صباح الفل عليكم ♥
مقال تقني و إداري تقيل ، و فيه عِبرة أتقل 😃
+ شوية دردشة و ذكريات 🤗
كلام مش هتلاقيه ف حتة تاني 😎
لو مش بتحب القراية و لا عاوز تبقى مثقف
روح إعملنا شاي أفضل من هذا الهراء اللعين
معلقة سكر واحدة ليا لو سمحت 🙂
-----
جيل 88 لغاية 94 تقريباً ، هما إللي هيحسوا الكلام أوي
و هيعيشوا ف نوستالجيا و حنين غريب كدا بمجرد النظر للصورة 🙁
----
دي كانت الفترة الذهبية لبرنامج المحادثات الأشهر ( ياهوو - YAHOO )
مكنش ف فيسبوك و لا إنستجرام و لا تويتر و لا واتس ، زي دلوقتي
مكنش ف توسع أو وجود أصلاً للسوشال ميديا
و كان الجامد وقتها عنده ميل ياهو و بيخش الرومات و يكلم الناس
و الرومات دي كانت عبارة عن غرف محادثات بتدخل عليها مع ناس غريبة
و تتكلم وسط 50 بني أدم متعرفهمش و لا فاهم بيقولوا إيه !
و ف ناس كانت بتعمل الغرف ليها و لأصحابها بشكل خاص
و كان التعارف ف أبهى عصوره و الحياة لذيذة
----
الشخص الجامد وقتها كان بيبقى ماسك تليفون 6600 أو الدمعة
و الموبايلات دي مكنتش أندرويد ، فـ مفيش تطبيقات !
يعني الياهو دا لازم تفتحه من ع الكمبيوتر نفسه
متضافش كـ تطبيق ع الموبايل الا مؤخراً جداً و مكنش مستقر كمان
التليفون كان أكبر مميزاته إنه بيشغل MP3 و فيه كاميرا و بس !
و هي دي قمة الكمال التكنولوجي ، موبايل بيشغل أغاني و بيصور
+ كمبيوتر عليه أكونت ياهو ، و قدرة الدخول ع غرف المحادثات
= إنسان هيطلع القمر 😃
-----
كان ف خصائص ف الياهو جميلة جداً ، و مِعلِمة معانا حتى الأن
زي إللي ف الصورة مثلاً ، و هي عبارة ثيم بتختاره للمحادثة
و لما ترن ع إللي قدامك بيبعتله بوسة بـ صوت عالي جداً 😃
دا كان الثيم المفضل لـ الحبيبة و الرومانسية وقتها ♥
و كذلك كان ف جرس و صوت رياح و حاجات كتير حسب كل ثيم تختاره
----
عمرنا ما هننسى الأبلكيشن و هو بيعمل تسجيل دخول
و بيتحول شكل الياهوو من اللون الرمادي المطفي
لـ اللون الأصفر المنور ، و دا ف إشارة إن الأكونت فتح يعني 🙂
عمرنا ما هننسى فرحتنا بأول مكالمة VOICE ع الياهوو
لما جيبنا مايك خارجي صوته أسوأ من التليفون الأرضي
بس كنا مش مستوعبين إننا بنتكلم ف الكمبيوتر مش التليفون !
من غير رصيد و حد ف بلد تانية و بعيد ، و يا سلام لو كانت بنت !
ضرب نار للصبح ف المنطقة ، مين بيل جيتس ناو !
----
الياهو مكنش عليه wall أو صفحة شخصية تنشر عليها
كان مقسوم لحاجتين ، إيميل ، و دا فيه إنبوكس و رسايل فقط
و أخرك تشترك ف لينكات أخبار أو كورة أو حاجات مؤدبة 😃
و يجيبلك إشعارات و صور و تفاصيل محدودة جداً ع الإنبوكس برضو
و الجزأ التاني هو الأبلكيشن بتاع الشات نفسه إللي ف الصورة
و دا كان الأكثر شهرة ، سواء غرف عامة تكلم فيها العالم كله
أو أشخاص تعرفهم و متضافين عندك ع الأكونت
------
شركة ياهوو من أغبى الشركات كـ إدارة أو كـ فكر
و بعتبرها وجه العملة الأخر لـ شركة نوكيا 🙁
ياهوو ف الفترة دي مكنتش مجرد برنامج محادثات أو إيميل
دي كانت محرك بحث كامل زي جوجل كدا !
و كانت من أوائل الشركات إللي ضافت خدمات كتير
زي الأخبار و الرياضة و البورصة و غيرهم لـ دليل الويب بتاعهم
سنة 1998 تقريباً ، ياهوو كانت مكسرة الدنيا
و دي كانت إنطلاقة خدمة الياهو ميل إللي ف الصورة
إللي كان من أكبر أسباب شهرة الشركة و نموها ف الوقت دا
ياهوو قدمت خدمات كتير ع موقعها وقتها
زي / التسوق ، و السفر ، و الإعلانات المبوبة ، و الألعاب
و خدمات الخرائط ، و البحث عن أشخاص ، و غيرها
لما تبص ع شركة ياهوو ف الفترة دي ، هتلاقي عملاق مسيطر
و سابق ف كذا مجال محدش نجح فيه بالشكل دا
-------
حصلت أزمة عالمية سنة 2001-2002 بس شركة ياهوو قدرت تتخطاها
و بفكرهم وقتها و النجاحات إللي حققوها ، عدوا الأزمة الطاحنة
إللي وقعت ناس كتير كانوا عمالقة
المثير للدهشة كمان إنهم وقتها عملوا شراكات كتير كان من أهمها
إستحواذهم ع 40% من ALI BABA ، الشركة الصينية الشبيهة لأمازون !
كمان إشتروا شركة INSTANT MESSENGER و شركة FLICKER
و دول كانوا من أهم شركات المحادثات و نشر الصور وقتها
و دي كانت بداية النهاية ، و الدنيا مشيت بالعكس ، سبحان الله !!!
-----
عدت السنين و ياهوو منفردة مع نفسها ف القمة
و إذ فجاةً لقينا العملاق GOOGLE بيقول حد ليه شوق ف حاجة !
و داخل بكل تقله من مبرمجين و أفكار و شراكات و فلوس و كل حاجة
و من هنا ظهرت مُعضلة نوكيا 🙁
شركة ياهوو نفضت و سقعت لكل حاجة ، و إعتمدوا ع الإرث القديم
و قالوا نفس كلمة نوكيا / إحنا مبنعملش حاجة غلط فـ هنفضل ننجح
و الكونسبت كان / أنا ياهوو لا تكلمني يا فقير يا طعمية !
و دقت أجراس الخطر يا معلم و المعبد هيبتدى ينهار فوق راسهم
تابع معايا إوعى تسرح
----
سنة 2008 ، ياهوو كانت الصيدة الحلوة إللي كله طمعان فيها
شركة ميكروسوفت عرضت تشتريها مقابل 44 مليار دولار ، تقريباً
بس ياهوو دورت وشها الناحية التانية و رفضت البيع
و ف رأيي المتواضع إن دا كان قرار صح جداً
هتقولي ليه ، هقولك أوووومال ، مش سألتني سيبني أجاوب
الشركة وقتها كانت نجم ساطع ، و جوجل و ميكروسوفت
كانوا مجرد جيل جديد جاي بقوة أها بس لسة مأثبتش نفسه كـ كيان
الغلط هنا هو مُعضلة نوكيا ، إللي ياهوو مشيت بيها
مش قرار رفض البيع نفسه ، و هنا الكل بيتلخبط و يقولك كانوا يبيعوا
لا طبعاً ، رفض البيع قرار صح ، سياسات الإدارة هي إللي غلط
----
عدت سنة و جوجل زي القطر شارخ و ياهوو واقفة محلك سر !
ميكروسوفت ف 2009 عرضت تاني تشتري ياهو و متفقوش برضو
لغاية ما حصل إتفاق عبيط كدا شويتين بينهم
أثبتت فيه ميكروسوفت سيطرتها القادمة و قتلت ياهوو إكلينيكياً
و هو إن ميكروسوفت سمحت لـ ياهوو تستخدم محرك البحث بتاعها
المدعو BING ، لإن محرك بحث ياهوو بعافية شويتين و جوجل مطرقعله
عارف أنت كمية الحسرة إللي حسها أي حد بيفهم ف ياهوو وقتها
نفسي أعرف مين الجاسوس إللي قبل بـ حاجة مهينة زي دي !
-----
شركة ياهو بتقع تدريجياً و جوجل شارخ بلا توقف و سيطر ع كل شئ
جت الأستاذة ماريسا ماير ، إللي بصراحة مش قادر أحكم عليها
و تولت منصب الكبير أوي ف شركة ياهوو ، و وعدت بحلول
ترجع لـ ياهوو قيمتها تاني ف السوق 🙁
عملت شوية حاجات زي تغيير الواجهة الرئيسية للموقع
حصل تحسن طفيف بس برضو مش دا المطلوب
بعدها إشترت Tumbler ف 2013 بقيمة مليار دولار تقريباً
و إشترت شركة MAKTOOB إللي كانت مطرقعة وقتها
و عندها أول محرك بحث عربي ، و أول بريد إلكتروني عربي
و كانت شركة ناجحة جداً ، بس أول لما ياهوو إشترتها إختفت !
و مسمعناش حاجة عنها و فشلت بشكل ذريع ، و السبب مجهول !
-----
المركب بتغرق بزيادة ، تدق أجراس الخطر 🙁
طلع قرار بتسريح عدد كبير من الموظفين
و شبه إتلغت سياسات العمل من المنزل أو عن بعد
الخنقة زادت أكتر ع موظفين الشركة
الأستاذة الكبير أوي عبارة عن تاجر ملوش علاقة بالتكنولوجيا !
كل خطواتها كانت إستحواذ و شراء و بيع مش أكتر !
مفيش شئ عقلي تكنولوجي و لا تنمية ف فكر معين !
فاكرين مين دايماً يقولكم خطورة الناس دي ف الإدارة 🙂
-----
المهم الشركة قلبت فرن بلدي و قعدت تتطوح يمين و شمال
بتحاول متغرقش و بتلوش هنا و هنا
و إللي زاد الطين أكتر
إن شوية مخترقين دخلوا يعبثوا ف أمن الشركة و المستخدمين
كذا هجمة أثرت ع الشركة بضرر كبير أكتر ما هي مضرورة أصلاً
----
لغاية ما جت رصاصة الرحمة ف 2016 و شركة VERIZON
إشترت أنقاض عملاق هدمه الغباء يُسمى / ياهوو !
و المثير للرعب إن الإستحواذ دا تم مقابل 4.5 مليار دولار تقريباً 🙁
الشركة إللي رفضت تتباع ف 2008 بـ 44 مليار دولار !
إتباعت ف 2016 و بعد التضخم العالمي بـ 4 مليار دولار
لاي لاي لاي لاي لاي ، لماذا نحن هنا ـــــــــــــــــــــــــ
--------
حالياً ياهوو كـ كيان ، ملهاش إلا الجزأ الخاص بمتجر / علي بابا
إللي قلناه فوق + محرك البحث الخاص بـ اليابان ، دول متباعوش
و زي ما تقول ياهوو بتخلي حد يديره ، أو الله أعلم عملت إيه
المهم حتى الجزأ من المتجر دا و محرك البحث بقى إسمهم / Altaba
-----
ياهوو إللي كانت فكرة إتنين طلاب ف الجامعة سنة / 1994
و إتأسست كـ شركة / 1995 و سيطرت ع كل حاجة لسنين
إنهارت بشكل محزن و مؤسف ، و كان تاريخ وفاتها الرسمي / 2016
الحكاية كلها عبر و دروس مستفادة ، هتنفعك ف حياتك و شغلك
الشركة إنهارت ع طريقة نوكيا ، زي ما وضحنا ف موضوع نوكيا قبل كدا
التطوير ، العلم ، التخصص ، عناصر مهمة جداً
المغامرة ، مش عيب خالص الفشل بعد تجربة الجديد
الفشل هو مفتاح النجاح ، و بدون فشل مفيش نجاح بس إنت إسعى
عدم تحكيم المال ، الموضوع محتاج فكر أولاً ، و بعدها هيجيبلك فلوس
مؤسسين أبل و تيسلا ، مكنش غرضهم الربح قد العلم و الرسالة أكتر
و شوف حالهم دلوقتي إيه !!! إنتوا ليه ماشيين بالعكس 🙁
مليون سبب و سبب كانوا ممكن يحافظوا ع كيان من الإنهيار
بس العقول الكسولة الغبية الطماعة ، دايماً هما السبب
و للأسف التاريخ بيعيد نفسه كل فترة
و شركات و إدارات كتيرة ماشية ع نفس النهج دا 🙁
متكسلش و لا تطمع و تعتمد ع إسمك بدون تطوير مهما كنت ناجح
دايماً ف أكتر متعرفوش ، طاحونة الحياة مش هترحمك لو وقفت
كما قال عمورة ، أنا مهما كبرت صغير 🥳
عندكم شهاب أهو قدوة حسنة
رغم كل العظمة دي برضو متواضع جداً 😃
-----
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم