صباح الفل عليكم 😃
هقولكم معلومات ع السريع كدا ، عشان بيصادفونى كتير
و نحفظهم سوا و نعرفهم لـ إللي ميعرفش ، عشان ناخد ثواب
---
1 / كارت الشاشة الـ 4 جيجا ، لازم يكون أقوى من ال 2 جيجا
و كذلك ال 8 جيجا ، أقوى من ال 4 جيجا ، و هكذا بإختلاف الأمثلة
من الأخر الكارت إللى جيجاته أكبر هو الأحسن يا معلم !!!
دي معلومة غلط جداً و ملهاش أي أساس
ف كروت قليلة ف الجيجا ، و أقوى من إللى أكبر منها ، عادي جداً
كمثال / GTX 1060-3GB أقوى من GTX 1050TI-4GB
و كارت زي RTX 2060-6GB أقوى من GTX 1070-8GB ، و هكذا
الموضوع له عوامل مختلفة ف الحسبة
زي موديل الكارت و معماريته ، نوع الرام بتاعه ، تفاصيل كتير
الجيجا دي ما هى إلا مساحة و سِعة لـ الكارت مش أكتر
لكنها مش متحكمة ع الإطلاق ف قوة أدائه زي ما عرضنا أمثلة
---
2 / البروسيسور أو المعالج ، ال i7 ، لازم يكون أقوى من ال i5
و الـ i3 دا اقل حاجة معروفة طبعاً
الـ أى سفن ، فوق ، مفيش أعلى منه أكيد !!!
دي كذلك معلومة غلط ، كمثال ، لو عندنا معالج
أي سفن - جيل تالت ، و قارناه بمعالج / أي فايف - جيل تاسع
هنلاقى / الـ أي فايف ، يكسب و بإكتساح
و معالج / أي ثري - جيل تاسع ، مع مقارنته بـ / أي فايف - جيل رابع
الـ أي ثري ، يتفوق بنسبة كبيرة ، و هكذا بإختلاف الأمثلة
معنى كدا إن الموضوع مش ب الفئة ، أي سفن و لا غيره
لكنها ب الجيل و بمواصفات كل معالج و باقي المكونات
ولازم نعرف إن الأجيال الحديثة من الفئات الأقل
بتتفوق ع الأجيال القديمة من الفئات الأعلى
زي ما وضحنا ف مثالنا كدا
---
3 / أنا عاوز شاشة LED و متكونش LCD
إوعى تجيبلي ال LCD ، أزعل منك !!!
حاضر هجيبلك شاشة LCD-LED ، يا عم أنا عاوزها LED بس
متتعبنيش معاك شكلك مبتفهمش ف الشاشات !!!
تالت معلومة غلط معانا ، الناس بتتكلم ع أساس إن الـ LED موديل
أو نوع شاشات ف المجمل ، و دا غلط جداً ، الـ LED
ما هي إلا تقنية إضائة لـ البانل نفسه ، عن طريق لمبات الليد
لكنها ف النهاية شاشة LCD عادية جداً و بتشتغل بتقنية إضائة مُحسنة
لكن تكنولوجي و شكل الشاشة الرفيعة ، مش البطيخة بتاعة زمان
دا إسمه LCD MONITOR ، إنت بأه عاوز تختار التقنية بتاعة الإضائة
هتقول LED أو PLASMA ، أياً كان إللى عاوزه هييجي بعد كلمة LCD
المسمى العلمي الصحيح هو / LCD-PLASMA أو LCD-LED و هكذا
لكننا كـ إستسهال بنقول شاشة ليد أو بلازما ، ع طول
و إنتشرت بالشكل دا ، و عادي جداً تقولها كدا مباشرةً مش غلط
و أخيراً عندنا الشاشة الـ LCD فقط بدون إضافات بعد الكلمة
و دي بتبقى بدون تقنيات إضائة مُحسنة ، من الأجناب صعب رؤيتها
و مننصحش بيها و لا بـ البلازما حالياً خالص
خليك ف الـ LED و ما يوازيه فقط
-----
بس كدا يا بورينس ، دي المعلومات الشهابية بتاعة النهاردة
لو الكلام عجبك ، مش هوصيك ، لايك و شير لغاية ما إيدك توجعك 👍
لو الكلام معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس 😃
----
تعليقات
إرسال تعليق
سيب أستفسارك وهرد عليك يانجم