صباح الفل عليكم ، بوست باكر ف الصباح الماكر ♥
--------
أنا بحترم جداً براند EVGA من زمان
قبل ما يبقاله وكيل ف مصر الفترة دي
و كروت فئة الـ FTW 2 إللي جربتها ف الجيل العاشر
كانت أفضل من الـ STRIX - AORUS و أغلب الفئة العالية
من حيث التبريد و الماتريال و ثبات الأداء
و كان نادر تلاقيها ف السوق المصري
و طبعاً مش هنتكلم عن الباور الـ EVGA
إللي لا غبار عليه و أثبت كفائة عظيمة
-------
من فترة EVGA بقالها وكيل مصري ، بغض النظر عن سلبياته
لكن ع كل حال ليها وكيل هيوفر منتجاتها ، و دا شئ كويس
و نتمنى إنه ميبوظش الدنيا زي ما عمل ف منتجات ASUS
حالياً الشركة دخلت سوق الماذر بورد و الكيسات
مبقتش منحصرة ع (( الباورات و كروت الشاشة ))
زي ما إتشهرت ف السنين الأخيرة بالمنتجات دي فقط
(( داخل مصر )) كان نادراً تلاقي منتج EVGA غير باور و كارت
-------
البوردة ف الصورة / X570 ، موجهة لمعالجات AMD - AM4
بالرغم من فخامة تصميمها ، و أماكن المخارج العبقرية
إللي ياريت أغلب الشركات تعمل مخارج الباور بالتصميم دا بعدين
لكني شايف نقطة الـ 2 بنك رام ، عيب بلا هدف
أو مش عيب بمعنى أصح ، لكنها رخامة بدون مبرر !
هتمنعني أشتغل Quad Channel
هتمنعني أعمل شكل جمالي بـ 4 رامات RGB
هتجبرني ع حجم رام معين ف حالة التحديث بعدين
لكنها تظل نظرياً ع الورق ، بوردة مُحترمة
و يكفي تصميم مخارج الباور إللي مكيفني أوي 🥳
و هنستنى توفر باقي موديلات البورد
زي B450 - B550 ، و بورد الجيل الجديد كمان AM5
دا ف حالة إنها هتصنع لـ AMD فقط
أما لو هتصنع للشركتين ، فيبقى هنشوف فئات INTEL المختلفة برضو
------
رأي شهابي من عالم موازي 😜
البوردة دي مفروض سعرها يكون نفس فئة / Aorus Ultra X570
إللي هو ماكسيمم 5800 ج
و معتقدش إنها تستحق زيادة عن كدا بالشكل الهزلي إللي شفناه
أنا مُحترمك كـ EVGA و عارف خاماتك و فِنشك
و أنا أولريدي Fan ليك و حابب منتجاتك
بس برضو ف منطق و عقل ، و فيه قيمة مقابل سعر
إنت مش هتخليني أشتري بوردة ب 10.800 جنيه تقريباً
براند لسة أول مرة نشوفه ف البورد !
و بـ بنكين رام ، و بـ ضعف السعر بتاع الأورس ، إللي بـ 4 بنك رام
و ليها إسم تقيل ، و بتقدملي جودة و أداء محترمين جداً !
إقنعني بـ سببين فقط ، و أنا هدفع ضعف السعر و هشتريها 🙁
----------
ياريت يراجعوا التسعير ، لإن البداية مش مُبشرة
متحمس جداً لمنتجات الشركة إللي بفضلها ف حاجات كتير
و بإذن الله نلاقي سعر و جودة يخدموا المستهلك
------
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت لـ الواقع بـ صِلة 🥺
و لايك و شير برضو ، متبقاش غلس 😃
-----
تعليقات
إرسال تعليق
سيب أستفسارك وهرد عليك يانجم