البلاى ستيشن و الكمبيوتر -- إيه الأحسن ؟
تعالوا نعرف مين الأحسن ... 😃
..........................................................................
تاريخ البلاى ستيشن /
-------------------------
البلاى ستيشن بدأ معايا شخصياً من 2003 تقريباً
أشهر ألعابه - اليابانية و بيبسى مان و كراش - و دا كان بلاى ستيشن 1
وقتها كان التطور من الأتارى الفاميلى و السيجا - إللى بيشتغل تقريباً 1D
لـ جهاز بيشتغل بـ إسطوانة و بيعرض 2D
كانت نقلة خرافية طبعاً .. تطور رهيب للجيمز و الجرافكس
و إتحفر إسم بلاى ستيشن بمنتهى الجدارة من خلال الجهاز دا
و ف سنة 2005 تقريباً كنت بسمع عن بلاى ستيشن 2
و كان طفرة كبيرة جداً .. و ف نظرى دى أكبر نقلة ف تاريخ البلاى ستيشن كله
إتحول النظام من ألعاب 2D لـ ألعاب 3D و حصل تنوع و تطور كبير ف الجرافكس
حتى ف أنواع الجيمز .. الجيمز كانت كتيرة و أساليبها جديدة
لغاية البلاى ستيشن 2 - مكنش ف جهاز كمبيوتر قادر يوازيهم ف الجيمز
كانت كروت الشاشه مش قوية و لا كان ف جيمز كمبيوتر منتشرة
الكمبيوتر نفسه كان جهاز غالى جداً و مش شغله الأول جيمنج حسب عقلية الناس
ثقافة الجيمنج pc مكنتش موجوده ف مصر وقتها زى دلوقتى
و من 2003 لـ 2006 تقريبا .. كان عهد البلاى ستيشن بإكتساح
ف 2007 تقريباً كانت أول مره ألعب بلاى ستيشن 3
و كان التطور ملحوظ عن ال 2 - تحسينات عالية ع الجرافكس
لكنها منتشرتش و معملتش نجاح زى ال 2 .. لإنها تطوير مش تعديل تقنية
و لإن ف الوقت دا كان الجيمنج pc إبتدى ينتشر شوية شوية
و كمان كان ف كونسلز تانية بتقدم إختيارات أفضل
و بعدها نزل البلاى ستيشن 4 .. كانت بدايته تقريباً 2014
و عمل طفرة كبيرة ف الجرافكس و هو من أنجح الاجهزه بعد ال 2
و إتضافلوا تعديلات و نسخ محسنة فقط ... هو الأحدث
و منزلش بعده إصدارة جديدة من البلاى ستيشن حتى الأن
......................................................................................
كلامى هيكون عن البلاى ستيشن 4 - و ما يوازيه من الكونسولز عموماً
لإن دا الجيل الحالى ...
أنا مش متحيز لأى جهاز -- مع إنى PC Gamer
لكنى مش معارض البلاى ستيشن إطلاقاً
لإن له مميزات مش موجودة إلا فيه
و أنا عموما بحب أى حاجة بتشغل جيمز و لو موبايل
الجيمز عندى كيان ف ذاته ♥ ... أيا كان هو شغال ع إيه
..................................................................................
خلينا نقسم الموضوع لكذا حاجه...
الجودة و الاداء - سعر الجهاز - سعر الجيمز - المميزات الحصرية
الجودة و الأداء - سعر الجهاز
...........................................
إحنا مينفعش نقارن هارد وير البلاى ستيشن بـ الكمبيوتر
لإنه تكنولوجى و نظام تانى خالص - بس هشرحه هنا كـ أرقام فقط ...
البلاى ستيشن شغال بـ بروسيسور 8 كور AMD
عليه كارت شاشة AMD - و موديله 7870 تقريباً أو أياً كان
الرامات بتاعته 8 جيجا DDR5
ف لو هنقول بـ متوسط 5000 جنيه إللى هو تمن البلاى ستيشن مستعمل تقريباً
لو هتجيب جهاز كمبيوتر بـ المبلغ دا
فـ هتجيب بروسيسور 4 كور و رامات 8 و كارت شاشه gtx 950 - rx 470
أو ما يوازيهم فى سوق الكروت
كـ جيمنج - دا هيبقى جهاز فئة منخفضة ...
لكنه هيحققلك نفس أداء البلاى ستيشن ف 80 % من الجيمز بأنواعها
يبقى كدا ف نفس الميزانية بتاعة البلاى ستيشن
مش هتقدر تجيب جهاز كمبيوتر يوازيه أو يتفوق عليه ف الجودة و الأداء
طيب لو هنعلى الميزانيه لـ 7000 جنيه و هنجيب نفس الجهاز الى فوق
لكننا هنغير كارت الشاشه لـ gtx 1060 أو ما يوازيه
كـ جيمنج - دا هيبقى جهاز فئه إقتصادية ...
لكنه هيحقق أداء موازى ف الجيمز من البلاى ستيشن و يتفوق عليه أحياناً
أما لو هنعلى الميزانيه لـ 15000 جنيه .. و هنجيب جهاز أفضل
بروسيسور 6 كور - رامات 16 - كارت شاشه gtx 1070 - 8 و ما يوازيه
كـ جيمنج - دا جهاز فئة متوسطة ل عالية...
و هيعمل أداء أعلى من البلاى ستيشن بـ مرتين تقريبا
و كل ما نعلى بـ الميزانية كل ما الأداء هيكون ملوش مثيل
...........................................................................
طيب إيه الميزه لما أزود ألفين جنيه و أكتر و أجيب كمبيوتر
ما البلاى ستيشن أحسن و أرخص و هيدينى أداء كويس ؟
لا - مش أرخص طبعاً ...
بعيد عن إنه هيظل مجرد جهاز ألعاب فقط
مش متكامل و يشمل مهام متعددة زى الكمبيوتر
لا هتعرف تشتغل عليه برامج هندسيه و جرافكس و أوفيس
مش هتعرف تفتح نت - مش هتعرف تتفرج عليه ع أفلام
بنفس التحكم و الخصائص الكتيرة للكمبيوتر
إلـــــــــــــــــخ إلى باقى مهام الكمبيوتر المميزة ...
لكنه ينقصه حاجة مهمة تانى و بنائاً عليها ميحسبش رخيص
و دا يودينا لـ نقطة / سعر الجيمز
........................................
البلاى ستيشن متوسط سعر اللعبة الواحدة ليه .. حوالى 500 جنيه
و لو اللعبة جديدة و لسه نازله بـ توصل لـ 1200 جنيه
و ألعابه مش مكركة إلا ف حدود ضيقة و مش متاح تحميلها مجاناً
فـ هتضطر كل مره تشترى بـ اللعبة الواحدة
أما جهاز الكمبيوتر - ألعابه كلها بـ تتكرك و تبقى متاحة للتحميل
و ممكن تحمل هارد بـ سعة 1 تيرا - بحوالى 40 لعبة و أكتر
بمبلغ لا يزيد عن 300 جنيه - دا لو هتشتريها من عند حد
أما لو هتحملها ع النت بتاعك .. فـ مش هتدفع أى شئ ...
فـ بكدا الألفين جنيه الفرق إللى وفرتهم .. هتدفعهم ف أول 3 ألعاب هتشتريهم
و هتفضل تدفع أكتر و أكتر .. حسب الألعاب إللى هتشتريها بعدين
...............................................................................
أخر حاجة / المميزات الحصرية
............................................
و دى بتبقى ملخصه ف الجيمز
الشركه بتصنع لعبة ملهاش إصدارة أو مثيل ع أى جهاز تانى
و تبقى مميزة بيها .. و أشهر الحصريات دى ف البلاى ستيشن
Last Of Us - Uncharted - God Of War
و البلاى ستيشن متميز ف الحصريات عن الكمبيوتر
ف وجهة نظرى حصرياته أقوى و أنجح بإكتساح
لكنه للأسف يعيبه قلة الفريمات مقارنةً بالكمبيوتر
و دا عيب مش جذرى و لا هيوقفه ، لكنه كارثة ف وجهة نظرى الشخصية
...................................................................................
دلوقتى قدامك الصورة كاملة و تقدر تختار و إنت فاهم كل حاجة
لو عندك كمبيوتر لـ شغلك
لكنك عاوز جهاز سعره مناسب و أدائه كويس تشغل عليه جيمز فقط
و تستفيد بحصرياته و بحجمه الصغير معاك ف أى مكان
و عندك مجموعة أصحاب ممكن تبدل معاهم إسطواناته بسهولة
يعنى مش هتشيل هم إسطوانات غالية و مش لازم تشتري .. ممكن تبدل
يبقى البلاى ستيشن هو الإختيار الأفضل ليك بدون شك
أما لو عاوز جهاز متكامل - لـ الشغل و الجيمز و كل حاجة
أدائه أعلى بكتير أو موازى لـ البلاى ستيشن - حسب إمكانياتك المادية
و العابه متاحه ، و منتشرى ع النت مجاناً .. او بـ تتحمل ع الهارد بسعر بسيط
يبقى الكمبيوتر هو الإختيار الأفضل ليك طبعاً
..............................................................................
ببساطه المقارنه متنفعش و لا تصح ف المطلق
كل شئ له شئ موازى له ...
سؤال هل الكمبيوتر و لا البلاى ستيشن أفضل ؟
دا غلط ف حد ذاته .. الصح يبقى /
الكمبيوتر إللى إمكانياته كذا و لا البلاى ستيشن اللى موديله كذا ؟
غير كدا مفيش سؤال...
.............................................................................
و كلام برا الصندوق .. بعيداً عن حدود السعر و الإمكانيات
و توقعاً حتى بعد بلاى ستيشن 5 و 6 إلى ما لا نهاية
الكمبيوتر إللى بإمكانيات عالية هيفضل الأحسن ف المطلق ...
لإنه ببساطة جهاز مفتوح للتعديل .. ممكن أدفع أكتر و أخد أداء ملوش مثيل
و إللى حاصل دلوقتى يوضح دا .. لو جيبت كارت شاشه GTX 1080
ع جهاز i5 جيل تامن مثلا و رام 16 ... هيبقى أفضل من 3 بلاى ستيشن 4 مع بعض
مع العلم إن دا مش أعلى جهاز كمبيوتر ممكن تجيبه كمان
البلاى ستيشن يشبه برامج الأندرويد لـ التعديل ع الصور
سهلة .. سريعة .. مساحتها قليلة .. لكنها محدودة
مع إنها ليها نتايج مذهلة ف بعض الأوقات
أما الكمبيوتر .. فـ هو الفوتوشوب نفسه
صانع كل التعديلات و الجميع جزأ منه
------------------------------------------------------------------------
لو عجبك الكلام .. لايك و شير
لو معجبكش .. إعتبره من وحى الخيال .. و لا يمت للواقع بـ صلة
و لايك و شير برضو .. متبقاش غلس 😃
تعليقات
إرسال تعليق
سيب أستفسارك وهرد عليك يانجم