صباح الفل عليكم ♥
ملخص أخبار المجال المهمة ف اليومين دول
تابع عشان تبقى مثقف يا عمو ، الزتونة الجميلة 😃
-----
1 / ف شوية حركات جديدة و لذيذة من شركة AMD
بخصوص تكنولوجي المعالجات
أعلنوا من فترة مثلاً عن المعالجات الجديدة
و إنها لامؤاغذة مش هتبقى بـ سنون
هتبقى ملساء كـ نظيرتها من إنتل !
* كمان ف أخبار عن زيادة حجم الكاش ف البروسيسور
لمعدل أكبر من الضعف و إنهم بيأسسوا لأرقام ضخمة
ع المعمارية القديمة بس بـ شوية تحسينات
و الكلام دا للمعالجات العادية كمان مش الفلاج شيب فقط
يعني من الفئة المتوسطة و إنت طالع ف الجيل الجديد
إللي كان الكاش بتاعه 30 ميجا ، هيبقى 80 ميجا مثلاً
* كمان معالجات APU إللي هتنزل زي / R7-5700G / R5-5600G
هيكون فيها التكنولوجي الجديدة المُحسنة لنفس المعمارية
و هتيجي بـ 6 و 8 كور !
الإهتمام بـ تحسين معمارية بشكل ملحوظ
سواء ف الكاش أو سرعة البيانات بشكل عام
إللي هتوصل لمعدلات ممتازة بـ المناسبة
دا شئ يُحسب جداً لـ AMD
و أعتقد إننا ف وقت ما هنستغنى عن كروت الشاشة المتوسطة
و سوق الـ APU هيبقى هو المسيطر
---------
2 / تقنية AMD لتحسين الأداء ، الشبيهة بـ DLSS من إنفيديا
و إللي هتيجي تحت إسم / FidelityFX - SR
هتبقى أوبن سورس ، ف مفاجئة كبيرة بصراحة !
يعني بإختصار هتبقى مُتاحة للشركتين ، AMD - NVIDIA
مش حصرية لـ AMD فقط ،و هتبقى متاح التعديل عليها مش مقفولة
الموضوع الغريب بصراحة !
لكنه مميز جداً ع المستوى العملي
و أنا شايف ملهوش إلا إحتمالين
* الإحتمال الأول هو عظمة زيادة من AMD
إنها بتقول إنها مميزة بـ كروتها مش بـ خاصية معينة
و إن ياما ف الجراب يا حاوي ، و التكنولوجي مبتخلصش
خصوصاً بعد نجاح تجارب مبدئية بإستخدام الخاصية
وصلت من 30% لـ 120% زيادة ف الأداء
* الإحتمال الثاني ، هو عدم إستقرار الخاصية و وجود عيوب ما
فـ الشركة بتحاول تستخدم سياسة الأوبن سورس
ف خلق أفكار و تحسينات جديدة بدون مجهود و من الكل
بحيث تستفيد و تطور و يبقى الموضوع منتشر أكتر
و دا هيفيدها ف كل الأحوال ، و بعد لما توصل لقمة التطوير
تقدر عادي جداً ف تحديث بسيط توقف دعمها و تقفل السورس
و ترجعها حصرية تاني لما تاخد مصلحتها ، دا وارد برضو
عموماً خلينا نستمتع بـ الخاصية ف صمت و بكرة هنعرف
و لا تستمتع إيه ، دا إنت فقير و معندكش كارت ، أني أسف 🤣
-------
3 / واضح إن الفترة الجاية هيكون فيها نقلات كبيرة ف الرام و تردداتها
و دا تزامناً مع إطلاق الجيل الـ 12 من إنتل ، إللي المفروض رسمياً
هيدعم رام من نوع Ddr5 ، لأول مرة !
ترددات الرام من النوع دا عالية شويتين
ف المتوسط هتبقى 4800mhz ، دا مش جديد أوي
و وصلناله مع الكسر ع منصة Ddr4
لكنه هيكون من الأساسيات و بدون مجهود ع المنصة الجديدة Ddr5
و مع شوية حركات هنوصل لـ 7000mhz برضو كـ متداول
و يُقال إن ف ترددات بتوصل لـ 12000mhz مع كسر السرعة !
طبعاً الأرقام مش دقيقة بالظبط ، لكن دا الوصف بشكل عام
ف تأخيرات شوية ف التايمينج ، هي مش شوية هي كبيرة الحقيقة
بدايةً من 25Cl مثلاً و هتعلى مع الترددات الأكبر
و دا طبيعي جداً ف الأول لغاية ما الدنيا تظبط
و الذواكر دي تتجرب فعلياً و نشوف مدى ثباتها
إحنا لسة ف البداية و دي كلها إعلانات سابقة لأوانها
هنتابعكم لما يتوفر رسمياً ف السوق بوردة بتدعم الترددات دي
و هنجربها مع رام بـ تردد خزعبلي ، و نشوف فرق الأداء و نقولكم
------
4 / تم الإعلان برضو عن كروت شاشة / RTX 3070 TI - 3080 TI
إللي بعتبره خبر مش مهم إطلاقاً بتاتاً
و خلينا نتفق حالياً إن أي أخبار عن كروت الشاشة
هي مجرد أخبار تسلية بلا أي إستفادة عملية
لغاية ما قلة الأدب تخلص 🙁
-----
دي كانت مُتابعة سريعة مُريعة ، ف ظل النت الفاصل عندي
تعليقاتكم إيه ؟ ، و شايفين إيه أكتر خبر مفيد ليكم !
تعليقات
إرسال تعليق
سيب أستفسارك وهرد عليك يانجم