صباح الفل عليكم ♥
قلة الأدب ف السوق المصري كترت جداً
و للأسف إنعدام الضمير هو الراعي الرسمي
بس إحنا معاكم زي ما عودناكم ، و بإذن الله مفيش حد هيتنصب عليه 😍
زي ما إنتوا شايفين الكارثة ف الصورة
باورات 750 و 600 وات ، من براند (( Corsair )) و (( Seasonic )) !
إللي هما حرفياً من أفضل براندات الباورات ف العالم
و دا عشان نضمن إننا نبيعهم بسهولة يا معلم
لكن مع الأسف ، دول ملهمش علاقة لا بـ كورسير و لا بـ سي سونيك
و دا مجرد إستيكر ملزوق لغرض التزوير و النصب مش أكتر 😱
-----
و ف كذا علامة للموضوع دا ، إللي للأسف هيعدي ع ناس كتير مش خبرة
أولاً / مفيش باور من الموديلات دي سلكه بيكون عريان كدا
السلك بيبقى إما النوع الجلد المتلاحم ف بعضه ، أو النوع الشيلد بالكامل
ثانياً / مفيش باور من الموديلات دي بيكون مخارج الـ 24 و الـ 8
لونهم أخضر و مختلفين بـ الشكل دا ، بيبقى كله أسود أو رمادي غامق
ثالثاً / لو كتبت موديل الباور السي سونيك أو الكورسير ، ع جوجل
هتلاقي باور مختلف تماماً عن الصور ، من أول الإستيكر و شكله
لغاية جسم الباور نفسه ، و هتلاقيه موديولار أساساً مش بلت إن 😃
هتلاقوني حاططلكم الصور ف أول كومنت 👇
رابعاً / من شكل الأسلاك بشكل عام ، و بحكم شغلنا ف المجال
فـ الباور دا من الحاجات الكوري و الصيني
إللي من أفضلها Micronics - Rex بـ أنواعهم
و أنا أشك إنه حاجة من الإتنين دول أصلاً
لإن حتى دول ليهم شكل معين ف مراوحهم تحديداً
فـ هو هيكون شئ غريب مجهول الهوية
-----
ف البداية إلتمست حسن الظن ، و قلت يمكن التاجر ميعرفش كالعادة
أغلب التجار مش مهندسين ، فـ بيلبسوا ف حاجات كتير عادي
لكن لما سمعت السعر ، إتأكدت إن التاجر عارف إن ف عك ف الموضوع
الباور الجامد دا ، بيتباع ب 450 جنيه 🤣
فـ كدا إنت أكيد كـ تاجر بتشتري الشغل سواء إنت المستورد أو لأ
معروض قدامك سعر قليل جداً و ميجيش قيمة الباور إطلاقاً
بـ أي منطق صدقت إن ف حاجة كدا بـ السعر دا
فـ الموضوع واضح طبعاً
-------
مش عيب تبيع باور كوري أو صيني ، مش عيب تشتغل ف المتوفر
و توضح نوعه بالكامل بمنتهى الصراحة
حتى لو الباور هيشتغل كويس ، أنا مقلتش إنه شرط يبوظ
لكن المشكلة ف إنتحال صفة سلعة حقيقية و تزييف سلعة أخرى بيها
حضرتك دا إسمه غش ، و حرام ف كل الأديان
من غشنا فـ ليس منا
-----
و أي سلعة و أي تاجر و أي محل ، شاكين فيهم
إعملوا عليه هاشتاج #اقفش_زومبي
و إبعتولنا ع صفحتنا ، و هنتابع الموضوع فوراً
و ربنا يهدي الجميع ♥
تعليقات
إرسال تعليق
سيب أستفسارك وهرد عليك يانجم