وحشتكم #اقفش_زومبي ، أنا عارف يا حقنة منك ليه 🤣
---------
ملحوظة / أي محل أو تاجر ، بلاك ليست معانا
مش بالضرورة إنه شيطان ، أكيد هتلاقيله تجارب كويسة مع ناس
أكيد هتلاقيله فانز و ناس متعلقين بيه ، عادي جداً
لكن الفكرة ف النسبة زي ما دايماً بنقولكم
لما محل ييجي عليه شكوى و اتنين و خمسة
دا رقم عادي جداً وسط حجم التعاملات الكتيرة و إحتكاك السوق
و طالما سمعته ما زالت كويسة وسط أصحاب مهنته نفسهم
و وسط الكبار و المختصين ف المجال ، خلاص هو دا المهم
و إحنا بنتكلم حسب تجارب شخصية و تجارب عملاء
و نظرتنا بحكم خبرتنا لـ الشخص أو الشركة دي
و ف النهاية هو رأي لا يخص إلا (( شهاب )) وحده
مش حكر عليك و لا ضروري تقتنع بيه
ليه بنحكي الكلام دا ، عشان دا منهجنا ، محاربة كل الزومبي
ممكن أسكت و الدنيا تعدي ، بس أنا مش بحب كدا
مبعرفش أسكت عن الغلط ، لازم نكشف للناس الوشوش كلها
بعدها كل واحد حر ف إختياره ، المهم نوضح الحقايق
أي شئ مش عاجبك هنا ع الصفحة او ف الكلام
إعتبره من وحي الخيال و لا يمت لـ الواقع بـ صلة 😃
------
دا تالت محل ف مول البستان هيخش قايمة البلاك ليست
بعد (( القمر و الشجيري ))
المحلات المذكورة رغم إختلافنا مع أساليبهم
لكننا مذكرناهمش بـ سوء أخلاقي
كله إختلاف ع المستوى العملي فقط
لكن المحل دا تحديداً إختلافنا معاه أخلاقي و إنساني كمان
يمكن دا أول مكان هنوصفه بـ (( قلة الأدب و الوقاحة ))
رحبوا بـ / أولد فيجن ، Old Vision
الشركة دي ليها معايا شخصياً 4 مواقف
واحد مع (( شهاب )) و إتنين معايا و يكأنني عميل عادي 😃
و واحد مع مسؤل التسويق معانا
غير مواقف كتير مع الناس ممكن إللي ليه مشكلة ييجي يحكيها
-------
1 / كـ (( عميل عادي )) كنت ف المول و قابلني حد معرفة
و كان عاوز جهاز ، دورنا ع مواصفات معينة
و كانت موجودة عندهم فقط بالكامل كـ تجميعة
حد ف المحل قصير كدا و شعره طويل معرفش اسمه ايه
قلتله تمام جمعها و هاتله أي كيسة RGB ع ذوقك مش ف بالي أوبشنز
مشيت و رجعت ، لقيته حاطط كيسة RED LED كولر ماستر
مش دي المشكلة خالص ، أنا قلتله إيه دا ! أنا قايلك / RGB
راح رد و قال لي ما دي RGB ، هي بتنور أهي !
قلتله هو RGB يعني بتنور ، قالي أها ، أي حاجة بتنور تعتبر RGB
طبعاً الضغط بيرتفع ، ف قلتله لأ ، دي اسمها ليد أحمر و دا مش طلبي
قالي معنديش إلا هي و الحكاية و الرواية و أنا فتحتها و جمعت
و الراجل معايا كان مستعجل و إضطر ياخدها عشان يمشي
و الشكل طبعاً كان مش لذيذ خالص
--------
2 / حجزت أوردر (( كـ عميل عادي )) و كلمتهم تليفونياً عشان أخده
و رد شخص إسمه (( مروان )) من فرع المهندسين
قالي تمام ، تعالى إستلم ، كالعادة و نتاج خبرة بأكد خمسين مرة
قلتله أنا هاجي من مكان بعيد سفر ، قال لي كله جاهز و مفيش مشاكل
بعتلهم مندوب و لما وصل لـ المحل عندهم
قال له بعتذرلك أنا مش عندي الشغل دا و حصل لخبطة
كلمني و قالي بعتذرلك خلال يومين الحاجة هتكون عندك هبعتهالك
و هحولك فلوس الشحن ، قلتله هتدفعلي إيه بس أنا عاوز الشغل
هستنى مفيش مشكلة ، وغرمت 100 جنيه شحن وقتها غير العطلة
و طبعاً عدى يوم و أسبوع و شهر و أكلمه و ينفض و مفيش شغل
و دا إللي نرفزني أكتر من موقف عدم إستلام الشغل و اللخبطة
------
3 / (( غير امين )) مدير فرع البستان الرئيسي ، طلب مني 150 كيسة تقريباً
من نوع الهانتي كانتي و البياضة ، و طلب كمان كمية SSD 128GB
و طلب يقابلني شخصياً كـ (( شهاب )) و نزلتله و قعدت معاه ف المحل
و رغم إني حسيت من كلامه إنه غير متزن ، و كذا حد حذرني منه
بس أنا بحب اجرب بنفسي و مش مشكلة اليوم إللي ضاع
و إتفق معايا ع تجزئة الدفع لمدة معينة لإنه مش هيقدر يدفع كاش
قلتله معنديش أي مشاكل ، و إتفقنا ع ميعاد لإرسال الشغل لمخزنه
كلمته قبلها بيوم قلتله هبعتلك المحاسب القانوني عندي
يسلمك الشغل و يمضي حضرتك ع إيصالات بـ الإستلام
لقيته إرتبك ف الكلام و ضرب ألوان و قالي بكرة مش فاضي
و كلامه إتغير و قالي هنأجل معلش مش هعرف أستلم
المهم غابله شهر تقريباً و رجع إتصل بيا يعتذر و يقولي حصل ظروف
و أنا عاوز الشغل و عاجباني الكيسات و بتاع
قلتله منك لمسؤل التسويق و المحاسب بتاعنا لإني مش فاضي
كلم الناس عندي و إتفق معاهم ع ميعاد نهائي
و بالفعل حملوا ليه عربية كبيرة بالشغل و رايحينله
و لما يكلموه، تليفون ميردش و الواتس ميردش و إختفى !
طب و الشغل و تكلفة التحميل و العطلة و كل دا ، شغل عيال غريب !
--------
4 / واحد من مسؤلين التسويق معانا ، و يعتبر جاري و صاحبي
و ميعرفش أي شئ أصلاً عن أي مشاكل حاصلالي مع المحل دا
بعتلهم رسالة ع صفحتهم بيعرض عليهم منتج ما إنهم يشتروه
بتوع التسويق ميفهموش غير بيع و شراء ، دا شغلهم و التارجيت
فـ عادي خالص يبعتوا لـ أي حد قدامهم محل أو يوزر ، مش عيب
فـ هنا اللباقة و الذوق بتقول إنك لو مش عاوز تشتري تقول إيه !
شكراً مش مناسب مش هشتري ، مفيهاش حاجة الموضوع بسيط
لا دا الجماعة الغير محترمين إللي ماسكين عندهم السوشال ميديا
يدخلوا و يشتموا الأخ و يقولوا ليه بـ النص و الاسكرينز موجودة
(( أنا بستهزق بحضرتك ))
بصراحة أنا إستغربت و رغم إني مصدق إللي شغال معايا
دخلت بنفسي ع الأكونت ، لان كل أكونتات التسويق عندي
و شفت الشات كله و شفت القرف دا
----------
مش فاهم بصراحة المحل دا بيشربوا فيه إيه !
هما لو قاصدين يبانوا بمنظر زفت لأبعد الحدود مش هيعملوا كدا
إنت لا همك عميل عادي ، و لا همك سوشيال ميديا
و لا همك كيانات تجارية ، و لا صناع محتوى
أومال بتحترم مين يا حمادة 😉
اتقوا الله و إمشوا عدل ، خليكم محترمين و إحترموا (( المستهلك المصري ))
عشان كل التصرفات بتاعتكم دي مش هتزعل حد غيركم ف النهاية
------
تعليقات
إرسال تعليق
سيب أستفسارك وهرد عليك يانجم