ف رسايل كتير جداً بتتبعتلنا تسألنا عن الصفحات
إللي بتبيع الأجهزة بـ باور 320 وات و 280 وات
وبـ يركبوا عليها كروت RX 570 - 580
الناس مش عارفة هل دا صح و لا لأ ، و طلبوا رأينا
دي الإجابة بكل وضوح عشان نقفل باب الكلام ف الموضوع دا
و عشان نرضي ضميرنا و زي عادتنا رسالتنا ف المجال و هدفنا
----
أولاً / الكلام دا غلط و مينفعش نظريا و عملياً ، نقطة و من أول السطر
بنائاً عليه بيبقى فيه لعب كتير سواء ف الكارت نفسه و إنه يتعمله أندر فولت
أو بيوس تعدين مبيستهلكش باور عالي ، إلـــخ لباقي الحركات
و دا غلط كمان ف الجهاز نفسه و تركيبته تحت الضغط
لإن معظمهم بيشغلولك حاجات بسيطة جداً ، أصلاً هتفتح حتى لو الكارت بايظ
لكن تحت ضغط عالي بيستهلك كل موارد الجهاز ، الجهاز بيرستر أو بيفصل
او بيحصل مشاكل كتير ف الأداء و عدم إستقرار كلي
و دا تيست هما مبيعرفوش يعملوه أصلاً
و حتى لو إشتغل شوية مش معنى كدا إنه صح !
و المشاكل جاية جاية ، أو أولريدي إنت ف المشكلة
لكنك مش حاسس بفقد الأداء أو بـ أي حاجة غلط ف جهازك
دا نتيجة قلة خبرة و عدم دراية كاملة بالتفاصيل و القوة الفعلية للقطع بتاعتك
----
الفكرة كلها بتبقى إن الأخ مش عارف يبيع الجهاز غالي ، هي دي قدراته 🙂
لإنه لو ركبله باور نضيف و كونفرت أصلي و مشي صح ، التكلفة هتعلى
فيقوم يعمل ناصح و يبيعهولك بالشكل دا و يلعب ف الكارت
أو حتى لو ملعبش فيه و إعتمد ع الصدفة و الحظ أو أي شئ
و يقولك أهو إشتغل خلاص .. و أرخص سعر ف السوق يا باشا و قرب قرب
الناس دي التيست بتاعها إن الجهاز يقوم باور فـ مش هنعتب عليهم ف الموضوع دا أوي
---
و تلاقي خرافات ع إن ال 80 بلس دي حاجة بتشقلب الباور
و بتخلي الباور ال 280 يتفوق ع ال 500
و هما أصلاً مش فاهمين يعني إيه 80 بلس و لا إيه لزومها أساساً
و هتلاقي كلام عجيب كتير بيتردد
طيب إنت كـ تاجر جاهل أو معدوم الضمير ، أو أياً كان حالك
عاوز تلبس حد ف جهاز ب 3000 فيما فوق
عشان تثبت إنك أرخص سعر و تطلع مبيعات كتير و بتاع
و ف الأخر يولع العميل بجهازه ولا بتسأل فيه !
و تقوله الضمان ع عيوب الصناعة و بلا بلا بلا
و بيطلع ف النهاية دا سوء استخدام منه و خلاص
مع إنك ف الأساس مديله تركيبة غلط و فيها مشاكل !
----
بيوصلنا سكرينات و فضايح من صفحات للأسف كبيرة و معروفة
العميل إللي كارته يوصل 85 جوا جيم مش فير مارك !
و الشركة تقوله عادي مش هبدلك الكارت إلا لما يكون بايظ لكنه كدا طبيعي
و ناس تانية شارية كروت ماركة الكلب المجهولة و الشركة بتقنعهم إنها براندات أصلية
و منتهى قلة الأدب سواء ف أسلوب التعامل ، أو ف الوعي إللي زيرو أصلاً
----
طبعاً مش الكل و ف تجار كتير قمة ف الإحترام و الأخلاق
بس للأسف إللي ظاهر أكتر هو الوحش
-----
الخلاصة /
أي باور ف السوق 320 وات ، يُستحسن يكون 80 بلس جولد فيما فوق
و لازم معاه كونفرت أصلي شيلد محمل ، دي الشروط الأساسية
أخره يشغل كارت زي RX 470 - GTX 1060
مينفعش يشغل كروت إستهلاكها أعلى من 120 وات
أي باور 280 وات ، برضو بنفس الشروط إللي فوق
أخره يشغل RX 460 - GTX 1050TI
مينفعش يشغل كروت إستهلاكها أعلى من 80 وات
دي المقاييس الأساسية إللي تضمنلك أداء مستقر بدون أي مشاكل إطلاقاً
و بكدا هنبقى إللي هو ع الأد بالظبط ف السليم ، لا سايبين براح كبير
و لا خانقين الجهاز و أدائه ، دا المتوسط الجميل
و أي حد يقولك كلام غير دا ، بلح .. اللهم بلغت اللهم فإشهد 😶
----
إحنا وقفنا بيع لما الكونفرتات خلصت ، و قبلها وقفنا بيع لما الباورات المعدلة
لقيناها مضروبة ف السوق كله ، و قعدنا ندور ع حل أحسن يخدم الناس
مع إننا خسرنا مبالغ مش قليلة و كنسلنا أكتر من 40 أوردر ، لكن ولا فرق
و الحمد لله لقينا بعدها سكة و قدمنا أجهزة بتركيبة محدش ف السوق كله كان بيعملها
و العملاء كانوا مظقططين و كانت دفعة كبيرة لينا
مش مهم نخسر فلوس ، كدا كدا بتيجي ، المهم الضمير و المصداقية ف التعامل
المهم تبقى فاهم مش مجرد حد واخدها بيع و شطارة ، دا مجال و له إحترامه يا بشر
-----
لو الكلام عجبك ، لايك و شير
لو معجبكش ، إعتبره من وحي الخيال ، و لا يمت للواقع بـ صلة
و لايك و شير برضو متبقاش غلس 😃
تعليقات
إرسال تعليق
سيب أستفسارك وهرد عليك يانجم