لو عاوزين اعملكم الموضوع دا ف فيديو ع القناة قولولي ف التعليقات
----
أفضل البرامج للكمبيوتر إللى هتبقى محتاج تسطبها ، بكل الأنواع
جيمز - ميديا - نت - أيزو ... إلــــــــــخ
البكدج الشهابي المتين لكل السوفتوير اللي هتحتاجه
--------------
الوندوز .. نظام التشغيل .. Windows /
أقوى وندوز ع الإطلاق هو / Windows 10 Pro
من كذا سنة كنت من محبين ال 7 جداً
لكن لما سطبت ال 10 و إستمريت بتحديثها لغاية دلوقتى
إكتشفت إن ال 7 فقيرة كـ سرعة و كـ دعم مقارنةً بـ ال 10
خصوصاً كمان إن ف برامج و ألعاب كتير مبتشتغلش إلا ع وندوز 10 فقط
---------
و بعد التحديثات الأخيرة ليها حصل فرق ف السرعة و الدعم
و أى جهاز بدايةً من الجيل التانى و رام 4 جيجا و ما يوازيه
هيقدر يسطب 10 و يشغلها بشكل كويس بدون مشاكل
جيمر أو مهندس أو مستخدم عادى .. ال 10 أفضل إختيار
لسة شوية ع ال 11 فـ متشغلش نفسك بيها
------------
الميديا .. Media /
فى تشغيل الفيديو .. إنت بتحتاج برنامجين أساسيين
برنامج يشتغل كـ أساس داخلى و دا إسمه / CODEC
و برنامج تانى كـ مُشغِل خارجى .. و دا إسمه ال / PLAYER
-----------
مؤخرا بقوا يدمجوا الاتنين ف واحد .. الكودك بقى معاه المُشغِل و العكس
و مفيش كودك قدم مشغل عالى .. و مفيش مشغل بينزل معاه كودك كويس
ملقتش برنامج أقنعنى و شغل معايا كل حاجة بشكل إحترافى
و إن كان بعضهم عملى و شغال يعنى
عشان تشغل أفلام بـ جودات عالية 4k أو 3d و غيرهم
و كمان الترجمة تنزل و تقدر تتحكم ف لونها و وقتها و التفاصيل دى
هتحتاج مشغل إحترافى ، و كودك إحترافى منفصلين أفضل
-------
أنا بنصح بـ كودك / K Lite Mega Codec Pack
مفيش ملف ميديا أياً كان نوعه مشتغلش معايا من خلال البرنامج دا
و هتلاقي بينزل معاه مشغل مدمج إسمه / Media Player Classic
غالباً كل الناس عارفاه .. أخرى بشغل عليه أفلام عربى و كليبات و كدا
عشان خفيف و سهل ف كل قوايمه
الكودك دا أنا شغال بيه من 2011 حتى الأن مغيرتوش
و ف الفترة دى جربت كل شئ بينزل و حاولت أجدد
لكنى ملقتش حاجة أثبتت نفسها و قوية غيره
----------
و بـ النسبه لـ المشغل .. بنصح بـ / Pot Player و من بعده / Km Player
بيدوك تحكم ف كل شئ بالنسبة لـ حجم الصورة و ألوانها و دقتها
و تحكم كامل ف الترجمة كـ تنسيق أو مزامنة
غير إن مستوى عرضهم للفيديو ممتاز جداً و مش بيقلل جودة خالص
بعدهم تقدر تستخدم / VLC .. محترم برضو جداً
-----------
كل دول يقدروا يشغلوا ملفات ال MP3 عادى جداًً
لكن لو عاوزين حاجة متخصصة ف الصوتيات و فيها تعديلات و تخصيص
عندنا / WINAMP - AIMP .. الإتنين ممتازين و بنفس المستوى
--------
التعديل ع الفيديو .. Video Edit /
بـ النسبه لـ تحويل الإمتدادات من فيديو لـ أوديو و العكس
فـ الأفضل و الأسهل هو / Format Factory
و برنامج / Wondershare Video Convertor
دا بيحول برضو و كمان بيضيف تأثيرات و بيعمل مونتاج بسيط ع الفيديوهات
---------------
و للتعديل ع الفيديو كـ قص مقطع معين أو دمج مقطعين
أو وضع ترجمة أو علامة معينة عليه
فـ الأسهل ف التعديلات هو / Easiest Soft Movie Editor
فيه إختيارات كتير زى التقطيع و الدمج و عمل علامة مائية .. إلخ
--------------
و ف المونتاج و تصميم الفيديوهات .. بالنسبه لشخص مبتدئ
يقدر يشتغل ع / Vegas - camtasia - Filmora .. فيهم مزايا كتير و سهلين
و لو مبتدئ بزيادة تقدر تشتغل ع ال / Movie Maker
أما لو إنت جامد و محدش أدك فـ أنصحك بـ / Premiere
---------
الأنتي فيرس .. AntiVirus /
من 2013 و أنا شغال ع / Avira - أو الشمسية الحمراء
برنامج خفيف و ممتاز و تحديثاته متوفرة دايماً
جواه قاعدة بيانات كويسة جداً و مش بيفوت حاجة
و فيه لوحة تحكم بسيطة جداً تقدر تحدد بيها عاوز تستبعد إيه من الفحص
و دا مفيد جداً عشان ميمسحش الكراكات للجيمز أو البرامج
و مرت عليا فيروسات أشكال و ألوان نظراً لإنى بوصل هاردات كتير
لكن الأفيرا كان صاحب جدع معايا و مسابهمش يحتلوا الجهاز
------
ال / Avast و ال KasperSky .. برامج كويسة برضو ، لكنى بفضل الأفيرا
----------
و بالنسبة لـ الأنتى مالوير .. AntiMalware /
ممكن نستخدم / Malware Bytes ، محترم و خفيف ع الجهاز
و فيه / Spyware Hunter ، ف حاجات معينة مبيطلعهاش إلا هو
تقدر تشتغل بالإتنين عادى جمب بعض ، أو تستخدم نسخة بورتابل لحاجة فيهم
عشان متتقلش الإستارت أب و الوندوز بتاعك
----------
متصفح الإنترنت .. Browser /
الـ 3 برامج الأشهر ف الموضوع دا / جوجل كروم - فاير فوكس - أوبرا
إختيارك راجع لإرتياحك الشخصى و تعودك .. كل برنامج متميز بـ حاجة مش ف غيره
-------
أنا ببص للموضوع بـ هل المتصفح بيدعم و يتوافق مع كل المواقع ولا لأ
و هل ف إضافات ممكن أنزلها للمتصفح ولا إضافاته محدودة
مش ببص كـ سرعة متصفح .. أو كونه خفيف ع الجهاز فقط
و أنا عموما بسطب التلاتة ع جهازى و مش بستغنى عن حاجة منهم
الترتيب حسب رأيى الشخصى /
1 - Opera
2 - Chrome
3 - FireFox
ومؤخراً ميكروسوفت أضافت تطوير للإنترنت إكسبلورر
تحت عنوان EDGE
و دا متصفح ممتاز جداً و بينافس الكروم و الفايرفوكس حالياً
كذلك بستخدمه جمبهم و أحياناً قبلهم
--------------
برنامج تغيير الـ أى بى .. VPN /
للأسف مفيش برنامج كويس و يسد معاك ف مساحات كبيرة و مجانى
الأسهل و الأخف ف الشائع هو / Hide.Me
لكنه محدود جداً و بتضطر كل شوية تحدثله البيانات عشان تاخد سعة جديدة
أما لو هنتكلم عن الأفضل بلا منازع لكنه مدفوع فهو / Speedify
مستقر و سريع و مش هيواجهك فيه أى مشاكل
و من بعده / Nord ، كويس جداً كذلك
----------
برنامج الأدوات المكتبية .. الأوفيس .. Office /
بيشمل برنامج كتابة و محاسبة و قواعد بيانات و عمل شرائح و مراسلات .. إلخ
الوحيد و المتربع ع العرش هو / Microsoft Office
رغم وجود برامج منافسة ، إلا إنهم مقدموش مزايا و دعم زى الأوفيس
دا مفيهوش إصدار أفضل و أوحش .. هى إستخدامات و راحة نفسية
و شوية مزايا بيضيفوها عشان لو حد محتاجها
ف وجهة نظرى أفضل أوفيس إشتغلت عليه هو 2019 Office
خفيف و قوايمه سهلة و متنوع بمميزاته
--------
التعديل على الصور .. Photo Edit /
رقم واحد و المتميز طبعاً ف المجال / PhotoShop
و دا إحترافى أكتر من كونه مجرد أداة لتعديل شئ محدد فقط
و هو مش زى أبلكيشن الأندرويد ، إللى بتضيف مؤثرات أو تكتب فقط
لا .. دا مساحة كاملة للتعديل ف كل شئ ف الصورة بأشكال إحترافية
برضو مفيهوش إصدار أحسن أو أوحش من التاني
لكن أفضل إصدارة منه ف وجهة نظري هي / PhotoShop 2021
-------
و لو إنت ملكش ف الفوتوشوب أوي و عاوز تلعب ف الصور بحاجه أشبه
بـ الابلكيشن بتاعة الموبايل .. فـ عندك برامج زي /
Photo Scape -- Photo Collage Max -- Acd See
دول كويسين جداً و سهلين و ممكن تتعلمهم بإحترافية فى أقل من نص ساعة
--------
قرائة الكتب .. PDF Reader /
أفضل برنامج ف النوعية دي هو / Acrobat DC Pro
البرنامج دا ع خلاف إنه بيقرأ الكتب و الملفات إللى إمتدادها PDF
لكنه فيه مميزات تاني زى تحويل أى ملف PDF لـ ملف وورد و العكس
و كذلك الصور بيحولهالك لـ PDF
و بيفتحلك تعديل كامل على أى ملف PDF
و بيدعم لغات كتير و بيحافظ ع التنسيقات و ترتيب الكلام ف التحويل
-------------
لو إنت مش محتاج أى ميزة إحترافية و محتاج قارئ كتب فقط
تقدر تنزل / Adobe Reader
نفس الشركة و نفس البرنامج ، لكنه بدون واجهة التعديلات الإحترافية
--------
ملفات ال أيزو و الإسطوانة الوهمية .. ISO /
أفضل برنامجين ف ال Virtual و قرائة إمتدادات الأيزو و ما يوازيها
هما / Ultra Iso .. Power Iso
و تقدر تنسخ إسطوانات من خلالهم ، و تبقى بوت
و بيحولولك أى ملف لـ أيزو ، و بيفكوا أى ملف أيزو مقفول
---------
إستعادة الملفات .. Recovery /
أفضل 3 برامج إشتغلت بيهم هما /
1 - EaseUS Data Recovery
2 - Recuva
3 - Power Data Recovery
بيجيبوا كل حاجة بنفس مسارها و ترتيبه بالظبط
و فيه إختيارات و تخصيصات للوصول لأفضل دقة
و لو عملت بيهم deep scan و الحاجة مرجعتش
يبقى متتعبش نفسك بـ أى برنامج تانى
-----------
تقسيم و تعديل الهارد .. HardDisk Tools /
بستخدم دايماً / MiniTool Partition Wizard
خفيف و ممتاز و بيدعم كل التعديلات ع الهارد
تقسيم - فورمات - حذف - تحويل نوع سيستم الهارد .. إلخ
و بيشتغل من ع الوندوز .. مش لازم Dos
-----------
و فيه برنامج / HDD Sentinel
دا بيوريك الهيلث بتاعة الهارد و بيعمل تيست ع كفائته
مش كل تقاريره دقيقة و بيهيس أحياناً ، لكنه ف الغالب مظبوط يعنى
-----------
و برنامج / HD Tune
محترم جداً برضو و بيقيسلك سرعة الهارد و فيه مميزات كتير
----------
صيانة الوندوز و أخطاء الريجسترى .. Windows Maintenance /
أغلب البرامج إللى من النوعية دى بتمسح ملفات مهمة و بتعمل مشاكل
لكن إللى اشتغلت عليه و لقيت فيه لوحة تحكم كاملة
تقدر تحددله نوعية الملفات و الأوبشنز إللى يعملها فحص
هو / Advanced System Care .. متنوع و فعلاً بيظبط الوندوز
بيصحح أخطاء الريجسترى ، و يمسح ملفات التيمب و إحترافى جداً
لو هتنزله .. حددله الأول يعمل إيه بالظبط حسب إحتياجك
و متعملش Auto Fix إلا كل إسبوع على الأقل خالص
--------
تسجيل الشاشة .. صورة أو فيديو
الإستريمنج و ال Screen Recorder /
عندنا برنامجين هما الأشهر ف الجزئية دى
إستخدم / Snagit لو شغلك مجرد تسجيل فقط
و إستخدم / Camtasia لو شغلك إحترافى شوية
و عاوز تعدل ع إللى بتسجله بأى شكل ، لإنه فيه بعض الأوبشنز للمونتاج
بجانب مهمته الأساسية كبرنامج تصوير
الإتنين ممتازين و مفيش أفضلية لحاجة ، كله راجع لإستخدامك
----
بخصوص الإستريمنج و اللايف برشحلك / OBS STUDIO ، خفيف و عملى
و نسخة ال / Streamlabs منه مميزة جداً كذلك
و دول متخصصين ف اللايف ستريم ، و فيهم مميزات كتير هتسهلك الدنيا
--------
الجيمز .. Games /
هقولك الخلطة الشهابية للقضاء على أى إيرور
لازم / Net Framework بـ أحدث إصدار
و لو مش متاح يبقى متقلش عن 4.6
الدايركت إكس / Direct X June 2010
--------
مجموعة ال / VCC ++ من 2008 ل 2017
أغلب الناس بتتلخبط فيهم و يقولك أنا مسطب كله و برضو فيه أخطاء
و هو بيبقى مفوت إصدار معين لحاجة فيهم
إللى هكتبهملك سطبهم كلهم و عن تجربة هيفرقوا جداً
و هيمنعوا أى خطأ متعلق بيهم
2008 / 2010 دول سطبهم بـ إصدارات ال 64 و ال 32 بت
و فيه إصدارات منهم Service Pack .. سطبها برضو
2012 / 2013 / 2015 / 2017 / 2020
سطبهم حسب نوع إصدار الوندوز بتاعك فقط
--------
كمان دول / Nvidia PhysX - Open AL - Rockstar Social Club
لو بتلعب أونلاين لازم هتبقى مسطب ال 3 الجايين
و لو مبتلعبش أونلاين فسطبهم لإنهم مهمين / Steam - Uplay - Origin
-----------
أظن كدا جيبتلك أغلب البرامج إللى هتحتاجها لجهازك و إنت شغال
عشان تبقى مبسوط كدا و قاعد منشكح 🥳
-----------------
لو الكلام عجبك ، لايك و شير
لو معجبكش ، إعتبره من وحى الخيال ، و لا يمت للواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم