صباح الفل ♥
حاجات عجيبة بتحصل ف السوق المصري
من تسعير لـ توافر ، لـ هوس التحديث و خلاص
حرفياً ف خطة لتحويل اليوزر العادي لـ مُستهلِك بلا عقل 🤯
و العجيب إن دا بيحصل من الشركات المُصنعة للهاردوير ، قبل السوق
و أنا شايفهم شركاء مع التجار و الوكلاء ف اللعبة الرخيصة دي
تعالوا نلبس نضارات الفهم و نشوف الحكاية 🤓
البوست دا فيه تحليل لـ لعبة بتحصل و تتكرر دايماً
ركز معايا عشان تبقى ذكي و أحبك كدا 😃
و إللي مش بيحب القراية ، يروح يشرب كوباية كابشتينو
أحسن من الرغي الشهابي اللعين دا 🙁
------
هنبتدي من الأخر لـ الأول ، و هجمعلك الحكاية ف النهاية و هتفهم
صورة البوست ، دا محل ف مصر
عارض كارت الـ RTX 3090 ! نسخة متوسطة و مش إحترافية
السعر / 35.750 جنيه ! لا سحر و لا شعوذة
ف حين إن سعر الكارت العالمي / 1500 دولار !
يعني لو ضربناه ف 15.60 جنيه ، و دا سعر الدولار اليوم
هيدينا ناتج = 23.400 جنيه ، طبعاً الإستور مش تحت بيتنا
إحنا ف بلد تانية ، فـ مينفعش ناخد بـ السعر دا
طيب خلينا نزود 3 جنيه ع سعر الدولار العادي
ضمان محلي + شحن و تخليص + هامش الربح ، و حبشتكانات كتير
كدا تقريباً هنزود 4500 جنيه ع سعر الكارت الأصلي
يعني هنقول الدولار بـ 18.60 جنيه
وقتها مفروض يبقى سعر الكارت = 27.900 جنيه !
برضو موصلناش للسعر المعروض بيه الكارت !!!
طيب نزود كم ع سعر الدولار عشان نوصل لسعر المحل دا !
-----
عشان منحسبش كتير ، هنزود ع السعر الطبيعي للدولار 7 جنيه
يعني حضرتك عشان تشتري الكارت
هيتحسبلك الدولار بـ 23.60 جنيه !
ولما نضربهم ف 1500 دولار = 35.400 جنيه
و دا تقريباً نفس سعر الكارت المعروض ف المحل دا
-----
إحنا كدا حرفياً واخدين الكارت أولريدي 😃
بمعدل / 10.500 جنيه ، زيادة ع السعر العالمي !!!
ف حين إن الزيادة المنطقية و العادلة هي / 4.500 جنيه
زي ما وضحنا فوق بشكل تقريبي بعد الشحن و المكسب
يعني من الأخر إنت واخد الكارت أغلى / 6000 جنيه !
و دا رقم كبير جداً إنه يزيد ف منتج بالفئة السعرية دي
-----
طبعاً ف صعوبات إن الشركات تدخل الكروت
و إنهم يتحملوا ضمان محلي دا شئ له تمن
بس حضرتك مش بتدخل كارت و لا إتنين
و لا إنت شركة راس مالك 100 ألف جنيه يعني
أهـ ف مصاعب ، بس قدامها الناحية التانية مكاسب و نتايج
فـ متحسسنيش إنك بتصطاد الكروت من البحر وسط القروش
و هتعرضها كأنها الكنز الرهيب بأي سعر !
----
طيب إيه إللي بيحصل ، و الغلاء دا ذنب مين
وجهة نظري المتواضعة إن الأفورة ف السعر مقصودة
و سببها الأساسي الوكلاء ، و دا نتيجة زنقة شركات الهاردوير ليهم
تعالى هنا أقولك الحكاية
لما يكون ف مخزون لـ كروت زي / 2070-2080 Super
و معداش سنة عليهم و لا حققوا مبيعات ضخمة ترضيك
و إنت نزلتلي فئة تانية و جيل جديد مُحسن كلياً
بينافس الفئة العالية فيهم ، بـ سعر كروت الفئة المتوسطة !!!
مش كدا تبقى إنت خربت بيتي و خلتني ألبس الإستوك إللي عندي !
ما أنا مشتريه منك و دي شركتك و دا تسعيرك العادل 🙁
بأي منطق هبيع 2080 سوبر ب 11.000 مثلاً
و إنت منزلي كارت زي الـ 3060TI ب 9500 ماكسيمم !
و متوقع إنه يوازيه أو يتفوق عليه كأداء ، و جيل جديد و أحسن
المستهلك هنا بدون أي ذكاء هيروح للجديد
-----
يقوم التاجر أو الوكيل يعمل إيه !
نافخ ف سعر الجديد ، و محدد كمياته جداً
إللي هو دا إللي عاجبك يا يوزر ، طب خد ف وشك 🥴
توافر قليل ف السوق و مع تجميعة فقط
سعره غالي و مش هتعرف تشتريه
خليك ف الكروت القديمة الحلوة و هنعملك عليها تخفيض كمان
و بكدا يفكوا زنقة الإستوك القديم شوية ، هوبا الناس تشتري
يقوم بعدها مدخلك الجديد واحدة واحدة و ظابط سعره تدريجياً
لحد ما السوق يتملي و القديم يخلص و نبدأ الدايرة من تاني
مع بداية إعلان الشركة عن الجيل القادم ، و لفي بينا يا دنيا 🙂
----
و دا من أغبى السيناريوهات المتكررة مؤخراً
و بحمل فيه المسئولية الأكبر للشركات المُصنعة
زي NVIDIA - AMD ، لإنهم بيتسرعوا ف إطلاق جيل جديد
مش بيراعوا إلا مكسبهم الخاص و المجد الشخصي
و الوكلاء و التجار بياخدوا ع وشهم
أصل غصب عنك هتشتري منهم ، مفيش غيرهم 🙁
فـ طظ ف الإستوك إللي عندك و ف ظروفك يا وكيل
فـ بالتبعية طظ ف أحلامك و امكانياتك يا يوزر
و كل دا ف الأخر بييجي ع دماغنا ، ما هي جمعية و دايرة 😃
-----
الموضوع محتاج تنسيق من فوق خالص
محتاج تواصل مباشر للشركات مع الوكلاء و تنظيم للسوق
إتفاق ع توقيتات و تسعير و توافر ، يخدم مصالحهم
و كذلك ميضرش المستخدم و لا يوديه غصب عنه لسكك مش هتفيده
بس للأسف ف وسط زي بتاعنا و خصوصاً ف مصر
الوكلاء و التجار مش متخصصين و مش بيشغلوا راسهم
و الأهم عندهم المكسب السهل القريب ع حساب أي شئ
و البروموترز بيدسوا السم ف العسل و مش بيفيدوا حد بجد
واجهة تعريضية للشركات و إللي يدفع أكتر و خلاص
كمان الشركات نظام رأسمالي ، باصص لمصلحته المادية فقط
مفيش أي إعتبار للتكنولوجي و مجالها
أغلب الوسط سيلزجية من الأخر 🥵
----
فـ هتلاقي المستخدم الأخير ملهوش إلا أنه يقول ، يا رب 🙁
و ندعي إن مجتمع التكنولوجي من أعلى نقطة فيه لغاية أخر حاجة
يكون مليان ناس بتفهم ، و الفهم دا هيعود ع الكل بالمكسب
مش هيضركم ، إنتوا إللي بتستسهلوا و باصين تحت رجلكم و بس
-----
لو الكلام عجبك ، لايك و شير
لو معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم