صباح الفل عليكم
من الحاجات العجيبة جداً إللى الواحد بيشوفها ف المجال دا .. أهـ و ربنا تعبت 🙁
شركة بحجم Nvidia ، وقعت ف غلطتين مش هقول كارثيتين لكن هقول رخاص
----------------------------
أولاً / إنها تدى مسئولية الصفحة بتاعة Middle East للفريق المسئول عنها حالياً
إللى ف رأيى لا يصلح تماماً لهذه الوظيفة .. لنقص خبرته ف حاجات كتير
و إعتماده ع قنوات و مراجع ف بعض مصادره كلها تسويق و مجاملات مش أكتر
مش عيب إطلاقاً أشتغل مع شركة و أعرض منتجها و أميزه ف الترشيحات
عن نفسي أول حد بميز منتجاتى إللى ببيعها و بحطها ف الصف الأول دايماً
لكن العيب إنك تبيعلى الوهم ، تطبل ع الفاضية و المليانة
يكون فيه ترشيح أفضل أو شرح حتى ممكن تقدمهولى بشكل أفضل
و تغمى عينى عنه و توجهنى لناحية تانية مفيهاش أى شئ مُبهر و تقولى إنبهر !!!
دى إحترافية ناقصة جداً عندكم كـ سيستم الله اعلم إنتوا شغالين بيه تبع الشركة الأم
و لا دى سياستكم إنتوا ف التعامل و إدارة الصفحة !
ف كل الحالات هى غلط جداً
-------------------
ثانياً و دا الأهم / تسويقهم لتقنية ال RTX عن طريق لعبة ماين كرافت
هوووووولى شيت .. بصراحة يعنى !
لعبة مكونة من بيكسلز حرفياً و ليس تقنياً لإن كله بيكسلز يعنى
بس دى بيكسلز تُرى بـ العين المجردة عادى جداً
تقوم مِسوق لنفسك بيها ع إنها النجاح الرهيب للتقنية !!!
إنت مدرك .. سورى يعنى إعذرنى .. إنت بتهبب إيه !!!
إنت لو قاصد تضرب التقنية ف مقتل مش هتعمل كدا !!!
صباح الإشتغالات ع تغيير معالم اللعبة لـ لعبة جديدة كلياً
و نقول للناس دا ال RTX و إنبهروا !!!
هو فين اللعبة أصلاً حضرتك إللى هتتطبق عليها تقنية ثورية زى دى !!!
شوية بيكسلز لامؤاغذة مخرومين !
لو الضوء عدا من أى حتة فيهم هيعمل صورة جديدة كلياً
فيها إضائات و إنعكاسات و كل إللى نفسك فيه !!! إنت بتستعمانى يا هرم ؟
إنت بتبيعلى تقنية و كروت و نقلة تانية ف عالم الجرافكس كـ هاردوير و سوفت وير
بـ لعبة MINECRAFT !!! إللى أصلاً مُعدلة و دا تأثير تعديلك عليها
أكثر من تأثير التقنية نفسها ، كمان ، كمان !!!
-------------------
أياً كان جمهور و شعبية اللعبة دى إللى إنت بتستهدفهم .. كل التقدير ليهم
لكننا بشكل عام بقينا ف مجال عنوانه الماركتنج مش المعرفة
كله بيدور ع التريند أو على الرخص و يبيع بيه .. بدون النظر ف القيمة و المحتوى
مفيش مبدأ !
-------------------
التقنية بايعة نفسها و مش عيب إنها لسة بتتطور .. ليه مستعجل ع اللا شئ !!!
محدش حضرتك هيشترى كارت RTX عشان يلعب ماين كرافت !!!
و حتى لو فوجئنا بنسبة من المتزنين نفسياً عملوا كدا
دى نسبة قليلة و مش مقياس خالص ، ليه تبيعلى الهوا و إنت عارف إنه هوا !!!
عندك كذا لعبة حقيقيين ، التقنية شغالة عليهم حتى لو مش بشكل كامل
بس شغالة و ممتعة بصرياً بشكل ملحوظ .. ركز عليهم و طورهم و حسن أدائهم
متشتتش نفسك ف قصة تانية عشان تلم شوية فلوس و تبين إنك مفشلتش !!!
لا بأه .. أنا فان للتقنية أه ، بس إنت فشلت ف كذا نقطة ، منها إنها تبقى أوبتميذد
و سلسة ف ال كم لعبة إللى دعمتهم ، و حتى بعد تحسينك للأداء فـ ما زال سئ
ليه متشتغلش ع نقطة زى دى ، و هتبقى وقتها أكبر مُحفز إن الناس تشترى !
ليه متقولش إن BF V بقت يا جماعة شغالة ع ال 2060 بمعدل أداء أعلى 20 فريم
وقتها ناس كتير هتلمع ف راسها الفكرة .. بنائاً ع الأداء إللى إتحسن
لكن طول ما هما شايفين بنشماركات مخيبة للأمال ، و يافرحتى بالإنعكاسات
قدام 30-40 فريم .. يبقى خلينى ف ال PS4 أحسن !
و كروتك يا فندم هتفضل عندك ، و ليك ف إطلاقة السوبر عبرة
عشان تسرعك برضو ف نزول الفئة العادية بدون دراسة الموضوع
أقولكم إيه تانى ، ناقص أجى أدير أنا الشركة ، بس للأسف مش فاضى ناو 😃
-------------------
ممكن تشتغل الناس و تبيعلهم الهوا جوا شنطة عليها اللوجو بتاعك
هما هينبسطوا متقلقش ، و نجحت كتير قبل كدا ، بس مش بتدوم
و ليك عبرة ف التاريخ ، هتلاقى التطوير و المصداقية هما إللى بيستمروا
مهما طال الزمن ع الإشتغالات و ركوب التريندات و إللى ماشى حالياً
بس الأصلى أصلى .. و المضروب مضروب
و إن جتلك الناس النهاردة طوابير عشان المضروب ، فمسيرهم هيصحوا
دى غفلة قصيرة و رُخص عام مسيطر ع الحال مش أكتر
و محدش هيلبس البضاعة المضروبة كلها ف الأخر ، إلا إنت
-------------------
إجرى و إركب ترندات و بيع أى حاجة حتى لو وصلت تقلع هدومك و تجرى عريان
ما القلع بيجيب فلوس برضو .. بس ف النهاية بص ع نفسك و إنت لوحدك
و قولى مكسبك الحقيقى كان إيه ؟؟؟
و قلع الهدوم هنا حرفياً ، و كمان معنوياً
ما التاجر إللى بيضرب ف باقى التجار كسعر ، أو بيسَوق لحاجته بـ رُخص و إبتذال
أو بيشتغل الناس و ينصب عليهم ، أو بيقول معلومات غلط
أو هو جاهل و واخد منصب كبير و منبر يخطب منه ف أصحاب العقول البسيطة
إلـــــــخ لباقى الأساليب ...
دا برضو بيقلع هدومه ، و كل هذا يسمى العُهر 🙂
--------------------
التكنولوجى مجال العباقرة إللى بجد ، مش عباقرة جمع الأموال ولا التسويق
كل الإحترام للى بيعرف يجمع فلوس طبعاً كتجارة ، دا عالم تانى
بس إحنا بنوضح قيمة كل شئ و مسماه الصحيح
و عشان كدا فرق كبير إنك تبقى مهندس متخصص ، و إنك تبقى تاجر أو ماركيتير
-------------------
لو عجبك الكلام و دا طبيعى يعنى إنت لسه هتفكر ، إعمل لايك و شير
لو معجبكش ، إعتبره من وحى الخيال ولا يمت للواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم