صباح الفل 😍
ناس كتير بتحتار لما تيجي اللحظة التاريخية
و يقرروا إنهم يشتروا كمبيوتر
أسألة كتير و حاجات مينتال بتحصل ، و كوابيس رهيبة
هيتضحك عليا و لا لأ ، طب أنا محتاج إيه أصلاً ، و خد من دا كتير 🧐
موضوعنا هيقولك الزتونة ف إنك تختار كمبيوتر مناسب
إللي هو مش أوووفر ف القوة ، و لا هو ضعيف ف الإمكانيات بزيادة
الحاجة إللي تعيش مبسوط معاها ، و تخش عالم التكنولوجيا بيها ♥
-------
أولاً / الميزانية ، إنت أخرك تدفع كم للجهاز ؟
و محدش يعصبني و يقولى ميزانية مفتوحة و الخزعبلات دي
مينفعش تجيب مهندس و يسألك أبني العمارة كم دور
فـ ترد تقوله إنت تقدر تبني كم ! أصلي مش محدد !
طيب إشتغل و زي ما تطلع 🤪 ، هيسيبك و يمشي طبعاً
كل شئ له قيمة قدام تمنه ، مفيش حاجة إسمها الحاجة إللى تشغلني
كله هيشغلك و كله معقول و كله حلو ، حسب سعره يا فندم
فـ إنت زي الشاطر حددلى سعر ، و قول أخري كذا
و بنائاً عليه أنا هشتغل و هرشحلك الإختيارات المتاحة
و لإن الـ 100 جنيه الزيادة بتفرق ف قوة الجهاز
لازم نحدد الميزانية بدقة عشان نوصل لأفضل حل
و لإن أغلب إللي مش بيحددوا ميزانية و يقولك ميهمكش
بيبقوا عاوزين جهاز بـ 1000 جنيه ف النهاية 😃
فـ نسهلها ع بعض و نوضح التفاصيل للمهندس المفحوت معانا
---------------
ثانياً / الإستخدام ، إنت جايب الجهاز ليه ؟
هل عشان تلعب ؟ فـ هنحتاج تركيز أكتر ع كارت الشاشة تحديداً
لإنه ممكن يعوض من ضعف المعالج و يفيدنا ف الجيمنج
وقتها هندورلك ع الكارت الاقوى و نقلل شوية ف الباقي
بحيث يكون أدنى حد للتوافق مع الكارت بتاعنا
و لا جايبه عشان الرندر و المونتاج ، فـ هتحتاج معالج قوي كمان
لإن الشغل دا بيتطلب ان المعالج يكون نواياه حسنة 😂
هوخيهوخووخو
لا بجد .. بيحتاج المعالج يكون متعدد الأنوية و الكاش عالي
و مش بيفرقله أوي قوة كارت الشاشة و لا لازم إنه يكون حديث
رغم إنه مهم برضو , لكن مش بيبقى له الأولوية القصوى
و لا جايبه لكل الإستخدامات ؟ و هتشتغل و هتلعب ف نفس الوقت ؟
فهتبقى محتاج جهاز يحقق معادلة متكافئة ف كل المواصفات
يعني ندي للمعالج و الكارت و باقى الامكانيات نصيبها بالتساوي
عشان كدا تحديد الإستخدام مهم جداً
ف إنك توصل لأفضل أداء مناسب لإحتياجك
--------
ثالثاً / النية للتحديث .. هتدفع تاني قريب و لا عاوز تنساه ؟
النقطة دي تحديداً بتفرق جداً
يعني لو إنت هتجيب جهاز ، و عندك النية إنك تحدثه و تزودله أى قطعة
كارت شاشة ، أو رام ، أو أي حاجة خلال شهور قريبة مثلاً
فممكن أرشحلك تجميعة جديدة ضعيفة ، هتمشيك بأداء فقير شوية حالياً
لكنك لما تطورها و تقويها بعد كدا هتبقى ممتازة معاك 👍
لكن لو إنت هتحط تحويشة العمر ف الجهاز
و مش عاوز تصرف عليه شلن بعدين
وقتها هرشحلك حاجة إستيراد بإمكانيات عالية
تسد معاك سنتين و أكتر لقدام
من غير ما تحتاج تطورها أو تحدثها عشان تقدر تشتغل بشكل كويس
عشان كدا لازم تبقى عارف إنت خططك إيه للجهاز دا
و هل إنت مشتريه كحاجة مؤقتة و هتحدثه ، و لا عاوزه يبقى جهاز المرحلة
--------
رابعاً / ميولك العاطفية ، بتحب الجديد و لا المستعمل و لا مش فارق ؟
لازم برضو تكون مرتاح نفسياً للجهاز إللى هتجيبه
و لإن المستعمل سمعته وحشة زى ما قلنا قبل كدا
لكن لحسن حظك إن ملكش مكان تشترى منه مستعمل مضمون إلا إحنا 😎
بس لو متعرفناش هتكون كارثة طبعاً و هتضطر تشتري جديد فقط
فلازم تحدد إنت بتحب إيه ! لإن فيه ناس عندها فوبيا المستعمل
حتى لو جايب من حد ثقة و المنتج سليم برضو بيفضل موسوس و قلقان
وقتها خليك ف الجديد ، عشان مهما صادفت من مشاكل واردة أكيد
هتستحملها و هتبقى من جواك عادى خالص و مفيش مشاكل
لكن لو إشتريت مستعمل و الجهاز هنج بس ، مش هتنام ليلتين 😂
أما لو إنت من النوع التانى ، إللى بيهمه القوة ف الأداء و المواصفات
و مش فارقله جديد و لا مستعمل ، فأحب أقولك إنك بتفكر صح جداً
بس خلي بالك من الإشتغالات و النصب 👿
و إختار الشخص الأمين إللى تشترى منه
+ إنك تعمل تيست لكل حاجة كويس
و تاخد فترة ضمان متقلش عن 24 ساعة
ف أصعب الظروف لو لقطعة حساسة
زي كروت الشاشة و الهاردات و الشاشات و الباورات
و متقلش عن شهر كامل لو كيسة مقفولة
و كل شخص و نظامه و الإتفاق طبعاً
-----
لما تحدد ال 4 نقط إللى ذكرناهم دول
هتقدر بكل سهولة تشتري الجهاز المناسب إللي يكمل معاك
و مش هتواجه أي مشكلة ف إنك تشتري جهاز ليك أو لأي حد كمان
-------------
لو وقف معاك أي مصطلح و مش فاهمه
هتلاقى مواضيع ف البوست المثبت عن يعني إيه معالج أو بروسيسور
و موديلات كروت الشاشة و الهاردات ، و غيرها
موجود شرح مبسط لكل قطع الجهاز و مواضيع تقنية كتير
كمان ع قناتنا ع اليوتيوب هتلاقي حاجات حلوة
خش خدلك جولة ، و اللايك و الصبصكرايب المتين
عشان ربنا يكرمك ف المعلومات 😃 و بإذن الله تستفيد
------
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت للواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم