كالعادة مبحبش أنزل ف الزحمة 😎
فـ إستنيت الدوشة تخلص ، و قلت أجيبلكم المفيد ♥
---
مؤتمر AMD و الإعلان عن كروت الجيل الجديد
معانا 3 كروت ، هنبدأ بـ البيج بوس /
1 / الكارت المدعو RX 6900XT ، فاجئنا
كنا ذكرناه ف موضوع ع الصفحة من فترة
و قلنا إنه جاي ينافس الـ RTX 3070 و يشتم ويجري الـ 3080
و دا كان بنائاً ع الفئة السعرية و المواصفات المبدئية
نقوم يا مؤمن نلاقيه جاي بيمسك ف خناق الـ RTX 3090
و هاتك يا ضرب ف بنشماركات لـ بعض الألعاب ع الـ 4K
عامل أداء موازي له تقريباً مع تفاوتات بسيطة لصالح الـ 3090
طب إزاي !!! 😳
-----
كارت إنفيديا أغلى بـ 500 دولار سعراً
سعر الـ 3090 = 1500 دولار !
و سعر كارت AMD هو = 1000 دولار فقط !
كمان الـ 3090 بـ 24 جيجا ميموري ! و شغال بـ GDDR6X
و الـ 6900XT بـ 16 جيجا ميموري ! و شغال بـ GDDR6 العادية
الـ 3090 جاي بـ ميموري باص / 384 بت
و الـ 6900XT جاي بـ / 256 بت
الموضوع غريب جداً و عكس إللي دايماً بيحصل 🧐
إحنا إتعودنا إن حتى لو إمكانيات NVIDIA أقل
لكنها بتنافس بشكل معقول ، نظراً لدعم الجيمز و الخصائص
و عوامل تانية ، و دا بيحصل دايماً و بيدي قيمة إضافية لكروت إنفيديا
لكن AMD تكون أقل كـ مواصفات و تنافس !!! دي جديدة
----------
2 / ف كارت كمان إسمه 6800XT
نازل بسعر 650 دولار
بـ 16 جيجا ميموري GDDR6
و ميموري باص 256 بت
كذلك الكارت عامل أداء أعلى بشكل طفيف أو موازي
لـ RTX 3080 ، إللي نازل بسعر 700 دولار
و 10 جيجا ميموري GDDR6X
و ميموري باص 320 بت
برضو المنافسة ف الفئة دي شرسة جداً
---------
3 / الكارت الأخير هو RX 6800
جاي بسعر 575 دولار ، و 16 جيجا ميموري GDDR6
و ميموري باص 256 بت
بينافس الـ RTX 3070 ، إللي بـ 500 دولار
و 8 جيجا ميموري GDDR6 ، و ميموري باص 256 بت
هل فرق الـ 75 دولار قدامه شئ يستاهل كـ أداء !
مبدئياً هو متفوق ، لكن الفرق مش ضخم أوي عن الـ 3070
لكنه ف نفس الذات نفس ، يستاهل الزيادة
عموماً التجارب حاليا مش كفاية للحكم ، هنشوف قدام بشكل أوضح
---------
ف تغيرات و نقلات عجيبة بتحصل ف السوق
الفترة الجاية هتحصل حرب ع تكنولوجيا الهاردوير بشكل عام
لإن كدا نظرياً AMD بتغير الخريطة تماماً
لكن عملياً لازم نستنى لما الدنيا تستقر و الكروت تتوفر
و المستخدم النهائي يحكم ، عشان متتكررش كارثة الـ RX 5700XT
-----
بالنسبة للتقنيات الجديدة إللي إتعرضت
أهم شئ منتظر كان / تقنية الإنعكاسات
مفيش أي كلام مباشر عنها و لا عن تطويرها !
و دا متوقع بعد ما شفت المؤتمر
لإن AMD كانت بتستعرض القوة المجردة
و بنائاً ع الأرقام إللي إتعرضت ، هما تعبوا ف دا جداً
فـ أعتقد مكنش ف وقت لتكنولوجيا بحجم الـ RAY TRACING
و دا مش عيب خالص و هنستنى منهم الجديد قدام
-----
من أهم الحاجات إللي إتلمح ليها من AMD
إن الكروت هتركب ع أغلب أنواع الكيسات بأحجامها المختلفة
كمان مخارج الباور بتاعتها مش محتاجة كابل مخصوص
و تشتغل ع أي باور عادي بمخارجه المعروفة
و حتى لو محتاج كونفرت ، هتلاقيه ف العلبة تقريباً
و لقحت كدا من بعيد ع كروت NVIDIA
إن كروتهم أحجامها كبيرة ، و بتخليك أحياناً تشتري كابل باور معين
هما غلطوا بس إحنا مخبيين ع إنفيديا محدش يجيب سيرة 😃
--------
بالنسبة لـ الأوبشنز بأه ، ف شوية حاجات كدا زي / Smart Cache
دي خاصية إتضافت للكروت بحيث تحسن الكونكت و الأداء بشكل عام
كمان بيحاولوا يعملوا تقنية تنافس الـ DLSS
و أظن دي هتبقى بـ التوازي مع تطويرهم لـ الـ Ray Tracing بشكل عام
----
و عملوا حاجة إسمها / AMD RAGE
و دي خاصية بيقولوا إنها هتعمل زي Sync
ما بين معالجات الرايزن 5*** ، و الكروت دي
بحيث يولفوا ع بعض ، و تاخد أحلى شغل يا صديك
دا بمنتهى السطحية الشهابية يعني 🤣
------
تقنية AMD BOOST ، حاجة كدا من الحبشتكانات
إللي بتتعامل مع الـ LAGS و تهندلها
ياريت متطلعش بلح بس 😃
-----
بس يا سيدي و رجعت من المؤتمر نمت ، و لسة صاحي !
فـ قلت أمسي ع أحلى ناس هنا ♥
----
لو الكلام عجبك ، لايك و شير 👍
لو معجبكش ، إعتبره من وحي الخيال و لا يمت لـ الواقع بـ صلة !
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم