عاوز أنزل القصة الحزينة دي من كم يوم و نسيت 🙁
طبعاً أنا عدو كسر السرعة ف أي شئ / معالج ، رام ، كارت ، إلـــخ
بحسه غير مفيد إلا ف الإستعراض و فرد العضلات ع المنافسين
لكن كأداء يخدمك و تستمر بيه لوقت طويل شغال ، بشوفه مش عملي إطلاقاً
-----------
بس لازم نشوف عروض القوة بتوصل لغاية فين
لإن دا بيعكسلنا جودة المكونات إللي بندفع فيها فلوس زيادة
و بيورينا الإضافات إللى بتبقى ف أي منتج هل هي كفائة فعلاًَ و تستحمل الضغط
و لا مجرد زيادات هيتدفع فيها فلوس بدون فايدة ، سواء كسرت سرعة أو لأ
و لإن مش الفئات العالية بس إللي بتبقى مزودة ب دواير طاقة و خصائص للكسر
لا ف فئات متوسطة كمان بتبقى مجهزة للموضوع دا ، و أغلى من العادية
ف لازم نبص عن قرب شوية ، لإننا حتى لو مكسرناش سرعة
ف الإمكانيات الزيادة دي هتنفعنا ك جودة للمنتج نفسه أياً كان 🧐
-----------
النهاردة معانا بوردة / ASUS Maximus - XII Apex
دي لوحة فلاج شيب ، مش للمستخدم العادي خالص
الجماعة المهووسين بالكسر عملوا عليها تجربة مع معالج / i9-10900k
و نأسف لبشاعة الرقم - بس دا i9 من الجيل العاشر بإختصار 😃
و ركبوا معاها رامات من نوع G SKILL
المهم بعد التجربة دي وصلوا لتردد معالج / 7.7GHZ - لكل الأنوية !!!
و تردد / 6666MHZ - لـ الرام !
و دا طبعاً مش بمراوح إطلاقاً ، و لا حتى توشيبا العربي ، هوخيهو 🤣
لأ حضرتك - دا بتبريد سائل من نوع غالي جداً و مخصص للتجارب دي
-----------
هييجي واحد يقولي طيب إحنا كدا إستفدنا إيه بصوت مرتضى منصور 🤬
هقولك سؤال جميل و مكار ف نفس الذات نفس 👌
بص يا معلم .. بعيداً عن إستعراض العضلات إللي وضحناه
و قوة المنتجات ، و التسويق للفئة المهووسة بكسر السرعات و تحقيق أعلى أداء
الموضوع ف وجهة نظري له جانب تاني ، و هو إنه بيلعب ع إحنا أخرنا إيه !
نقدر نوصل للترددات العالية دي ف أنهي ظروف ، و إيه الأوبتميذ إللى هنعمله
عشان نحقق الترددات دي بتكاليف أقل ، و ف ظروف أحسن كتجربة كاملة
و بنائاً عليه الشركات بتطور و تشتغل ع الإصدارات الجديدة
-----------
و لو رجعت شوية لورا هتلاقي الرام الـ 3600 ميجا إللي شغالين عليها النهاردة
عادي جداً زي أي رام عادية ، و كذلك المعالجات ال 3.5 جيجا هرتز
كل دا كان مجرد حلم زمان أيام التردد ال 800 ميجا للرام ، و المعالجات ال 1 جيجا
و مع تجارب الكسر و الأوبتميذ إللي بيتعمل ف الإصدارات الأحدث و السعي ف كدا
وصلنا للأرقام إللي بنشوفها النهاردة و بنركبها عادي جداً بدون تبريد غالي أو ريسك
و السنين الجاية هنشوف الأرقام دي بقت عادي جداً و ف أرقام أكبر و أكبر متوفرة
هي دايما بتبدأ كدا 🙂
و دا كان خبر و وجهة نظر شهابية ف نفس اللحظة ، إتمسوا ب الخير ♥
-------
لو الكلام عجبك ، لايك و شير
لو معجبكش ، إعتبره من وحي الخيال ، ولا يمت للواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم