OddWorld صاحبة البداية .. نزلت جزء جديد من لعبتها الأولى
و البلاتفورم رجع تانى ف مجموعة جيمز متنوعه و متميزه جدا
-------------------------------------------------------------
بس لعبة Valiant Hearts دى تحديدا بعتبرها من أفضل الجيمز البلاتفورم
و شايفها متفوقه ع عناوين كتير ضخمه زى بعض المذكورين فوق
أفضل منهم ف إختلافها .. مش ف ميكانيكس أو حاجه تقنيه
و هوضح وجهة نظرى ...
1- القصه فوق الممتازه .. لمحبين القصص هتعجبكم جدا
بدون حرق / هى لمجموعة جنود من بلاد مختلفه ف الحرب العالميه
و هتلاقى .. قصص حب .. و قصص تضحيه .. و مواقف كتير جدا
و حتى لو الإنجلش بتاعك مش قوى .. هتقدر تفهمها لو ركزت شويه
2- طريقة سرد الأحداث مميزه جدا و كأنك بتتفرج ع فيلم
لقطات خفيفه و متملش و إنت بتتفرج عليها و بتسمعها
و اللعبه فيها لحظات محزنه و دراما و لحظات كوميديه
حتى الجيم بلاى نفسه بتنعكس عليه حاجات كوميديه و مهمات عجيبه
3- الأصوات فوق الممتازه .. و الموسيقى لذيذه ف كل المواقف
أى حاجه فيها صوت ف الجيم دى معموله بـ إحتراف جدا
4- الجرافيك حاجه كدا شبه الكاريكاتير المرسوم
لدرجة إنك مش هتفرق بين الكت سين و هو بيحكى القصه و الجيم بلاى نفسه
كله شبه بعضه .. و هتحس إنك بتلعب جرافيك مش كارتونى .. لكنه كاريكاتيرى
اللعبه واخده تقييمات ممتازه ع مواقع الجيمز
و أنصحك تجربها لو بتحب النوعيات دى
و هى مساحتها 1 جيجا فقط
بس كدا ...
تعليقات
إرسال تعليق
سيب أستفسارك وهرد عليك يانجم