سؤال لو الإنسان كمبيوتر أو إلكترونيات عموما .. كانت هتبقى إمكانياته ايه !!!
بشوفه كتير جدا متكرر .. و بصراحه معجبنيش و مقتنعتش بأى إجابه
السؤال عميق جدا و مش سطحى إطلاقا .. فـ لازم يترد عليه بشكل منطقى
بس من ناحيه تانيه هوضح جزئيه مهمه جدا قبل ما أبدأ ...
ربنا خلق الإنسان و تحدى بيه الملائكه و الجن و الملكوت كله
خلقه و كرمه و علمه و إداله من المقومات إلى سخر بيها الكون كله تحت رجليه
الإنسان أقوى من الديناصور و الأسد لإنه قتلهم .. و أقوى من طوفان البحر لإنه بينجى منه
و أقوى من الدبابات و الأسلحه لإنه بيدمرها
و أقوى من أقوى شيء .. لإنه إنسان إستثنائى صناعه ربانيه !
فـ الإنسان غير قابل للمقارنه بـ أي مخلوق و أي شيء
فـ عشان كدا هقول وجهة نظرى ف السؤال دا – كـ وصف علمى مجرد مش أكتر
---------------------------------------------------------------
خلونا نقسم الإمكانيات لـ أهم 3 ...
العقل – العين - الذاكره
1 - عقل الإنسان = البروسيسور
أعتقد إن عقل الإنسان .. لو هنقيس ع عباقرة البشر – يساوى بروسيسور 4 كور - كـ أداء مهام متنوعه ف نفس الوقت .. مش كـ فكر و ذكاء – لإن البروسيسور متلقى – معندوش فكر أو ذكاء خاص – و عقل البنى أدم مبدع .. و للأسف ملوش مثيل إلا لو ف المستقبل عملولنا روبوتات بـ ذكاء صناعى كامل مستقل تقدر تتكلم معاك و تنجز و ليها شخصيه مستقله .. غير كدا مفيش حاجه ف الالكترونيات حتى يومنا هذا 7/2018 – ليها مقارنه بالعقل البشرى - فـ عشان كدا هنقارن من ناحية انجاز المهمات فقط .. معتقدش إن ف شخص يقدر يركز ف أربع مهمات و يخلصهم ف نفس الوقت بـ نفس الكفائه – إلا إذا كان عبقرى و متمكن جدا – مثلا مش هنلاقى واحد هيفكر و يبدأ ف كتابه كتاب.. و يفكر ف حل مشكله ف حياته ..و بعدين يفكر هيخرج عيلته فين ..و بعدين هيفكر ف اختراع جديد .. كل دا ف نفس اللحظه و بنفس التركيز و القوه .. صعب جدا طبعا ع اى بشرى .. بس مش مستحيل .. و هنعتمد إن ف شخص كدا .. و هنقول إن البنى أدم العبقري – بروسيسور 4 كور .. طيب موديله إيه .. دى هعتمد فيها أقوى موديل لسه هينزل للأبد و منعرفوش .. لإن البنى أدم هو الى اخترعه و وصله لـ تكنولوجى تنجز بـ الشكل و الكيفيه و القوه دى .. و التكنولوجى دى تحت سيطرته و هيقدر يطورها و يعدل فيها .. يبقى البنى ادم اعلى منه حاليا و أبدا .. فما بالك إيه مجمل الى ف مخه بأه !!!
----------------------------------------------------------
2 – عين الإنسان = الكاميرا
عين الإنسان لو كاميرا .. يبقى هتبقى أعلى ميجا بكسلز لسه هتنزل للأبد و منعرفهاش .. لإن مهما صورت و حتى لو انا مشفتش دا بعينى المجرده بنفس الجوده .. فـ لما اعرضه من خلال الكاميرا نفسها – هشوفه برده !!! طب ما دا معناه انى قادر ع الترجمه لكن مشكلتى الوسيله الى بتعرض .. و دا شغل عقلى مترجم ع العين - الى هي وسيلتى .. زى ما تقول بيحصل أبديت من عقلى لـ عينى و يخليها تترجم حاجات جديده - بس بعد مرورها و معالجتها ع عقلى الأول .. و الدليل ع كدا انك لو شفت صوره معينه لاى شيء اول مره تشوفه و محتاج تدقق فيها جدا .. و جيت بعد كدا تبص عليها حتى بدون عدسه او نضاره .. بتقدر وقتها تشوف و لو بسيط منها و بتقدر تتعرف عليها – بغض النظر هتشوفها كامله بـ أنهى وسيله .. إحنا بنتقدم و الجودات بتتطور جداااا .. ف لازم الابديت الى من عقلنا يحصل لعيوننا عشان تواكب .. زى ما بتاخد وقت كدا اما بتصحى من النوم عشان تواكب النور و تقدر تفتح عينك .. و الميزه ان ربنا خالقلنا عين قابله للتحديث للأبد .. مفيش حد عينه بتشوف حاجات معينه و حاجبه الباقى مثلا ..
و كونك استخدمت وسيلة للرؤيه .. دى ما هي الا مساعده لـ الأساس – و الدليل انك لو معاك كاميرا بـ أعلى جوده و انت كفيف مش هتشوف .. لكن لو معاك عينك بس و مفيش كاميرا .. هتشوف كتير من الصوره حتى لو مش كلها .. فـ الأساس عينك و هي أعلى كاميرا هتنزل ع وجه الأرض ...
------------------------------------------------------------------
3 - ذاكرة الإنسان = الهارد
للأسف كان نفسى أقول عليه لا نهائي من الذكريات .. لكن لحكمه ربانيه.. ذاكرتنا الى فيها ذكرياتنا و مواقف حياتنا و كل حاجه – محدوده جدا .. و فيها نسبتين كارثيتين .. إنها متناسبه عكسيا مع الكبر ف السن – كل ما نعجز – كل ما هننسى و يجيلنا زهايمر .. و دا لإن الخلايا بتشيخ و تفقد قدرتها ع النشاط .. و متناسبه عكسيا كمان مع العباقره الأكبر فـ الأكبر .. يعنى ممكن تلاقى حد ذكى ذاكرته اقوى من حد ذكى جدا .. اقوى بمراحل من حد عبقرى .. و هكذا .. و معرفش ايه السبب تحديدا ف كدا .. هل العلم بيدمر الذكريات .. هل الذكاء عشان يستوطن بيحل محل حاجات تانيه !!! معرفش .. بس نقدر نقول إن عقل الإنسان قياسا ع هارد تيرا – ممكن يشيل 300 فيلم بجوده متوسطه .. و متوسط زمن كل فيلم ساعه و نص .. يعنى حوالى 36 ألف ساعه !!! لا مقدرش أقول كدا للأسف - لإن إنت لو عمرك 45 سنه .. قمة النضج و الصحه ..مستحيل تكون فاكر و مخزن 36 الف ساعه من عمرك – طيب هنقسم ع 2 .. هنقول هارد 500 .. بمعدل 18 ألف ساعه ! برده لأ .. طيب هنقول هارد 250 .. بمعدل 9 ألاف ساعه .. كتير برده - طيب هنقول هارد 125 .. بمعدل 4500 ساعه .. برده كتير .. طيب هنقول هارد 62 جيجا .. بمعدل 2250 ساعه .. يعنى تقريبا 90 يوم – شهر و نص .. متهيألى كدا منطقى الى حد ما .. ممكن نلاقى حد فاكر شهر و نص من حياته .. متصل او متفرق .. المهم فاكره بكل تفاصيله بكل حاجه حصلت فيه .. ممكن .. مش مستحيل .. مع وجود بعض الاستثنائات ف الجانبين .. سواء شخص مصاب بـ النسيان منذ الصغر – و دا بـ ينسى كل حاجه ف اى وقت .. او شخص تانى حاد الذاكره جدا و مبينساش هفوه ... لكن قياسا ع المتوسط الطبيعى .. فـ هتبقى الذاكره مجرد هارد 62 جيجا ...
--------------------------------------------------------------------------
لو الكلام عجبك .. لايك و شير
لو معجبكش .. إعتبره من وحى الخيال .. و لا يمت لـ الواقع بـ صله
و لايك و شير برده .. متبقاش غلس 😃
تعليقات
إرسال تعليق
سيب أستفسارك وهرد عليك يانجم