إختلاف الأسعار بين البائعين .. ليه حد بيبيع ب 1000
و غيره بيبيع نفس المنتج ب 1200 .. دا أكيد نصاب ؟
العباقرة مكتشفى الباعة النصابين 😃
الموضوع بقى مستفز و لما بشوفه بيحصل مع حد حتى لو بعيداً عنى
أنا بتضايقله أصلاً و ببقى عاوز أردله من كتر ما الحركة رخمة
هوريكم عينتين منتشرين كتير جداً ...
---------------------------------------------------------
شخص 1 / إنت يا عم حاجتك غالية ليه ، دى بتتباع برا بنص التمن بتاعك !!!
أنا / حاجتى مميزة بإنها فرز أول و شغل نضيف مش مهلوك
و دا نادراً لما تلاقيه وسط سوق كبير فيه الوحش أكتر من الحلو
و بديك خدمات ما بعد البيع .. زى الضمان و الصيانة
و بسلمك الجهاز على التشغيل مباشرةً شامل الوندوز و برامجه
أى خدمات سوفت وير عاوزها على الجهاز بعملهالك
بالإضافة لإنى بنقلك أحدث داتا سواء برامج أو جيمز
كل دا له تمن و قيمة .. أنا مش بسلمك حتة حديد بتقوم باور فقط
و بعدها بقولك معرفكش ...
و كمان ...................... هوبا دبل كيك راح مقاطعنى و قال /
شخص 1 / ما كل الناس بتعمل إللى انت بتعمله دا و زيادة
و الشغل دا مستعمل ، يعنى كدا كدا بايظ و طالع عينه
مش فارق مهلوك من فرز اول و لا عاشر !!!
أنا / حضرتك لو الشغل بايظ .. ليه تدفع فيه جنيه حتى !!!
شخص 1 / أنا عارف كل حاجة .. بطلوا إستغلال و نصب على الناس يا ولود ال !
أنا / بما إنك بتقول إن فيه حد بيعرض نفس حاجتى
و بيعمل كل إللى بعمله بالظبط أكنه أنا .. مع إنك متعرفش كل إللى أنا بعمله
بس ماشى .. لنفترض إنك عارف كل حاجة !
ليه حضرتك متشتريش منه .. جايلى أنا ليه ؟
شخص 1 / لا أنا اصلاً مش عاوز أشترى
أنا بنبه الناس و بوعيهم من المستغلين أمثالك !
أنا / طيب حضرتك قريت كل المواصفات .. لإن فى حاجات مش واضحة
و ممكن يبقى مقصود بيها موديل مختلف بـ سعر تانى خالص !
شخص 1 / لا عادى ما هو كله قريب لبعضه مش هتفرق !
أنا / يا فندم أنا كاتب كارت شاشه 2 جيجا و مش موضح لا نوعة و لا أى حاجة
و الموضوع كدا مفتوح من كارت داخلى ببلاش
لغاية كارت ب 2000 جنيه مثلا خارجى !
إنت حتى مستفسرتش عن أى شئ قبل ما تحكم !!!
شخص 1 / متغيرش الموضوع .. إنت نصاب و مستغل إنت و كل التجار أمثالك
أنا / طيب حضرتك ليه مش بتحط عنوان أو رقم تليفون إللى بيبيع رخيص
و تعمل بوست لوحدك و تدل الناس عليه ، و كمان ممكن تحط ربح بسيط
بما إن فرق السعر رهيب بينى و بينه و تبقى عملت بيزنس و كسبت
و كمان الإفادة للناس هتبقى أكبر من مجرد كومنت على بوست
شخص 1 / لا ما هو أنا مش فاضى .. أنا مش تاجر و بساعد الناس لوجه الله بس
أنا / طب ممكن تقولى العنوان و الرقم بتاع البائع ، عشان أستفيد وارد أشتغل معاه
شخص 1 / يا عم دى موجودة فى كل حتة مش محتاجه إعلان و لا كتابة
إنزل هناك هتلاقى المول مليان !
أنا / طيب مول ايه - محل إيه - إسم التاجر .. أى حاجة طيب ؟
شخص 1 / إنتوا كدا نصابين و مليتوا البلد .. كتكم الارف حسبى الله و نعم الوكيل
أنا / يعنى حضرتك لا هتشترى منى ، و لا عاجبك منتجى ، طيب جاى ترازينى ليه !
شخص 1 / عشان أوضح للناس حقيقتك يا خائن 😃
أنا / يا فندم دى تجارة و عرض و طلب ، محدش بيجبر حد يشترى بالعافية
ثم إنى مش بدى معلومة تقنية خطأ لحد و لا بقوله إنى أرخص سعر فى السوق
و بديك ضمان و بخليك تعمل التيست إللى تحبه بالشكل اللى يناسبك
و اى وقت يعجبك لو عاوز تبات حتى مع الجهاز ، و تقدر تجيب مهندس معاك كمان
كل شئ مميز له تمن إضافى .. كلمة النصب إللى بتقولها دى ملهاش وجود
النصاب مش بيديك حاجة و بيبيعلك الهوا ، و أنا معملتش كدا !
شخص 1 / حرام عليكوا .. حسوا بالناس .. هاو هاو هاو 😃
أنا / أشعر بـ الأسى على الناس المريضة من الفراغ و الجهل إللى غرقانين فيه
و بينتهى الموضوع بـ عمل بلوك لـ الشخص دا .. و الدعاء له بـ الشفاء
........................................................................................
النوع دا يعينى عنده فراغ و جواه كلمتين عاوز يطلعهم
و مش لاقى حد يتفك قدامه بيهم .. يستحق الشفقة فعلاً
ممكن يكون شخص مش عارف يبيع و فاشل فى أى إنجاز فى حياته عموماً
فـ بيبص ع أى حد ناجح عموماً و تظهر جواه حاجات مش لذيذة تجاهه
بتبان ف الكلام بتاعه جداً و سهل تعرفه
و الأغرب إنك بتلاقى ناس متعرفكش و لا تفهم أى حاجة فى أى حاجة
و ملهاش أصلا فى الموضوع و لا عارفين أصله
و داخلين يشتموك معاه كمجاملة أو تلويش ، أو نفسيتهم زيه برضو
و داخلين يتفكوا شوية ، حاجة يعنى منتهى الإنحطاط
و بما إننا بقينا فى مجتمع مُشوه جداً فهنلاقى الأشكال دى كتير
و زى ما قلت أخرهم بلوك و دعاء إن نفسيتهم تهدى شوية و يبعدوا عننا
-----------------------------------------------------------
النوع الأول دا جاهل و قليل الأدب .. خلصنا منه
التانى هو العجيب جداً بأه ، النوع المجنون 😃 /
حد جاي يقولى .. المنتج أبو 5000 بتاعك دا أنا لقيته برا بـ 3000
فـ بقصر معاه أي نقاش لإن مفيش مجال أصلاً للكلام و هى إبتدت بالهزيان !
و بقوله طيب يا فندم دا سعر ممتاز و تقدر تروح تشتريه
يقولى لأ / أنا عاوز أشترى منك .. أنا واثق فى حاجتك !!!
أقوله طيب أنا حاجتى أخرها 4900 دا لو عملت معاك واجب
يقولى لأ .. مشيها ب 3000 !!!
أقوله يا فندم أنا لو هنزل ألفين جنيه فى شئ .. كامل مبلغه 5000
يبقى الموضوع مش سليم و منتجى فيه شئ غريب
و متشتريش منى و لا تثق فيا أساساً
يقولى لأ عادى عادى .. إحنا فى السوق و عارفين إن الشغل أصلاً تكلفته
مبتعديش 75 قرش و الشغل دا مرمى أصلاً برا على الرصيف
و التاجر هنا بيكسب فى ال 1000 جنيه .. 950 جنيه !!!
و يهزى بخرافات من هذا القبيل ! و يقعد يغنى مع نفسه
الحقيقة بقف محتار قدام النوعيه دى ! و بشغل إيموشن عب غفور البورعى 😃
طيب هو عاوز ياخد منى بنفس السعر إللى بيقول انه لقى بيه برا !
طب ليه مجابش من برا ! مش فاهم !!!
و بينتهى بيه الحال برضو زى اخوه الى فوق .. بلوك + دعاء بـ الشفاء
-----------------------------------------------------------
دا طبعاً بعيد عن التاجر المنافس إللى داخل يعرض سعر أقل منك و جوا إعلانك !!!
أو يستناك تنزل بوست ف وقت معين و يضرب سعرك
أو يبعتلك صحابه يحفلوا عليك و يظيطوا و يصدروا إشاعات عليك
عاوز يطلعك نصاب قدام الناس بأى شكل و أى طريقة .. لإنه مش عارف يبقى زيك
دا برضو بيبقى طفل جاهل أو مريض نفسى
و ميفهمش أى شئ فى الذوق و الأصول عامةً
و بيبقى الجوع هو إللى محركه ، و عاوز يبيع و بس دون أى أخلاقيات
و بييجى منه شكاوى كتير مع مرور الوقت و بتلاقيه إختفى تدريجياً
و رجع عمل أكونت مزيف و بدأ يعرض تانى ، و قصة رخيصة مهروسة بتتكرر كتير 😃
--------------------------------------------------------------
و أنا مقتنع جداً إن فيه بياعين نصابين كتير
سواء إللى بيديك مواصفات للمنتج هى مش فيه أصلا و يقولك هيشغل بيس 9000
و تروح تلاقى الجهاز بيشغل ماريو و بيهنج !
أو إللى بيبيعلك الهوا و يقولك الجهاز فرز أول و بيتشقلب و ينور من كل حتة 😃
و هو بايعلك حاجة مضروبة و طالع عينها أصلاً !
كل حاجة فيها الحلو و الوحش ، لكن كلامى هنا عن الناس المحترمة
----------------------------------------------------------
خلاصة الموضوع .. و لعدم الإحراج .. و عشان نرتقى
أى شئ مش عاجبك سعره .. إمشى و متعلقش عليه
أكنك مش شايفه خالص .. و دا كلنا بنعمله ف حياتنا
أنا نفسى بتعامل مع تجار و باخد منهم شغل بسعر كويس
و ألاقيه عارض نوع تانى بـ سعر عالى جداً عن الطبيعى
عادى بسكت و مش بهاجمه و لا بشتمه خالص
و بخصص تاجر معين لكل نوع عشان أعرف أظبط السعر
لإنى عارف إن الموضوع بيختلف حسب تكلفة الحاجه نفسها
و فرزها و ظروف شرائها و حاجات كتير أوووى
بس محدش عارف الكلام دا و كله بيعمل فاهم على الفاضى
لو ضميرك تاعبك و عاوز تنصح الناس
إعمل بوست بـ نفس الشئ و يكون بـ سعر أٌقل
و دا من سكات بدون تعليق على صاحب البوست إللى شايفه غالى
و بكدا تبقى نشرت النصيحة و أفدت الناس و وجهتهم للمكان الأرخص
و أخدت الثواب الكبير .. بدون ما تحتك بحد و تعمل مشاكل
المنطق و العقل بيقولوا كدا .. و أى بنى أدم سوى هيعمل كدا
لكن تغلط فى حد و تفتكر إنك كدا جميل و جايب التايهة
و إنت أصلا لا شغال فى المجال و لا متابع تطور السوق
و لا حتى فاهم إيه إللى معروض دا و قيمته ايه
أو حتى شغال و معلوماتك برضو قليلة فى المجال
وقتها هتجيب الكلام لنفسك و هتفقد إحترامك
------------------------------------------------------------
مفيش غير حالتين فقط إللى يدوك حق الرد على العام و التعليق على سعر حد
و هى إنه يكون عارض مستعمل مثلا بأغلى أو نفس تمن الجديد
أو عارض سلعة بفارق ضعف السعر أو أكتر عن السوق
هنا بس تنبهه بشياكة و ذوق لإنه وارد يكون ميعرفش
غير كدا ملكش أدنى حق تعلق على سعر حد على العام
السوق عرض و طلب .. والمجال مفيهوش أى شئ مُحتكر الحمد لله
أنا ببيع منتج منتشر و متوفر عند ناس كتير جداً غيرى
حقى أعرض السعر إللى يعجبنى .. و حقك متشتريش منى لو السعر مش عاجبك
أنا مش أذكى شخص ف الدنيا .. و إللى بيشترى مش أغبى شخص ف الدنيا
طالما بتعامل بأمانة و مش بخدع حد بشئ مش صحيح ، يبقى مفيش أى مشاكل
و لكم عبرة فى إللى بيرجعوا يعيطوا بعد ما يفرحوا بالسعر الرخيص فى الأول
و يعانوا من كذا حاجة زى / عدم توافر قطع الغيار
أو التعامل إللى مش كويس و عدم توفر خدمة ما بعد البيع
أو الجودة السيئة للمنتج إللى ظهر أثارها بعدين ، إلـــــــخ لباقى المطبات
طب ما كان من الأول يا جدعان 😃
و أخيراًً ربنا قال / (( تِجَارَةً عَنْ تَرَاضٍ مِنْكُمْ )) صدق الله العظيم
عرض و قبول و رضا من الكل و إتفاق - و هنا ينتهى أى جدال أو نقاش 🙂
--------------------------------------
لو الكلام عجبك .. لايك و شير
و لو معجبكش .. إعتبره من وحى الخيال و لا يمت للواقع بـ صلة
و لايك و شير برضو .. متبقاش غلس 😃
تعليقات
إرسال تعليق
سيب أستفسارك وهرد عليك يانجم