ف وسط ما اللعبة بتتعمل عليك من كل البروموترز كالعادة
و إنت مبهور بيهم ، خلال دا هما بيكبروا ع قفاك و من جيبك
و بيأكلوك الطُعم ف النهاية ، و بتتسحل وراهم مغمي مع القطيع
محدش هينصحك و لا يكلمك كدا غير عمو شهاب
إدعيلي بأه لما أبقى مش موجود 🙁
------
كل المُرتزقة بيتوزع عليهم بورد و معالجات جيل 11
و سكريبتات مُوحدة ، و غصب عنهم بيمدحوا فيه و يخلوه تنين مجنح
مرة واحدة بقى الجيل الـ 11 جامد زوحليقة و فيه كل حاجة حلوة
و كلهم نزلوا فيديوهات و بوستات ف نفس التوقيت
سبحان الله ، متامر و اهبل 😃
-----
مع إننا قلنا إنه جيل سِلمة عشان يطلعوا للجيل ال 12
و مقدمش أي شئ ثوري يٌذكر و لا يستاهل
مجرد ريفرش ملوش أي قيمة و لا مغري للشراء
و لا يستحق تدفع زيادة و تجيبه بدل الجيل العاشر
-----
لكن هيبيعوا إزاي كميات البورد الموجهة ليه بدون عك
و هيبيعوه هو أصلاً كـ معالج إزاي بدون دعاية فاسدة زي عادتهم
شفت اللعبة بتاعة تغلية الـ أي ثري عاشر
من 1400 جنيه لـ 2000 جنيه !!!
شفت تغلية الـ أي فايف عاشر ؟
شفت سحب بورد الـ 410 من السوق ؟
كل دي خطط تسويق رخيصة بتتكرر دايماً
و للأسف إنت و غيرك كـ يوزر إللي بتنجحوا الناس دي
تخيل كدا معايا لو كان الـ أي ثري عاشر ، لسة بـ 1400
و الفايف العاشر بـ 2100 ، و بوردتهم متوفرة بـ 1400 جنيه
هل كنا هنسمع صوت لـ الـ 11 ؟
-----
طب أنا هلاعبك ف الحلزونة و هوفرلك الـ عاشر
بس مع بورد عالية شوية زي الـ B460
و بعدين هوفرلك الـ 11 بس مع بورد عالية برضو
و أتفرج عليك و أضحك 🤣
----
حد هيقولي ما دا بيزنس شركة و حقهم يبيعوا ، هقولك إنت صح
بس بـ الحلال ، مش بـ التوجيه الحرام للناس ناحية شئ معين
مش بـ الإحتكار و لعب الشطرنج بـ الناس حرفياً
كدا كدا ف مهاوييس بـ التحديث و هيشتروا
ف ناس لسة هتجمع و عادي هتدفع زيادة و تشتريه
ف ناس حابة رام بتردد عالي و هتجيبه عشان كدا بس
مفيش شئ صعب تبيعه ، و من أول قواعد البيزنس
إن كل شئ له زبونه و مفيش منتج مش بيتباع
أنا معنديش أدنى مشكلة مع شخص بيعمل تسويق لمنتج
مشكلتي مع إللي بيجبرك بتوجيهه ع منتج و بيتلاعب
و بيحسسك إن كل ما دونه سئ و هو ملاذك الوحيد
مفيش بـ ربع جنيه إحترافية تخليكم تذكروا المميزات فقط
------
ليه بس الضحك ع الناس إللي مش فاهمة !
يا جدعان إتقوا الله ، و الله هتكسبوا ف كل الاحوال ، الرزق مبيخلصش
حسبي الله و نعم الوكيل ف البروموترز
و عز الدين عتاقي ، و حفار رومانيا 🤣
تعليقات
إرسال تعليق
سيب أستفسارك وهرد عليك يانجم