كفاية تبعتوا الفيديو الجديد بتاع الإستيراد ع الإنبوكس
جسمي بااااااااااظ يا عم الحج .. إرحموني 😃
الناس هنا تحب تساعد ف الخير جداً 👿
و انا نقطة ضعفي رسايل الأعضاء 🤣
عموماً ، أنا منزل موضوعين عنه المرة إللي فاتت
تقدر تشوفهم ف البوست المثبت لإنهم الخلاصة
وهحطلكم اللينك ف الكومنتات برضو
-----
بعد نظرة سريعة ع الفيديو ، لا جديد يُذكر و لا قديم يٌعاد
متوقع جداً كل إللي عمله أو بيحاول يوضحه
عمال يعيد و يزيد ف شكل الجهاز و ف إمكانية التحديث
و نسي أصلاً إن إللي بيشتري جهاز زي دا بتبقى ميزانيته منخفضة
لا هيحدث و لا بتاع ، و عاوز يلم الدنيا بأقل التكاليف
فـ ليه اللف و الدوران و تبينله انك هتتحبس ف جيل سئ !
و كيسة شكلها وحش و بتاع ، ما دي بديهيات معروفة !
بس إنت بتبروزها بـ بشاعة مش أكتر !
خليك حيادي و وضح السعر مقابل القيمة ، و إتكلم ف الحيز دا
----
التعليق و النصيحة الوحيدة /
إبقى خد معاك حد بيفهم و إنت بتشتري 😃
عشان يدلك ع أفضل الموديلات و الأسعار .. أولاً
و عشان يفهمك إن الباور الـ 320 مبيشغلش كروت 570 أو أعلى
و طبيعي جداً يفصل منك حتى بدون فير مارك أحياناً
أو شوف موضوعنا عن الباورات و تقسيمتها للكروت .. هيفيدك 🙂
تلبيسة الباور الضعيف دي بتحصل مع العملاء قليلين المعرفة
من تجار إما بينصبوا ، أو كذلك قليلين المعرفة هما كمان
فـ دا مش إكتشاف و لا إهانة للإستيراد يا فندم 😃
كمان خلي إللي هيروح معاك يفهمك إن أقل براندات هي XFX
فـ كذلك متشتريهاش إلا ف أضيق الظروف
لإن الجديد منها أصلاً عليه شكاوي كتير
-----
كذلك لما نيجي نختبر الجهاز و كفائته
بنبقى فاتحين كل خصائص المعالج
يعني الـ vt ، أساسي تتفتح ، ليه حضرتك قافلها !
كمان التربو دا هيأثر معاك ف الإستقرار ، ليه فاتحه !
المعالج مش أعلى حاجة من الجيل الرابع أصلاً
و مختلف ف البنشمارك ! ليه مختارناش أعلى فئة !
كلها حاجات محتاجة خبرة بالسوق و بالمجال بشكل عام 🙂
-----
كمان ليه أصلاً نجيب I7 جيل رابع !
و هو أسوأ تسعير ف كل الإستيراد من كذا سنة !!!
و دايماً بنصح العملاء ع الصفحة ميفكروش فيه
لإن سعره مبالغ فيه ، و له بدائل كتير
فـ كذلك إنت بتمسك الشاذ و تتكلم !
و إختيار غلط منك إنك تقيس عليه !
----
ملحوظة / ف الجديد ممكن التاجر يلبسك برضو
يديك بوردة فلاج شيب ، و انت واخد أي ثري جيل تاسع !
و ممكن كذلك يحطلك باور 400 مثلاً
و إنت مشتري كارت 3080 !!! عادي خالص كل شئ وارد !
و ف ناس كتير لبست ف الجديد ، بس النسب أقل من الإستيراد
الموضوع كله هو إن التاجر يكون
مهندس فاهم ، أو صاحب خبرة + إن عنده ضمير و وعي
ميبقاش حد تاني مش كويس .. القصة مش ف السلعة إطلاقاً
----
و كذلك عشان الناس إللي أول مرة تشوف صفحتنا
و لإني زهقت من كلام زي /
إنت بتقول كدا عشان شغلك و لقمة عيشك و الجو الرخيص دا 😃
يا جدعان أنا بضيع وقت ع الصفحة ف المساعدات
و كتابة الشروحات و متابعة الأخبار ، أكتر من البيع بمراحل
و دا مش بيزنس ربحي ، أكتر من كونه هواية و تخصص و حب للشئ
و واحد إمبارح يقولي إنتوا صفحة بيع العاب ، متجننوناش يا عم
بقى انا بالنسبالك صفحة بيع العاب ، جرحتني ف مجرحي 😭
---
إحنا مش صفحة تجارية فقط ، إحنا عندنا محتوى تاني أساسي قبل التجارة
و هو التكنولوجيا و شروحاتها و متابعتها ، و الجيمنج بشكل عام
و تقدر تشرفنا تعرفه من البوست المثبت قبل ما تتهمنا بشئ
و إحنا أصلاً بنبيع جديد و مستعمل و إستيراد و كل حاجة
فـ مش هيفرقلنا إطلاقاً الدفاع عن التجارة من الأساس لإنها شئ جانبي
إحنا بندافع عن معلومات و بنوضح للناس حقيقة شئ مش أكتر
لا ف خلاف شخصي مع حد و لا نعرف أي حد من إللي بنتكلم عليهم أصلاً
فـ الموضوع خارج نطاق الشبهات تماماً
و ف ناس كتير جداً عارفانا و متابعانا من بداياتنا من كذا سنة
و بيبقوا فاهمين كويس كل النقط دي ، أنا بكررها للجداد بس
رحبوا بإخواتكم ، إنتوا صحاب مكان ، إعملوا مجال و إنتشروا 😁
---
و أي حد معترض ع الكلام ، أنا مرحب بيه قبل المتفق
يناقش بإحترام و بشكل منطقي ، ف أي شئ مش عاجبه
و هيشرفني أكيد مناقشته ♥
----
لو الكلام عجبك ، لايك و شير
لو معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم