التعدين و أزمة كروت الشاشه
مبدئيا انا عمري ما اشتغلت تعدين..
و اتضريت ف شغلي جدا من موضوع غلاء الكروت بسبب التعدين..
لاني جيمر قبل ما اكون ببيع.. يعني جوا الموضوع زي الاغلبيه و مش مستفيد اطلاقا
و لا عارف احدث جهازي...
بس لو هنتكلم ب عقل شويه...
الاسعار غليت لكل الهاردوير عموما.. اكتر من مره
مرتين قبل التعويم.. و 3 مرات بعده لغاية الان
و الله اعلم ب الي جاي
و المرات دي كانت مش مبرره ولا مفيده حتي لفئه من المستخدمين بعينها..
دي كانت نفخ ع الكل.. و نظام اذا كان عاجبكم...
محدش نطق.. و الكل تقبل الوضع و سكت
خلاص.. امر واقع رضينا بيه
ليه دلوقتي الحرب كلها ع المعدنين و بنقول انهم سبب الغلاء..
حاسس انهم لبسوا ف حيط و بقوا كبش فدا ب الاونطه !!!
و لو ع حته انهم السبب ف الغلاء.. لإنهم استهلكوا كمية كروت كبيره
و بيشتروها بأى سعر و لو أغلى من تمنها -- بلا بلا بلا
.. ف دا مش غلط و لا عيب !!!
قصة ان حد يشتري اي شئ عموما ب تمن اغلي من قيمته
لمجرد ان الشئ دا مش متوفر كتير و هو محتاجه بسرعه
دا طبيعي و بيحصل و موجود ف كل شئ -- مش الكمبيوتر بس
يعنى شئ مش مستحدث علينا و لا يستحق الاندهاش
و أى حد لو معاه فلوس و قادر يشترى - و شغله واقف ع حاجه معينه
هيدفع فيها اى مبلغ لمجرد انه يجيبها و ينجز حاله -- و كداب الى يقول عكس كدا
ايا كان بأه هيجيبها يشتغل بيها ايه -- لو بالنسبه للكروت
رندر - جيمز - تعدين ... إلخ ... بإختلاف الاستخدامات
تخيلوا كدا لو نفس الى حصل من المعدنين حصل من الجيمرز مثلا
و الناس كلها هجمت ع الكروت بشكل كبير و خلصتها
كان هييجى مثلا وقتها بتوع الرندر يشتموا الجيمرز لانهم اتسببوا ف نقص و غلاء الكروت !!!
طيب هل وقتها كان الجيمر هيحسوا انهم عملوا شئ غلط !! و لا هما ناس عاديه اشترت و بس !!!
و العكس صحيح - لو كان سبب تضخم الازمه - الناس بتوع الرندر - وقتها كان المعدنين و الجيمر
هيشتموهم و يتهموهم بالجريمه الكبرى دى !!! و دا طبعا مش منطقى خالص ...
الغلاء مش بسبب المعدنين ف المطلق.. الغلاء من قبل المعدنين ب كتير.. و بيهم او من غيرهم..
الحاجات بتغلي و بدون مبرر.. ع الاقل الي بيحصل بسببهم معروف هو ليه..
و بعدين انا مش فاهم فين جريمة المعدنين.. دول ناس اشتروا كميات كتيره من كروت الشاشه
و كانوا بيرضوا بأى سعر و يشتروها بيه - مما تسبب ف نقصها من السوق و ارتفاع سعرها..
ما دا يا بشر الطبيعي ف اي سلعه.. اي منتج بيبقى عليه سحب ف السوق..
شركته بتغليه بعدها و تحدد كمياته..
و مهما غلى كلنا بنشتريه برده و بنرضى ب الامر الواقع
و مش بنشتم الناس الى استهلكوه و نقول هما السبب ..
الكلام دا ف كل حاجه اصلا..
الناس مشتروش بغرض الاحتكار و انهم يبوظوا السوق. الناس مستخدمين عاديين..
و اشتروا عشان يشتغلوا .. مش عشان يكدرونا
و السوق عموما عرض و طلب و حق كل واحد يبيع او يشتري ب اي سعر يعجبه..
طالما السلعه مش اكل ولا شرب و لا ينطبق عليها الاحتكار كـ حرمانيه أو كـ عرف مجتمعى
انا حقي طبعا العب و اشتري كارت عالي بسعر مناسب..
و حقى كـ مخرج أعمل رندر و مونتاج بـ كارت كويس و الاقيه متوفر ف السوق بكل الانواع..
لكن رغم كل دا و انصافا للحق.. مش من حقى اطلاقا اهاجم فئه مستهلكه زيها زيى تماما
و اقول إنها سبب مشكله -- لانهم برده من حقهم يعدنوا و يكسبوا فلوس زى حقوقى ف الرندر او الجيمز
من الاخر الشركات المصنعه إستغلت هجوم المعدنين ع الكروت
و فرضت سطوتها الكامله - و ساعدها ف كدا الحكومات و المستوردين
روحوا كلموا الشركات و الحكومات و المستوردين !!!
دول السبب الرئيسى ف الازمه يا جماعه
مينفعش نتجاهل الاسباب الاساسيه للمشكله كأننا مش شايفها اصلا
و نمسك ف فئه ملهاش اى دخل ف الازمه
وقتها أبقى ببص ب عين واحده ع الحقيقه و مصر الف ف دايره مقفوله
..............................................................................
لو الكلام عجبك.. لايك و شير
لو معجبكش.. إعتبره خيال ولا يمت للواقع ب صله
و لايك و شير برده.. متبقاش غلس 😃
تعليقات
إرسال تعليق
سيب أستفسارك وهرد عليك يانجم