كذا حد بعتلي الفيديو دا و طلب رأيي فيه 🙁
دخلت علقت ع الفيديو نفسه ف اليوتيوب
و هكتب رأيي هنا برضو عشان الناس تعرف
بإختصار / الفيديو بيقول إنه إشترى هارد من نوع سيجيت
و باظ منه بعد يوم إستخدام ، و لقى فيه خدوش مع إنه مفروض جديد
فـ هو بيقول إنه أكيد ريفربشد و معاد تصنيعه و تصليحه
و إننا ناخد بالنا من الهاردات الريفربشد أو المتصلحة
إللي مبيبقاش مكتوب و متوضح عليها ، و بتنزل بـ موديل عادي
-------
دا تعليقي و ردي ع الفيديو /
حضرتك كلامك غير صحيح بالمرة
أنا طول الفيديو منتظر إنك تقول عرفت منين إنه ريفربشد
أو إيه العلامات إللي نخلي بالنا منها عند الإختيار
و لقيتك مقلتش أي شئ و الفيديو خلص !
كل كلامك كان إن الهارد ريفربش و خلاص ، بدون سبب !
بدون أي دليل علمي أو منطقي !
و الأساس إللي بنيت عليه الفيديو ، إنه باظ بعد يوم إستخدام !!!
ع كدا أي شئ يبوظ بعد إستخدام بسيط ، يبقى معاد تصنيعه و تصليحه 😃
--------
إللي حصل مع حضرتك ملوش إلا إحتمالين
الإحتمال الأول /
لو هنفترض إن البائع إللي شاري منه موثوق
يبقى الهارد إتخبط مثلاً ف الشحن ، أو دا عيب تصنيع داخلي !
أسباب كتير أوي تخلي أي قطعة إلكترونية تبوظ حتى لو جديدة
نصيبك و قدرك كدا عادي يعني
الإحتمال الثاني و دا الأقرب /
إن حضرتك إشتريت من بائع غير موثوق و غير معتمد !
و بنسبة كبيرة و بناءً ع توضيحك إن الهارد جاي فيه خدوش
يبقى البائع إما نصاب و باعلك هارد بايظ
أو حصل لخبطة ف الطلب بتاعك و جالك شئ مختلف
-----
إنت ماسك هارد سيجيت و واضح إنه موديل معروف
و بتقول إنه ريفربشد ، رغم إنه مش متوضح عليه أي شئ يثبت دا !
و لا إنت نفسك قلت سبب واحد منطقي يأكد كلامك
بناءً ع إيه بنيت كل الإستنتاجات دي !
أنا عمري ما شفت ف حياتي هارد ريفربشد و مش مكتوب عليه RE
أو متوضح عليه ع الأقل بـ رمز أو كود موديل ، دا الرسمي
--------
الخُلاصة / مش أي هارد يبوظ بعد يوم ، أو جاي فيه خدوش
أو نشتريه من تاجر غير أمين عامل ليه صيانة ، و بيبيعه أكنه جديد
هنقول عليه معاد تصنيعه و خلاص !
الريفربش دي موديلات تانية خالص مينفعش نفترضها بـ خيالنا
لازم دليل و منطق واضح يثبت كلامنا
-----
ناس كتير للأسف مش فاهمين
و تعليقاتهم ع الفيديو كلها إنبهار و ثقة ف الكلام !
أنا أسمع فقط عن صاحب الفيديو
لكن أول مرة أخش ع قناته و أشوفله محتوى
فـ أتمنى إنه يكون حد كويس و يتقبل النصيحة
و يتأكد من المعلومة بعد كدا قبل ما يطرحها ع العامة
خصوصاً إن عنده مشتركين كتير ، و دي مسؤلية
و جل من لا يسهو ، كلنا بنكمل بعض
تعليقات
إرسال تعليق
سيب أستفسارك وهرد عليك يانجم