صباح الفل ، جمعة مباركة ♥
-----
من فترة نشرنا خبر إن شركة Nvidia
إستحوذت ع شركة ARM ، و كان ف كلام
إنهم هيعملوا معالج للأجهزة المكتبية خلال سنة تقريباً !
قامت بعدها شركة AMD ردت
و قالت إنها إستحوذت ع شركة Xilinx
ف محاولة منهم لعمل توازن ف السوق
------
لـ إللي ميعرفش شركة كلينكس و شركة دراع 🤣
دول شركات معالجات و شرائح سليكون و ذكاء إصطناعي و برمجة
و شغلهم متفرع و تفاصيله كتير ، و الحكاية كبيرة أوي يا صاحبي
فـ كل شركة من صناع المعالجات الرسومية أو المكتبية
بيحاولوا يستحوذوا ع نصيب الأسد سواء من الخامات
أو من التكنولوجيا و السبق ، عشان يسيطروا ع السوق
---
الخبر الجديد هنا إن شركة Apple إستغنت تقريباً عن Intel
و صنعت شريحة SOC من معمارية ARM !
بعد ما كانت intel بمعمارية X86
هي المُصنع الرئيسي لمعالجات Apple
ع مدار 14 سنة تقريباً ، لكنهم كدا شبه أنهوا التعاون دا
و لأول مرة يصنعوا بنفسهم من خلال شركة تانية
و شكلها مش هتبقى الأخيرة ، و دي بداية حاجة مختلفة
----
إللي ميعرفش يعني إيه SOC
فـ هي إختصار لمصطلح System On Chip
و دي عبارة عن بوردة مصغرة عليها كل شئ
المعالج و كارت الشاشة و الرام و كل شئ ، ع قطعة واحدة
كله مدمج مع بعضه ، دا توضيح بمنتهى السطحية الشهابية
لو عاوز تعرف أكتر عنها
هتلاقينا ف / كليك شمال ، ع اليوتيوب ، عاملين حلقة خاصة ليها
خش شوفها ، كفاية أنتخة هتدمر نفسك يبني 😃
------
الشريحة إللي صنعتها شركة APPLE هتيجي بـ إسم M1-SOC
تكنولوجي التصنيع 5 نانو ، بمعدل 16 مليار ترانزستور
بـ 8 أنوية لـ المعالج ، و المعالج الرسومي
الأرقام نظرياً تعتبر طفرة و محصلتش ف تاريخ الـ Mac قبل كدا
و الشركة بتوعد إنها هتقدم أفضل أداء مقابل إستهلاك الكهرباء
و إنها هتكون أسرع بشكل كبير ، من أسرع معالج سابق
----
طبعاً الخريطة بتتغير زي ما وضحنا قبل كدا
و الخبر مش مجرد شريحة ف أجهزة ماك الجديدة
أبسولتلي ، دا تمهيد للسيطرة و الفكر إللي هيتطبق بعدين
مين هيتعاون مع مين ، مين هيسيطر و مين هيقع ؟
إنتل بالشكل دا فقدت شريك عظيم ، لازم يكون ف رد عملي منهم
هل أبل بتجرب شئ معين ، و مش هتسيب إنتل بعد عشرة السنين ؟
و لا خلاص هما حطوا خطة الفترة الجاية و مش محتاجين خدمات إنتل
إنتل إللي ماشية ببطأ بقالها سنين ف كل النواحي بصراحة
الأيام جاية و كل شئ هيوضح تدريجياً
و الجهاز هيبقى متداول ف السوق و التجربة الأخيرة هي الحكم
-----
كل ما أشوف الأخبار دي ، و المراجعين و المهندسين
و أتفرج ع الناس إللي بتتابع التطور دا أو بتساهم فيه بـ أي شكل
و أرجع أبص عندنا ألاقي البروموتورز بيطبلوا ، و بـ يضللوا الناس
عشان بس ياخدوا بوردة أو كارت من وكيل و لا شركة !
بستغرب جداً من بيع الضمير و قلة الكرامة !!!
و بيسموا نفسهم متخصصين ف المجال و مهندسين !
طب بأمارة إيه ، فين مؤهلكم العملي أو العلمي !!!
بصوت كلنا عارفينه ، إنتوا مين ؟ إنتوا دارسين الكلام دا 🤣
بحس أوي إننا ف عالم الزومبي الجعان ، يارب ننضف بأه 🙁
-----
لو الكلام عجبك ، لايك و شير
لو معجبكش ، إعتبره من وحي الخيال ، و لا يمت لـ الواقع بـ صلة
ولايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم