صباح الفل عليكم ♥
من فترة عملنا موضوع عن معنى الأرقام ف المعالجات الإنتل
لو مشفتوش ، خش جري شوفه من البوست المثبت و إعرف إيه حكايتهم
بعدها الناس طلبت مننا نعمل موضوع عن معنى الحروف كمان
كنا إتكلمنا عنها قبل كدا بشكل سريع ، بس المرة دي هنقولها بالتفصيل 😎
هنتكلم بإختصار عشان تكون الدنيا بسيطة
و كمان لإن ف حروف إتعملت لـ جيل معين فقط و بعدها إنتهت
فـ إحنا هنذكر المفيد و إللي مكمل معانا ف الأغلب 👍
------
هنذكر سريعاً AMD ، بحيث الموضوع يبقى غني أكتر /
أولاً - أجهزة الديسكتوب 🖥
---
1 / حرف ال X ، و دا يرمز لإن المعالج قابل لـ كسر السرعة ⚡️
---
2 / حرف ال G ، و دا يرمز لإن المعالج فيه كارت شاشة مدمج 📺
---
3 / حروف ال XT ، و دي ترمز لـ المعالج الإكستريم الأقوى كتردد
و المُعدل من إصدارة سابقة 💥
---
كل دول هنشوف أغلبهم ف إصدارات الديسكتوب من الأجهزة
مع إمكانية تواجدهم ف معالجات اللابات لكن بشكل بسيط جداً
-------
نروح ع عمو ال INTEL /
---
1 / حرف ال K ، و دا يرمز لإن المعالج قابل لـ كسر السرعة ⚡️
---
2 / حرف ال F ، و دا يرمز لإن المعالج مفيهوش كارت شاشة مدمج
---
3 / حرف ال S ، و دا يرمز لإصدارة خاصة مُعدلة ، معمولها أوبتميذ
و أقل من الأساسية كـ تردد ، لكنها مش فئة منخفضة
---
4 / حرف ال X ، و دا يرمز لإصدارة إسمها إكستريم
إللي هي من إسمها تقدر تقول الإصدارة الرايقة من المعالجات 💪
فيها مميزات زي الكورز الكتيرة ، و الترددات العالية
و اللينز المتعددة ، و دعم الكواد تشانلز ، و غيرها
صدرت من كذا سنة ، و منتشرتش بشكل كبير ف السوق
--------
طبعاً مش شرط المعالج يبقى جمبه حرف
وارد معالج مش جمبه حرف ، له ما له و عليه ما عليه 😉
دا أصلاً الشائع ف الديسكتوب تحديداً
الحروف دي أغلبها ف اللابات فقط
مع تواجدها ف بعض موديلات الديسكتوب زي ما ذكرنا
لكنها مش قاعدة أساسية ، و مش لازم خالص المعالج يبقى جمبه حرف 🧐
-------------
بـ النسبة لـ اللابات فـ ليها رموز مُعينة خاصة جمب المعالج 💻
و الرموز دي بتبقى ف اللابات فقط بنسبة 98%
مع إمكانية تواجد بعضها ف الديسكتوب بشكل نادر /
1-2-3 / حروف ال U و ال T و ال Y
كل دا يرمز لإن المعالج مُوفر للطاقة و إستهلاكه للكهرباء بسيط
و بالتالي تردده قليل ، و دي الفئة المنخفضة بشكل عام 🌧
-----
4 / حرف ال M ، يرمز لإصدارة معينة خاصة بـ اللابات فقط
احياناً بيكون ترددها أقل و إستهلاك الكهربا منخفض
و أحياناً بتكون عادية جداً ، حسب الموديل
-----
5 / حرف ال H ، و دا يرمز لإن المعالج شغال بكامل كفائته
و مفيش أي تقليل لـ تردد أو لأستهلاك كهرباء ⚠️
-----
6 / حروف ال HK ، و دي بترمز لإن المعالج شغال بكامل كفائته
و كمان تقدر تكسر سرعته ⚡️
-----
7 / حروف ال HQ ، و دي بترمز للمعالجات الأربعة كور تحديداً
إللي شغالة بكامل كفائتها بدون أي تقليل ف الباور أو التردد
يعني إعتبرها = ال H ، بس زمان أيام ما ال 4 كور كان أعلى شئ
و ال Q دي إختصار لكلمة QUAD إللي هي رباعي يعني
زمان قبل ما يشيلوا حرف ال Q ، كانت بتتسمى كدا عشان تبقى مميزة
لكن حالياً بقى إسمها H فقط ، و بقت تضم 6 و 8 كور 💥
-----
8 / حروف ال MQ ، و دي بترمز للمعالجات الأربعة كور تحديداً
لكن إللي من إصدارة ال M ، إللي وضحنا إن ترددها و أدائها أقل أحياناً
أو بتبقى عادية و مخصصة لـ اللابات فقط
فـ كانوا بيميزوها زمان بالشكل دا ، و بـ يتباهوا بـ ال 4 كور 🤪
----------
بس يا سيدي ، دي قصة حياة الحروف جمب رقم المعالج
أعتقد كدا لمينا الليلة بنسبة كبيرة و الموضوع بقى سهل
و دلوقتي تقدر تعرف المعالج و أرقامه و حروفه معناهم إيه
و بقيت جامد و محدش يقدر يشتغلك ، إوعى 🤣
-------
لو الكلام عجبك ، لايك و شير
لو معجبكش ، إعتبره من وحي الخيال ، و لا يمت للواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم