عندنا موضوع عظيم ف البوست المثبت
عن إزاي تشتري كارت مستعمل و تعمله تيست
و تكتشف إذا كان فيه أي عيب .. إقراه هيجيبلك الملخص
النهاردة هنتكلم عن جزئية ذكرناها ف الموضوع دا
لكن دلوقتي هنوضحها بتوسع أكبر
و هي تيست برنامج / FURMARK , و إعدادات برنامج / AFTERBURNER
هنبدأ بـ الفير مارك / إللي أغلب الناس بيعتبروه الأب الروحي لـ التيست
و دا من أكبر الأخطاء للأسف ، و ممكن يعملك مشاكل كتير
هنجيبلكم الخلاصة عشان نحسم الفتي و الجدل ف النقطة دي زى ما عودناكم
------
1 - البرنامج دا لما تيجي تضغط ع كلمة تيست من خلاله
بيقولك تحذير / إنه ممكن يسبب بعض مشاكل عدم الإستقرار أو إغلاق مفاجئ للجهاز
و دا ليه ، لإنه غبي و مش بيفهم 😃
------
و مع ذلك مش شرط إنه عشان عمل ريستارت أو شت داون إن الكارت بايظ
و كذلك مش شرط لو الجهاز إشتغل تمام و مفصلش إن الكارت سليم
و دا عن تجربة شخصية لعدد كبير من الكروت
عدت التيست عادي جداً بحرارة معقولة و الكارت فيه بلاوي تانية
زي الجلتيشات و الخطوط ، و تعديلة البيوس إللي بتثبته ع درايفرز معينة
و زي الفصل جوا لعبة و بوظان الألوان ، و غيرها من مشاكل
عمو فير مارك مش بيشوفها أصلاً و أخره يسخن الكارت و خلاص
و كروت تاني كانت بتعمل ريستارت ف الفير مارك ، لكنها زي الفل ب برامج تانية
و ف الجيمز و الجرافكس و كل الإستخدامات شغالة ، ماعدا الفير مارك تحديداً !
------
2 - الفير مارك ما هو إلا وسيلة للضغط ع الكارت و تسخينه لأقصى درجة ممكنة
بدون أي وعي أو رندر أو عملية حسابية سليمة تتم ع المعالج الرسومي
من الأخر دا بيهلكه و يشوف أخره ، عن طريق المساهمة ف هلكه أصلاً !
------
3 - زى ما وضحنا ف موضوع الكروت إننا هنعمل الفير مارك 3 أو 7 دقايق ماكسيمم
عن نفسي بستحرم أعمله أكتر من كدا ، لما فيه من أضرار أكتر من فوايد
عاوز تعمله 8x anti aliasing ، أو بدونها خالص .. مش هتفرق كتير
لإنها ف المتوسط بيكون فرقها 5 درجات حرارة تقريباً ، لكن التيست ب ال 8x
فيه إحترافية و بيدي فرصة لأظهار العيوب بشكل أكبر من إللي بتبقى فيه off
لإنه بيرمي مهام ع خصائص الكارت ، مش ضغط مُجرد و تسخين فقط
بالرغم من إن الإتنين مش مقياس ، و إحنا بنعملها عشان نريح العميل مش أكتر
و كمان 3 دقايق مش هيخسروا و هيساهموا برضو ف خطوات التيست
------
4 - الثري دي مارك ، مهم جداً جداً جداً و هو دليلك الأول
بعده ييجي التجربة العملية و الجيمز ، أو عمليات الرندر و الجرافكس
بعده ييجي تيست cine bench
دول أفضل السُبل إللي يكشفولك الكارت دا كويس و لا لأ
ف ناس تقولك هنسيب الكارت ع الفير مارك 10 دقايق و ربع ساعة و خزعبلات كدا
حضرتك كدا بتحرق ف قلب الكارت بتاعك بدون أدنى وعي
و مبتبقاش عملت إختبار حقيقي أصلاً بعد كل دا ، و ممكن يبقى فيه عيوب برضو !
دي كلها أفعال غلط من ناس مش فاهمة كويس ، و مبننصحش بكدا إطلاقاً
-------
5 - و أخيراً حضرتك مش بتفتح الجهاز و تقول أنا داخل أفتح فير مارك ساعة كدا
سيبوني بس أركز عشان أستمتع بـ الفير مارك 😃
إنت داخل تلعب ، داخل ترندر و تشتغل ، أياً كان إستخدامك
مش شغلانتك يعني هو برنامج الضغط الغبي دا و لا يفرقلك
عشان كدا شغل إللي هتعمله و شوف الأداء من خلاله
أو من خلال البرامج التانية الأدق إللي ذكرناها
------------------------
ثانياً برنامج الـ / Msi AfterBurner
إللي بيظهر الفريمات و الحرارة أثناء اللعب ، و بينظملنا المراوح و سرعتها
و فيه شوية أوبشنز تانية خاصة بكسر السرعة و الفولت و حاجات أدفانسد شوية
بالنسبة لـ ضبط المروحة و سرعتها
الأوتوماتيك مش أفضل إعدادات و لا عمرها كانت كدا
لإن ببساطة محدش يعرف الكارت دا هيتحط ف كيسة تبريدها عامل إزاي
حرارة المكان نفسه عاملة إزاي ، تفاصيل كتير تحكم الحرارة دي
و أغلب المراجعين المحترفين بينصحوا بعمل كيرف يدوي مُتزن
-----
القصة كلها إن دي إعدادات إفتراضية المصنع عاملها
ف الأغلب المروحة تبتدى تتحرك بعد 60 درجة و تبدأ تصاعدي بطئ جداً
لإن نفس المصنع بيعتبر بعض الكروت ف حرارة 80 أمر عادي و كاتبها ع موقعه
لكن إحنا بنصوت و نرمي الكارت لما نشوفها كدا و نقول عليه بايظ و متعدن و بلا بلا !
ف الحسابات مختلفة لكل شخص ، و لكل مكان و لكل جهاز الكارت محطوط جواه
عشان كدا عادي جداً نغيرها زى ما بنغير أى أوبشن إفتراضي ف أى حاجة بنستخدمها
مش قرءان يعني و قابلة للتعديل عادي جداً ، و إلا مكنوش إدوك الحرية ل دا
من الأبلكيشن الرسمي بتاعهم قبل أى أبلكيشن تاني !
----
ف متسيبش الكارت أوتوماتيك و تيجي تقيس ع كدا كفائته و تقولي بيسخن !
مين فهم حضرتك إنك كدا بتجيب أخر الكارت !
لأ يا عزيزي .. إعمله كيرف محترم و بعدين إحكم
و مش بقول طبعاً تخليه ع 100% كله ، و لا بنوصلها أصلاً
لكنك هتبدأ تخليه يلف تصاعدي بدايةً من حرارة 50 درجة مثلاً
و لو كيسة حجمها صغير أو متوسط و المكان مفيهوش تكييف
تراعي كل دا و تعمله الكيرف المناسب ، و مش شرط تلتزم برقم معين
بس خلي ف توازن كدا بـ السينس
و دي أرقام الكيرف بتاعنا لو حابب تعمله /
لغاية 50 درجة - مقفولة تماماً - 0% سرعة
60 درجة - 40% سرعة
70 درجة - 60% سرعة
80 درجة - 90% سرعة
90 درجة - 100% سرعة
-------------------
دُول كانوا توضيحين مهمين جداً ، لقينا الفتي كتر بخصوصهم مؤخراً
و إحنا واجبنا نوضحلكم الحقيقة و ننشر الوعي بدون التحيز لمصالح شخصية
و طبعاً لو معاك تمن الجديد إوعي تشتري مستعمل حتى لو مننا مهما كانت حالته
الجديد أفضل و أطول عمر و كفائة و الله أعلم ♥
------------------
لو الكلام عجبك ، إعمل لايك و شير
لو معجبكش إعتبره من وحي الخيال و لا يمت للواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم