إيه هى الاجهزه الوورك ستيشن .. و إيه الفرق بينها و بين التجميع ؟
سؤال من حد /
........................................................
يعنى إيه جهاز وورك ستيشن ؟
الوورك ستيشن دى اجهزه تابعه لشركه إنتل
بتيجى إستيراد من الخارج - مفيش منها جديد ف مصر إلا نادراً
تخصصها و توجهها الاول - إنها تشتغل ف الرندر و المونتاج و الجرافكس
و إنها تشتغل كـ سيرفرات بدون توقف لفترات طويله
لإنها بتبقى مميزه بتبريد كويس و مكوناتها كلها متوافقه مع بعض
بتبقى مزوده بـ أماكن كتير لـ الرامات .. و بيبقى فيها باور عالى
و الماتريال بتاعتها ككل كويسه جدا و بتستحمل الجهد المتواصل
يعنى لو استخدامى غير الحاجات دى مجيبش وورك ستيشن
لا طبعا - هاتها برده دى جميله 😃
...........................................
عموما - مفيش فئه من الأجهزه حكر ع شئ و متشغلش إلا هو
كله يشغل كل حاجه .. حسب إمكانياته طبعاً
لكن حتة إنى أميز فئه بميزة معينة - دا مينتقصش منها ف الإستخدامات التانية
دا دعاية و تسويق مش أكتر ...
لكن الشائع بالخطأ عن الوورك ستيشن طبعاً - إنه بتاع رندر و سيرفر فقط
و متجيبوش دا وحش - بلا بلا بلا .. دا طبعاً كلام غلط جداً
بعيد عن عدم وعى أو إختصاص نسبة كبيرة من الناس
و إنهم بيفتوا بأى كلام بيتردد و يتنقل من النت و خلاص
لكن ف 3 أسباب مهمين جداً - دول إلى كونوا الصورة السلبية دى
1 - إن البروسيسورات الزيون - كتير منها تردده بيبقى قليل
ع حساب إنه بيحطلك كورز و كاش كتير ...
دا بيديك أداء عالى ف الرندر و الجرافكس - لكنه ضعيف ف الجيمز
لإن الجيمز بتحتاج ف المقام الاول - الترددات العالية
و مفيش لعبه مثلا هتحتاج 24 ميجا كاش - او 16 كور
او 2 بروسيسور يشتغلوا مع بعض .. دا ملوش لزمة كـ جيمنج إطلاقا!
مع العلم إن ف بروسيسورات زيون ترددها أعلى من الكور مما يعادلها
لكن الشائع هو البروسيسورات اصحاب التردد القليل ...
2 - نسبه كبيره جدا من الأجهزة الوورك ستيشن إللى بتتباع بتبقى مهلوكة
أو بتبقى فرز تانى مع وجود بعض العيوب الصناعية
و دا بيخلى أى حد يشترى جهاز و يواجهه مشاكل أو يبوظ منه
يبعد تماماً عن الفئة دى و يصدر إنطباعات سلبية عنها
3 - أجهزه وورك ستيشن كتير ف السوق - إصدارات قديمه
بيستغل أصحابها عدم وعى الناس و يبيعوها بسعر غالى
فـ تلاقى حد مشترى جهاز دى دى أر 2 - ب 3 ألاف جنيه مثلاً
و دى جريمه كونية أساساً - ف تيجى تلاقى نفسك منحصر ف وندوز إكس بى
و عايش ف سنه 2005 - و مش عارف تتحرك - رغم ‘نك دافع مبلغ محترم
ف تقفل طبعا من الوورك ستيشن كله و تفتكر إنه كله قديم جداً
غير كدا الوورك ستيشن جهاز زى أى جهاز
لكنى وضحت أسباب الإنطباعات السلبية عنه
....................................
ف أجهزه وورك ستيشن بتوفرلك موازنه بين أداء جيمنج و رندر - بشكل ممتاز
و بتبقى جيبت جهاز وفرلك كل حاجه محتاجها كـ شغل أو لعب
و ف أجهزه تخصصها رندر أو سيرفر فقط .. و بتبقى مش جيدة أوى ف الالعاب
بس بيجيبها المهندسين عشان ينجزوا شغل معين
أو بيجيبها إللى عاوز جهاز سيرفر ميفصلوش خالص
و ف أجهزه أقوى من ما يعادلها كتير ف الكور و بتبقى ممتازة كـ جيمنج
و دى هتلاقيها الفئات الحديثة و الغالية شوية من الوورك ستيشن
.................................
غير كدا الأجهزة الوورك ستيشن فيها معادلة ممتازة بين السعر مقابل الأداء
أهم حاجه إنك تختار المواصفات بتركيز حسب إحتياجك
و تتأكد إنه فرز أول و تعمل تيست بشكل كامل مع مهندس أو تشترى من حد ثقة
----------------------------------------------------------
إيه الفرق بين الوورك ستيشن و التجميع ؟؟؟
التجميع دا جهاز إنت بتجمعه قطعه قطعه .. بورده - رام - بروسيسور .... إلـــــــــخ
و بتوفق المكونات ع بعضها .. و تجيب كيسة و تركبهم جواها
بيبقى ماركات و موديلات مختلفة و إنت بتنسقها مع بعض
بتقدر تغير فيما بعد أى قطعة فيه حسب توافقها مع باقى الإمكانيات
كله بيبقى قابل للتغيير ...
الوورك ستيشن مش بيتجمع - هو جهاز بييجى من شركته ع بعضه ماركة واحدة
مبتقدرش تغيرله البورده تحديداً -- و دا ف كل الموديلات غالبا .. ثابتة مش بتتغير
لو باظت بتجيب أختها من جهاز زيه بالظبط ...
و الباور صبلاى و الكيسة الخارجية - ف بعض الموديلات تقدر تغيرهم
اما الرام و الهارد و البروسيسور و كارت الشاشة .. تقدر تغيرهم ف كل الموديلات
و تستبدلهم بأى حاجه تانى من إختيارك حسب توافقها مع باقى الإمكانيات
أهم مميزات التجميع /
حريه تغيير كامل المكونات بـ أى ماركة
توافره جديد بـ العلبة و الضمان
وجود إصدارات حديثة منه بإستمرار ف السوق
أهم مميزات الوورك ستيشن /
توافق المكونات و التبريد الجيد
السعر الإقتصادى
قوة الباور و تعدد المنافذ ع البوردة
........................
كـ أداء و قوة مين الأحسن !!!
دا راجع للإمكانيات بتاعة كل فئة .. سواء وورك ستيشن أو تجميع
حته مين أحسن .. أو الوورك ستيشن ف المطلق أحسن أو أوحش .. دى غلط جداً
قارن موديل معين بـ موديل معين .. غير كدا مينفعش
لإن كل موديل قدامه ما يوازيه من الفئة التانية
فـ إنت هـ تجيب مواصفات كل موديل
و هتقارن من حيث الفئة كـ تكنولوجى و كـ سعر
و تحدد إختيارك عشان تعرف مين الأفضل فيهم ...
...............................
لو الكلام عجبك .. لايك و شير
لو معجبكش .. إعتبره من وحى الخيال و لا يمت للواقع بـ صلة
و لايك و شير برضو .. متبقاش غلس 😃
تعليقات
إرسال تعليق
سيب أستفسارك وهرد عليك يانجم