الموضوع دا إتطلب مننا كذا مرة ف كومنتات و ع الرسايل
و مينفعش نتأخر ع الناس إللي معانا ف البيدج ♥
إيه الفرق بين أرقام المعالجات ف بروسيسورات إنتل كور أي !
يعني مثلاً / i5-4670 يفرق إيه عن i5-4590 و عن i5-6500 !!!
بعيداً عن مين الأعلى و خلاص ، محتاجين شرح كامل للأرقام كلها
تقريباً الموضوع دا متشرحش بالتفصيلة إللي هقولها دي تحديداً ع النت كله
بس يلا أهو سبق جديد كالعادة ، منتهى الغرور و قلة الأدب يعني 😂
هيا بنا ف رحلة شهابية جديدة 😎
------
كمثال .. هنقسم الموديل ع جزأين / i5 - 4670
الجزأ الأول / i5
بترمز للفئة العامة للبروسيسور ، و أظن دي واضحة
يعني هنلاقى عندنا كذا رقم بجانب حرف الـ ( أي ) .. 3-5-7-9
إللي هما كور أي ثري ، لغاية كور أي ناين
و طبعاً أقل شئ هو الـ ( أي ثري ) و أعلى حاجة ( أي ناين )
قياساً ع إننا بنقارن فئات من نفس الجيل يعني ، لإن فيها تفاصيل كتير
-----
و حرف الـ ( أي ) إللي قبل الرقم ، بيرمز لكلمة / INTEL
مفيهاش مصدر ، دي جدعنة مني كدا 🤣
-----
و كور يعني نواة ، و بنستخدم اللفظ بالشكل دا
هاتلي بروسيسور / كور أي فايف .. لو سمحت
هيرد عليك بزعيق و يقولك أى فايف إيه يا برنس !
و هنا نروح لباقي الأرقام
-------------
الجزأ الثاني / 4.670
أول رقم من الشمال إللي هو / 4
دا تاني أهم شئ ، و بيرمز للجيل ، يعني 4 = جيل رابع
3 = جيل تالت ، 9 = جيل تاسع ، و كل جيل برقمه
I5-9400 دا جيل تاسع
I5-3470 دا جيل تالت
I7-4770 دا جيل رابع
و هكذا .. كدا عرفنا نحدد الفئة و الجيل ، أهم شئ
--------
بدايةً من الجيل التاني ،
إللي هو رقمه الأول ع الشمال ( 2 ) هنمشي بنفس النظام دا
لكن الجيل الأول تحديداً / مش بيبقى أول رقم فيه ( 1 ) !
الجيل الأول بيبقى مكون من 3 أرقام بس بعد الفئة مش 4
و الرقم الأول فيهم ملوش أي قيمة كرمز لـ جيل
يعني المعالج إللي إسمه i5-650 دا جيل أول ، و i7-750 دا برضو جيل أول
و هكذا أي فئة جمبها 3 أرقام بس مش 4 ، تبقى جيل أول بإصداراتها
---------
باقي الأرقام إللي هما / 670 ، هناخدهم لوكشة واحدة كدا
و دول بيفرقوا ، بس مش ف الجيل نفسه ، الجيل إتحدد من أول رقم و شكراً
لكن فرقهم بيبقى قوة للمعالج ، و بيتحسبوا من الشمال لليمين بترتيب القوة
يعني مثلاً 670 أقوى من 590 ، مع إن تاني رقم هنا 7 و هنا 9 ، أعلى منه
لكننا أخدنا الأفضلية بالرقم التاني من الشمال
و التالت إللي بعده مأثرش عليه إنه قليل
لإن إللي قبله كبير و مسيطر كقوة بشكل عام
لو لقينا الرقم التاني بعد الجيل من ع الشمال ، أعلى
مش محتاجين نبص ع إللي بعده ، لإن كدا الموضوع إتحسم
--------
و دول أهم 3 نقاط لازم نبص عليهم ف المعالج
أولاً / الفئة .. إللي هو كور أي فايف ، و لا سفن و لا إيه !!!
أياً كان نشوف الرقم إللي جمب كلمة ( كور ) و حرف الـ ( أي )
ثانياً / أول رقم من ع الشمال ، إللي بيحددلنا نوع الجيل
ثالثاً / تاني رقم من ع الشمال ، إللي بيحدد قوة موديل المعالج دا
---------
أخر رقمين من ع الشمال ، إللي ف الأخر ، مش أساسيين كعامل قوة مؤثر
الأولوية زي ما وضحنا لتاني رقم ، بعد رقم الجيل نفسه فقط
لكنهم برضو مؤثرين ، و كل ما يكونوا أعلى ، يكون أفضل أكيد
الموضوع ماشي بالأكبر هو الأفضل
يعني مثلاً / 4690 أحسن من 4670 ، و 4590 أحسن من 4570
---------
لما بنوصل لتالت و رابع رقم ، الفروق مش بتبقى كبيرة إطلاقاً كقوة بين موديل و التاني
حتى تاني رقم كمان ، أهـ ليه فرق كأداء بيميزه ، لكنه برضو مش جذري
الفرق الأكبر هو فرق الفئة كـ كور نفسها ، و فرق الجيل إللي هو أول رقم
غير كدا ف فروقات واضحة ، لكنها مش عملاقة و لا بتغير الأداء 180 درجة يعني
و غالباً بتبقى فروقات تردد و حبشتكانات بسيطة
مثلاً أي فايف - 4440 تردده 3.1 جيجا هرتز
و 4570 تردده 3.2 جيجا هرتز
و 4590 تردده 3.3 جيجا هرتز
و 4670 تردده 3.4 جيجا هرتز
---------
تِفرق و تِبان ف حالة واحدة بس ، لما تقارن أقل فئة من الجيل بأعلى فئة من الجيل
كمثال / 4440 مع 4690 ، وقتها بيبانلك فرق كبير
لكن الفئات إللي بينها رقم واحد ، بتبقى فروقات طفيفة ممكن متلاحظهاش
--------
و شركة إنتل مقسماهم كقوة ، و دا للأرقام إللي بعد رقم الجيل زي ما وضحنا /
3 / BRONZE
4 / SILVER
5.6.7 / GOLD
8.9 / PLATINUM
------
و بكدا نكون خلصنا الرحلة جوا أرقام المعالجات الإنتل
و بقيت تقدر بسهولة تختار المعالج و تفصص أرقامه و تفهمها
و هتلاقي عندك موضوع تاني لفهم الحروف جمب المعالج
شوفه من البوست المثبت الجميل 😃
لو عاوزين أي شروحات أو مواضيع ، إبعتولنا و مش هنتأخر ♥
-----
لو الكلام عجبك ، لايك و شير
لو معجبكش ، إعتبره من وحي الخيال ولا يمت لـ الواقع بـ صلة
و لايك و شير برضو ، متبقاش غلس 😃
-----
تعليقات
إرسال تعليق
سيب أستفسارك وهرد عليك يانجم