صباح الفل عليكم ♥
شفت فيديو Linus الأخير عن توسعاته ف المرحلة الجاية
و خططه الكتير و النبذات إللي قالها عن أفكاره ف التطوير
و لقيت إن دا هينعكس أصلاً ع مبدأ التصنيع بشكل عام !
بأفكاره دي هيجبر نظام التصنيع يمشي بأعلى جودة ممكنة
لإنه بإختصار هيطلع كل المتلاعبين ف #اقفش_زومبي النسخة الأجنبية
الفكرة و الشرح مذهلين ، الراجل وصل إنه حرفياً عاوز يخش جوا القطعة
بين الموصلات و بعدها و يشوف بيحصل إيه بأجهزة دقيقة
المعجون بيتمدد تحت المعالج خلال أد إيه و درجة حرارته و توزيعه
و تفاصيل دقيقة جداً بنفكر فيها و بنتعب لمجرد التخيل !
ما بالك بـ إللي هينفذها ؟
الراجل دا رغم نجاحاته و إنه من أكبر 5 تقنيين محترفين ف العالم
مادياً و كـ أرقام و كـ علم و إستحقاق بجدارة
هو فعلياً باصص للقيمة الحقيقية للشئ مش مجرد فلوس !
لو كان باصص لفلوس مكنش هيوصل لكل إللي فيه دا و مكنش هيتعلم
إللي بيعمله دا هيكون نقلة ثورية ف مجال صناعة الهاردوير بالكامل
لينوس ليه كارهين كتير ، و فيه ناس مش عاجبها محتواه
أصل مفيش حاجة كل الناس بتتفق عليها
بس نادراً لما تلاقي حد مش بيحترمه أو بيشكك ف معلوماته
و هي دي الغاية الأكبر ، دا قمة الكمال البشري الناقص !
إنك مهما كنت مكروه كـ شخص و الناس مختلفة معاك كـ رأي
لكنهم بـ يحترموك كـ أسلوب تعامل و بيزنس و كـ علم و محتوى
و قليلين جداً من الناجحين إللي بيوصلوا للدرجة دي
ف فرق كبير بين مشاهير الساحة ، و بين الناجحين المحترمين بجد
--------
دا الفرق بيننا و بينهم ، التقدير لقيمة المجال و إحترامه
فيه مصريين كتير يبيعوا مبادئهم و كرامتهم و كل شئ عشان الجنيه
المجتمع التكنولوجي العربي بشكل عام ، عايش ف تخلف رهيب
و هيرجعنا لورا بتصرفاته
المدعويين مراجعين واخدين الموضوع سبوبة
و كلهم بروموترز و المجاملات و التعريض هما الراعي الرسمي
من اول مديرين التسويق ف الشرق الاوسط للشركات الكبرى
و الوكلاء و المحلات الكبيرة اللي بتزكي و ترشح بالحب
و كلهم بيبصوا للمكاسب المادية فقط بدون أدنى ضمير أو رسالة
إللي ظاهرين ف الصورة من المراجعين المصريين
لا يستحقوا ، و غير مؤهلين أساساً لشغلتهم دي
و داخلين الموضوع بـ التزكية و المعارف و التطبيل أو الإبتذاذ
و دا السبب فيه مديرين التسويق للشركات الكبيرة
الوكلاء و أصحاب المحلات الكبرى إللي بيعملوا توصيات
دول أصحاب النفوذ ف ظهور المراجعين الغير مستحقين
إلا ما رحم ربي من المحترمين ، إللي يتعدوا ع صوابع الإيد الواحدة
---------
بقلب من كم يوم لقيت حد عامل فيديوهات بقاله شهرين
و أعلى فيديو جايب 200 مشاهدة ، و مبعوتله بوردة و معالج جيل 12
و شاشات تو كي ، و لابتوبات جيمنج ، و ترابيزات بلياردو و بينج
دخلت المحتوى لقيته بروموتر موبايلات سابق ، و طريقة شرحه ركيكة
و غير معروف إطلاقاً إلا وسط شلته إللي رشحته عند مدير التسويق للشركة
و لا اخينا اللي بينقل المراجعات من المواقع الاجنبية كوبي بيست
بترجمة جوجل ، الجاحد مش مكلف نفسه يعيد صياغة اللي سارقه حتى
لدرجة انه كتب ف بعض المواضيع موقف شخصي بيحكيه صاحب الموقع
انت مدرك احنا واصلين لـ إيه !!!
فين المعايير المهنية و الكفائة و أساسيات الإختيار ، فوت علينا بكرة
---------
لو هتقولي إنك زعلان و بتبص إنه بيتبعتله حاجات و الكلام دا
أحب أعرفك إني إشتغلت مع شركات أجنبية و تربطني بيهم علاقة طيبة
ف حين لما كان مشاهير المراجعين هنا بيطبلوا لمجرد محل ف المول
عشان كيسة ب 900 جنيه ، و مبيعرفوش يبعتوا ميل لحد برا مصر 😂
فـ أنا الحمد لله عارف قدر نفسي و قيمتي كويس و عمري ما أبص لحد
لإني عندي قناعة داخلية إني مينفعش أقارن نفسي بحد ، أنا مختلف
للأحسن أو للأوحش ، مختلف و خلاص متشغلش بالك 😉
بس وجهة نظري من الموضوع شئ تاني أكبر من كل دا
-----------
مش هعمل وطني و ثوري و أقولكم ف سبيل المحتوى و البشرية و بس
انا دايما بكلمكم بصراحة و بتقي ربنا ف كلامي
لإني مش محتاج جنيه من شغلي هنا و كله للشهرة
بحكم وظيفتي الأساسية و عيلتي و بلا بلا بلا
لكن انا برضو بضيع وقت و بتعب ف شغلي و ببذل مجهود
أكيد عاوز مقابل و إلا هيبقى حرام عليا وقتي دا أصلاً
فيه حاجات بنعملها لوجه الله بـ نيتنا الخالصة
زي المساعدات ع الرسايل و اي شئ بقدمهولكم و عارفينه
إللي مفيش حد ف المجال كله بيساعد الناس 24 ساعة زينا
بس دي صدقة جارية و زكاة علم هتفضل موجودة بإذن الله
الوجود ع ساحة مجال ، دي مسئولية كبيرة ف كل المجالات
مفروض تكون للمختصين بجد ، بحكم العلم و الخبرة و الشغل الفعلي
قمة الظلم لما حد يشوف أقزام فوقه ك ارقام و شهرة
و هو صاحب الحق مش واخد حقه ، إحساس رخم شويتين
-------
و سبحان الله ، محدش بيقدر و يفهم إلا الشركات برا مصر
بس للأسف دول تعاملاتهم برضو و نظرتهم لينا بتكون مجروحة شوية
لإنهم عارفين ألاعيب النخبة المذكورة فوق و بيتجنبوا سوقنا
من ناحية تانية ، خوفك ع مجالك و ع الحال عموماً هما الحافز
إنتوا مش هتحسوا ب دا ع المدى القصير
بس صدقوني واحدة واحدة هنبقى حرفيا عالم تالت ف المجال
متتغروش بالريفيوز و التعاونات و التصوير و كل الهري دا
القيمة يا جماعة فوق أي شئ ، و الأجانب مش عبط و مش بيهزروا
الحنفية مسيرها هتتقفل و كل دا هيتفلتر
بس لما تجيبوا إحباط للناس المحترفة إللي تستحق بجد
و تيجي لحظة الفلترة ، هنلاقي نفسنا رجعنا لبدايات عصر الكمبيوتر ف مصر
و بندور ع حد فاهم يا ولاد الحلال
متوصلوناش لـ المرحلة دي ، لإنكم أول ناس هتخسروا وقتها
بصوا لـ إللي يستحق بجد ، ف ناس عظيمة ف المجال
قنواتها و صفحاتها محدش يعرفهم ، الكلام مش ع نفسي و بس
الكلام لكفائات بجد أحسن مني كمان ف تخصصاتهم
و محدش بيقدرهم و لا بيعبرهم ، لغاية ما هيختفوا هما و محتواهم !
إتقوا الله ف شغلكم ، دي أمانة و إنتوا مؤتمنين عليها ، لا تخونوا الأمانة
-------
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت لـ الواقع بـ أي صلة 🥺
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم