صباح الفل ♥
ف خبر لفتت نظري عن شركة / سامسونج Samsung
إنها بتطور كاميرا للموبايل Mobile Camera
بدقة مستشعر 600 ميجا بكسل !
يااااه يا عبد الصمد ، فاكر إنت الكاميرا الـ 2 ميجا بكسل
إللي كنت بتفعل لها الوضع الليلي ، و تدوس بيها ع الخلق 🤣
حتى دلوقتي الكاميرات ف الموبايلات أغلبها
لتليفونات الفئة المتوسطة ، بين 32 و 64 ميجا بكسل
و الفئة العالية بتوصل لـ 110 بالكتير !
لكن تطوير حاجة بـ رقم 600MP شئ جديد و غريب !
و الشركة وضحت إن من أهم الدوافع لتطوير المستشعر
هو إنها عاوزة تقدم تصوير فيديو بدقة 4k و 8k
بدون أي مشاكل و بأفضل جودة ممكنة 🙁
-----
بس طبعاً لكل شئ جانب سلبي ، و هنا مبدئياً
هيبقى حجم المستشعر نفسه
لإنه هيبقى ناطط برا التليفون بشكل رخم شويتين
يعني بارز عن الجسم بـ 22 مللم تقريباً
كمان واخد مساحة كبيرة من التكوين الكلي للموبايل
لسة مش عارفين الكاميرا دي هتبقى ف موبايلات إيه تحديداً !
بس أكيد هنسمع سعر قليل الأدب أياً كانت باقي الإمكانيات
لإنه هيبقى فلاج شيب ، و نقلة ضخمة ف عالم التصوير
فـ هيكون موجه لفئة الفوتوجرافرز و صناع المحتوى بالأكتر
مش شرط إمكانياته بالكامل تكون عالية ، لإنه معمول لغرض معين
------
إحنا مستنيين الكشف الرسمي عن أول هاتف فيه الكاميرا دي
و هنشوف وقتها أدائها الفعلي عامل إزاي 🧐
التطور بقى سريع جداً و الحرب بين الشركات ملهاش حدود
الواحد بيبص لقدام و يقول لنفسه يااااه ، التكنولوجيا دي غريبة جداً 😆
مع العلم إن مش كتر الميجا بكسلز هي السبب ف دقة الصورة و الفيديو
ف عوامل تانية زي المستشعر و قصة كبيرة سعادتك
إتكلمنا عنها ف / كليك شمال و حلقة الكاميرات ، من فترة
ما إنت لو مهتم كنت دخلت يوتيوب و شفتها 😕
----
بس مهما يعملوا كاميرات و يطوروا
معتقدش هتبقى أجدع من كاميرا نوكيا الدمعة الحزينة
إللي بعد ما نتصور كنا بنجيب حد يعرفنا أوي يتعرف ع الصور 🤣
-----
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت لـ الواقع بـ صلة 🥺
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم