السؤال دا بيتبعت لينا كتير ، فـ قلت أجاوبه هنا لإستفادة أكبر 🥰
كروت Palit ، كويسة و لا لأ ، و ليه رخيصة ؟
ناس كتير بتقولنا إبعدوا عن كروت Palit ، نعمل إيه !
للأسف الموضوع مليان فتي و دعاية من شركات منافسة
خلينا نوضح الحقيقة 🧐
-------
باليت أو Palit Microsystems
الشركة دي مش جديدة ف السوق زي ما كتير فاهم
دي موجودة من زمان و هي المُصنع بتاع شركات كبيرة
زي / GALAX - GAINWARD ، و براندات تاني
و لو هنتكلم عن جالاكس ، إحدى الشركات المندرجة تحت باليت
فـ هي من أفضل البراندات المنافسة و غنية عن التعريف
------
شركة Palit لسة نازلة السوق من قريب بإسمها المباشر كـ براند
أثبتوا كفائة و قدموا سعر كويس جداً
بس كالعادة ، مينفعش تحكم ع شئ للأبد ، السوق متغير
و حتى شركات الصفوة ، مقاييسها بتختلف و بيبقى عندهم مشاكل أحياناً
ممكن تلاقي كـ مثال ، شركة Asus هي الأفضل ف الجيل العاشر
لكنها إتأخرت ف الجيل الحادي عشر ، و Msi تفوقت عليها
و هكذا بـ إختلاف التفاصيل و الشركات
فـ عشان كدا مش هنعمم حكمنا ع شركة بإنها كويسة و الأولى دايماً
------
شركة Palit و عن تجربة شخصية لـ كروتها ف الجيل العاشر
كانت أفضل شركة بتقدم كروت فئة متوسطة كـ قيمة مقابل سعر
و تفوقت ع كل فئات الـ OC من شركات الصفوة ، و دي مفاجئة !
كروت زي / Asus Dual - Gigabyte Windforce - Msi Oc
مكنش فيه أي فرق يُذكر بينها و بين باليت ف خامات التصنيع أو التبريد !
مع العلم إن فرق السعر وصل لـ 1000 جنيه !
و كل إللي هيقولك بلاستيك تعبان و الكلام دا ، إعرف إنه فتاي أو بروموتر
---------
ا Palit شركة كبيرة و بِتصنع لشركات ناجحة و معروفة
و كون إنهم فكروا ينزلوا السوق و ينافسوا بـ سعر و كواليتي وسط الكبار
فـ أنا أعتقد إنهم مجتهدين و بيتطوروا
و لولا الحملات إللي بيتعرضولها من هجوم عن طريق بروموترز
أو عن طريق يوزر مش فاهم أوي و بيفتي و خلاص
كان زمان الشركة دي عليت أوي ف السوق المصري
المنتج عن تجربة لفئات كتير منه ، جيد جداً و مصادفنيش أي مشاكل معاه
بالإضافة إنه بييجي بـ ضمان محلي 🤝
-------
رأيي إن الموضوع محسوم ف فئات الكروت تحت الـ 10 ألاف
لإن توفير متوسط 1000 ج ف الفئة السعرية دي ، حاجة كبيرة و تستاهل
و أنا شايف إن Palit ليها الكلمة العُليا ف الفئة دي
أما الفئات الهاي إيند ، فـ أغلب الناس بتشوف أعلى براند
لإنك لو دفعت 20 مش هيفرق معاك تدفع 22 مثلاً
الفئة دي مش بيبصوا أوي للكروت المُوفرة حتى لو كانت كويسة
و أخيراً ، خلي التجربة هي الحكم ، و إتطمن ع التبريد
و إتفرج ع ريفيوز و مواقع و منتديات معروفة بـ حيادها
بحيث تختار أفضل قيمة مقابل السعر 🤓
------
لو الكلام عجبك ، لايك و شير 👍
لو معجبكش ، إعتبره من وحي الخيال و لا يمت لــ الواقع بـ أي صلة 🥺
و لايك و شير برضو ، متبقاش غلس 😃
-----
تعليقات
إرسال تعليق
سيب أستفسارك وهرد عليك يانجم