حل الإشكال .. فك الجدال .. 😃
كلاكيت تانى مرة بـ شكل محدد أكتر ...
عاوز أشترى جهاز للجيمز و لـ الجرافكس .. أنا محتار !!!
الوورك ستيشن أفضل - و لا الكور بـ أجياله أفضل ؟
لا .. إوووعى تجيب الوورك ستيشن .. دا زبالة إبعد عنه طبعاً
دا حتى إسمه وورك ستيشن .. لا هو جرافكس ستيشن أو جيمز ستيشن
يعنى مش هيشغل حاجة خالص 😃
تعالوا نتكلم كـ خبراء و فنيين .. بعيداً عن أى مصالح أو تحيز /
............................................................................
أى جهاز بـ أى فئة أيا كانت .. ممكن يشتغل جيمز و جرافكس كويس
و يشغل أى حاجة عموماً .. و ممكن ميشتغلش برضو !
و دا راجع لإمكانياتة و لـ فئتة موجهة لإيه ف الأساس و بتدعم إيه بجانب دا
و سؤال إيه الأحسن ف المطلق .. دا غلط ف حد ذاته
السؤال يبقى .. الموديل س من الفئة كذا .. و لا الموديل ص من الفئة كذا
دى صيغة السؤال الصح و إللى يترد عليها .. غير كدا مفيش سؤال أًصلاً
هيبقى أكنى بقولكـ عربية bmw أحسن و لا مرسيدس ؟ طب فين الموديل يا فندم !!!
فيه موديلات احسن هنا و العكس .. حسب الفئة و الموديل و السعر و ليلة كبيره اوووى ...
و الكلام دا مش معناه دعوة لـ شراء الوورك ستيشن .. إطلاقاً
الوورك ستيشن له مزايا و الكور له مزايا ، و لازم نفهم و نحلل الموضوع بدقة
الكلام الغرض منه توضيح إشكالية و شرح لـ مفهوم الوورك ستيشن مش أكتر
خلينا نتفق إن كون إن شركه ميزت جهاز بـ حاجة .. مش معناها إنه مبييشتغلش إلا هى !
العربيه اللاندروفر كل دعايتها إنها بتطلع قمة أعلى جبل و تتشقلب عليه
بـ طريقة تفكير المعترضين ع الوورك ستيشن .. كدا العربيه دى متمشيش ف شارع
تمشى ع الجبال فقط .. العربية دى متجريش .. دى بطيئة و مخصصة للصحارى فقط !!!
مش منطقى .. صح ؟
الفكره كلها إنى بميزلك منتج بشئ إضافى لمستخدمين معينين
لو عاوزين سيرفر او تشتغلوا جرافكس و رندر .. إشتروا وورك ستيشن
و بركز كل دعايتى ف النقطة دى فقط ...
طيب انا هاخد الجهاز و هخش بيه ع النت و هلعب .. هل مش هيشتغل !!!
هيشتغل طبعاً و بأداء مناسب لإمكانياته زى أى جهاز تانى طبيعى جداً
و بالنسبة لإن حد بيقول عمرك شفت متطلبات لعبة فيها بروسيسور زيون !!!
لا طبعاً .. و لا هتشوف إلا نادراً .. دا طبيعى جداً لإن دى فئة مش موجهه لكدا
متسرحش منى .. مش موجهه لكدا بمعنى تسويقياً
الموضوع هنا تجارى مش تقنى إطلاقاً
لإنى كـ شركه لما أقولك الوورك ستيشن بيشتغل جرافكس و رندر و سيرفر
و أعمله دعاية بـ كدا .. و أنزلهولك ف متطلبات الجيمز و أعمله دعاية بـ كدا
هبيع باقى الاجهزة الكور إزاااااى !!! كدا أنا موتت باقى منتجاتى !
ما كله هيشترى وورك ستيشن و يعمل كل حاجة بيه
و هى دى لعبة الماركيتنج إللى بتتعمل من زمان
تمييز منتج عن منتج و إظهار مميزاته لغرض التجارة مش أكتر
لكن الناس عندنا نسبة كبيرة منهم بتحفظ مش بتفهم للأسف
-----------------------------------------------------------------------
كـ مثال ...
الاجهزه الكور تو ديو .. ممكن تشغل جيمز و جرافكس بشكل خفيف
بس طبعا لو ركبتلها كارت زى ال 1050 هيحصل بوتل نك و مش هتستفيد
لا بـ أداء جهاز و لا بـ قوة الكارت ...
هل معنى كدا إن كل فئة الكور .. دى مش موجهة للجيمز و الجرافكس !!!
هل دا معناه إن سوكيت 775 إللى بـ يركب عليه البروسيسورات دى
نرميه ف الزبالة و منستخدموش !!!
أكيد لا طبعاً .. لكن دا موديل معين ضعيف .. ممكن لو ركبنا كور تو كواد
يدينا أداء أفضل و معقول إلى حد كبير مع نفس الكارت ...
نفس الموضوع لو جيبنا جهاز كور أى ثرى جيل أول و حاولنا نشغل عليه كارت 1060
هيعمل بوتل نيك و مش هناخد أداء كويس .. لكن لو جيبنا كور أى فايف تانى مثلاً
هيبقى أفضل و هكذا ...
و بشكل أبسط و أبسط .. سوكيت ال PCi - EX بتاع كارت الشاشة
بيركب عليه من اول الكارت ال 256 ميجا .. لغاية الكارت ال 11 جيجا
السوكيت بيقبل و يشغل كله .. القصة كلها ف إنت هتركبله إيه !!!
و مينفعش تجيب كارت ضعيف و بنائاً عليه تقول سوكيت ال PCi - EX وحش
عاوز أقول إن ضعف الموديل بالتحديد لا يعنى ضعف الفئة ككل
السوكيت بـ يركب عليه أكتر من 10 موديلات بـ مختلف أنواعهم
مينفعش كون موديل معين ضعيف إنك تمحى الفئة بتاعته ككل
و الأمثله فوق تشرح النقطة دى بكل بساطة ...
-----------------------------------------------------------------------------------
الوورك ستيشن ف منه موديلات كتيرة جداً زى أى فئة
فيه منه ال DDR2 بـ السوكيت القديم .. زى ما فيه كدا ف ال سوكيت 775 ع الكور
و دا شبه إنقرض حالياً
و فيه الجيل الحديث الى DDR3 بـ باص بـ يوصل لـ 1333
و بروسيسور التكنولوجى بتاعته زى ال كور i7 جيل تانى
زى فئة ال dell t3500 و ما يوازيها من الماركات التانية
و فيه الجيل الأحدث إلى DDR3 بـ باص بـ يوصل لـ 1866
و بروسيسور التكنولوجى بتاعته زى ال كور i7 جيل تالت و رابع
زى فئه hp z420 و ما يوازيها من الماركات التانية
و فيه جيل DDR4 .. و بروسيسور تكنولوجى زى i7 جيل سادس و سابع
و دى مقارنة أجيال فقط مش قوة و لا كفائة .. و هكذا بـ التبعية كل الموديلات
يعنى متجبش موديل قديم من الوورك ستيشن و تقولى ع كل الوورك ستيشن وحش
ما دا طبيعى .. لإنه قديم .. و المقارنة لا تجوز عليه إلا لـ إللى ف نفس فئته من الكور
و لو عملت كدا هتلاقى الوورك ستيشن أعلى من الموازى ليه
و كمثال الأجيال القديمة زى ال dell t7400 و ما يوازيها
مقارنتاً بـ الكور تو ديو و الكواد .. أفضل بكتير جداً كـ أداء عام و قيس ع كدا
-------------------------------------------------------------
الناس فكرتها عن الوورك ستيشن إنه جهاز سيرفر لا يصلح للجيمز
و دا الخطأ الشائع إللى كله بيقع فيه .. و البغبغانات بتردد
و أغلبهم ميعرفوش أصلاً يعنى إيه سيرفر و بيشتغل إزاى !!!
و هل طبيعة عمله كـ سيرفر هتعارض شغله جيمز أو حاجه تانى !!!
للأسف كلها خبرات ضعيفة مكتسبة من مراجعات و أرقام ع النت فقط
لا إشتغلوا ع اجهزة وورك ستيشن و جربوها و لا شافوا الجهاز دا طبيعته إيه
و لا أى حاجة ف الزلابيا .. شغالين رزع مقارنات و بنشمارك و خلاص
أنا الريفيوز ع دماغى و الله مش معترض عليها ف المجمل
بس صدقنى التجربة العملية غير خاااالص
الكمبيوتر فيه أكتر من مجرد كلام ع مواقع اياً كان مين الى كاتبه ...
إللى مش فاهمين بيحسسوك إن تشغيل الجيمز خاصية و الشرة بتنزعها مثلاً 😃
----------------------------------------------------
ف كروت شاشة ع سبيل المثال .. البنشمارك بتاعها مختصرة إنك ترميها ف الزبالة
و تلاقيها فاتحة جيمز بـ أداء أفضل من كروت أعلى بـ سنين ضوئيه كـ بنشمارك
عمرى ما هنسى لما صاحبى شغل بيس 17 ع ال low بـ أداء ممتاز
ع كارت 256 ميجا من أيام الفراعنة .. مروحتة بايظة و سوكيت 59 بن !!!
و انا كان معايا كارت hd 5450 اتنين جيجا HD
و معرفتش افتحها بـ نفس الكفائة ع نفس الجهاز .. كنت هتجنن !!!!
لإن كل البنشمارك تقول إن كارتى هيشغلها و كارته مش هيفتحها أًصلا !!!
و أمثلة زى دا كتير عدت عليا خالفت البنشمارك 180 درجه
من وقتها إقتنعت جداً إن التجربة العملية عالم تانى خالص
و إن البنشمارك و المواقع حل سهل و كويس إلى حد ما .. لـ المبتدئين
و أنا مش بطلب منك طبعاً تروح تجرب كل حاجة لإن دا هيبقى صعب جداً
لكن بطلب منك تاخد من البنشمارك كل إللى هيفيدك كـ معلومات و مقارنات مبدأية
لكن متسلمش بيه ف المطلق إلا لما تجرب عملياً و تجزم أى شك بـ يقين
متهيألى دا منطقى أكتر ...
--------------------------------------------------------------
خلصنا الجدل التقنى .. تعالوا نتكلم عن نقطة الاختيار
المقارنة دلوقتى سعر مقابل أداء ...
ف وجهة نظرى أقل جهازين وورك ستيشن تشتغل عليهم حاليا
عشان تاخد أداء كويس ف الجيمز و الرندر و الجرافكس عموما
و دى أقل حاجة .. فيه إمكانيات أعلى من نفس الأجهزة
لكنى حاطط حد أدنى ...
يكون / DELL T3500 + X 5660
و ما يوازيه أو أعلى من البروسيسورات و الموديلات من نفس الفئة
البروسيسور دا بيبقى 6 كور كاش 12 .. تردده 2.8 جيجا
كـ تكنولوجى زى الجيل التانى من ال i7
باور 525 وات .. مكانين للفيجا ع البوردة
هتقدر تحدثله كروت شاشة لغاية ال 1060 و ما يوازيه ...
مفيهوش usb 3 أو sata 3 ...
ع فيجا متوسطه يقدر يفتح أحدث الجيمز ع هاى 1080 بدون مشكلة
و ف إختيار أحدث شويه / HP Z420 + E5 1620
و ما يوازيه أو أعلى من البروسيسورات و الموديلات من نفس الفئه
البروسيسور دا بيبقى 4 كور كاش 10 .. تردده 3.6 جيجا
كـ تكنولوجى زى الجيل التانى من ال i7
و ف منه إصدارات أعلى من الجيل الرابع i7
باور 600 وات .. مكانين للفيجا ع البورده
هتقدر تحدثله كروت شاشه لغايه ال 1070 و ما يوازيه ...
فيه sata 3 و usb 3
ع فيجا متوسطه يقدر يفتح أحدث الجيمز ع الترا 1080 بدون مشكله
و فيه أجهزة أعلى بكتير جداً من دى
و تتفوق ع أجيال حديثة زى بعض من الجيل التامن و جيل الرايزن التانى
لكنى هنا ذكرت أدنى المواصفات إللى ممكن تشتغل عليها يعنى
الإختيار ليك ف النهاية ...
إنت إحتياجك إيه و هتعمل إيه ع الجهاز ؟
هل ف حدود المبلغ دا قدامك إختيار من الكور بـ نفس القوه و الأداء ؟؟؟
هل إنت مرتاح أصلا لـ تجربه الوورك ستيشن و لا لأ ؟
-----------------------------------------------------------------
لو إنت إستخدامك جيمز أونلاين فقط .. و أخرك تلعب بيس أو فيفا
و ميزانيتك ف حدود 3000 - 4000 جنيه .. يبقى الوورك ستيشن إختيار مش مناسب ليك
ممكن تجيب حاجه APU بـ المبلغ دا و هتديك أداء كويس جداً
بمعنى جهاز من AMD و فيه كارت شاشة قوى مدمج فى البروسيسور زى
موديلات ال A10 مثلاً
لو إنت شغال رندر و جرافكس فقط و عاوز حاجة تأدى الغرض للشغل
يبقى طبعا الموجه لكدا بـ شكل أساسى هو الوورك ستيشن و هو النجم الوحيد
و تجيبله كارت كوادرو بـ سعر رخيص .. و هتاخد أفضل أداء عملى
بـ سعر مناسب جدا .. و هتشتغل بدون توقف
لو إنت هتلعب و هتشتغل ، شوف الفئات المتاحة من الزيون و ما يماثلها من الكور أى
و إحسبها بنائاً ع السعر و الاداء و المميزات و إختار وقتها الأنسب ليك
............................................................................
ف وجهة نظرى بفضل الأجهزة الوورك ستيشن و تجربتى معاها ممتازة
بحسها حاجة قوية كـ ماتريال و كـ أداء عام و كـ تبريد .. و حتى مشاكلها قليله جدا
كان عندى w3550 و بعدين حدثت و جيبت x5660 و بعدها جيبت w3690
كل دا ف فئة ال Dell t3500
و بعدين حدثت السوكيت تماماً و جيبت
معالج E5 1650 V2 ...
و دا أدائه أفضل من ال i7 جيل رابع و i5 خامس و سادس
و أعلى منهم كـ بنشمارك كمان
مرفق صور لـ تقييم المواقع .. لمحبين البنشمارك 🙂
.................................................................
.............................................................................
للكل حرية الإختيار حسب عامل الراحة النفسية أو الإحتياج أو القدرة المادية
لكن محدش يفتى و يقول معلومه خطأ أو يضل حد بيسأل أو يهاجم و خلاص
إفهم .. فكر .. ركز .... و بعدين إتكلم 🙂
.....................................................................
لو الكلام عجبك .. لايك و شير
لو معجبكش .. إعتبره من وحى الخيال و لا يمت لـ الواقع بـ صله
و لا يك و شير برضو .. متبقاش غلس 😃
تعليقات
إرسال تعليق
سيب أستفسارك وهرد عليك يانجم