ال SSD هيفرق معايا أوى لو إشتريته ،سؤال محير 😃
الموضوع بسيط .. تعالى هقولك المختصر المفيد
----
وحدات تخزين ال SSD حاليا رخصت جداً
ولو معاك 400 جنيه .. هتقدر تشترى هارد 128 جيجا
و لو معاك 650 جنيه .. هتشترى هارد 240 جيجا
و دى حاجة ممتازة .. و لازم تستغلها قبل تغيير الأسعار
ثم إن ف وجهة نظرى أى جهاز بدايةً من الجيل التالت و ما يوازيه
يفضل تجيبله SSD عشان تحس بـ قوة إمكانياته و تستغلها صح
نزلت إشتريته ، خلاص جيبت الهارد !
تعالى بأه هعرفك أنا خدمتك إزاى 😃
--------
الوصف العام /
ال SSD .. بيبقى حجمه الخارجى 2.5 إنش
و دا حجم أصغر من ال HDD العادى .. إللى بـ يبقى 3.5 إنش
ال SSD مُصنع من مواد بلاستيكية أو معدنية رقيقة و وزنه خفيف جداً
بيبقى بين 75 جرام و 125 جرام .. تقريباً
ع عكس ال HDD إللى من المعدن و وزنه تقيل
و بيبقى بين 300 جرام و بيوصل لـ 1000 جرام .. تقريباً
و ف الغالب كل ما مساحته تزيد ف وزنه بيبقى أتقل
--------
ال SSD بيركب ع أى لابتوب .. لإنه نفس حجم و مواصفات هارد اللاب
ال HDD بيركب ع ال PC فقط
ال SSD إستهلاكه لـ الكهرباء قليل مقارنةً بـ ال HDD
و ممكن يشتغل ع أى وصلة USB بدون إحتياج باور خارجى
ع عكس ال HDD إللى لازمله باور خارجى عشان يشتغل مع الـ USB
-----
طبعاً كلامى ع ال HDD الكبير بتاع الديسكتوب فى النقطة دى
مش بتاع اللاب ، هارد اللاب ال HDD بيشتغل ع أى وصلة عادى
بدون باور ، و يعامل نفس معاملة ال SSD العادي
ك حجم و كإستهلاك ، بعيداً عن السرعة
---
كل الهاردات دى بتشتغل ع مخرج الساتا العادى ف البوردة بإختلاف سرعته
سواء ساتا 2 أو 3 .. و يستحسن ف ال ssd يكون بوردتك ساتا 3
و أغلب البورد الحديثة بتبقى ساتا 3 و بتدعمه بأعلى السرعات بدون مشاكل
------------------
المميزات و تقنية العمل /
ال SSD زى ما واضح ف الصورة .. عباره عن شرايح صغيرة ع البوردة
حاجه كدا شبه الفلاشة كـ مثال .. مفيهوش إسطوانة و لا إبرة داخلية
أما الهارد ال HDD .. ميكانيكى العمل
زى ما شرحنا قبل كدا ف موضوع الهاردات
إنه هارد بيشتغل عن طريق دوران إسطوانة داخلية ع إبرة صغيرة
حاجة كدا زى الجرامافون و جهاز الإسطوانات بتاع زمان .. كـ مثال
و زى ما واضح من الكلام المبدئى عن التقنيتين إن ال SSD أسرع
لإنه لا بيحتاج إحتكاك و لا دوران مكونات معدنية و لا أى حاجة
مجرد شرائح ع بوردة بتشتغل بـ تكنولوجى فقط
------------------
و كـ تحديد أكتر .. ال SSD .. الفئة العادية المتداولة
بيبقى أسرع من ال HDD بحوالى 10 - 20 مرة
و الفئات العليا منه زى ال M2 - NVME .. إللى ف الصور شبه الرام كدا
و دى إصدارة جديده و تطوير ل ال SSD
بتوصل لـ 30 مرة تقريباً أسرع من ال HDD !
و ليها مخرج معين ع البوردة بعيداً عن كابلات الساتا
موجود ف الاجهزة الحديثة فقط
------------------
و طبعاً فرق السرعة دا هتشوفه ف أداء حاجات كتير
لو هتستخدم الهارد الإستخدام الشائع و تنزل عليه وندوز و برامج
فـ هتلاقى الوندوز و الجهاز بيفتحوا و البرامج بتحمل ف ثوانى
ع عكس ال HDD إللى ممكن يقعد من 40 ثانية ل دقيقة و نص يفتح الجهاز
------------------
كذلك النقل من عليه أسرع من المعدل بتاع ال HDD
بس النقل من عليه لـ هارد زيه برضو ، عشان تحس بالفرق الملحوظ
كمان لو حطيت عليه جيمز هتلاقي اللودنج إسكرين أسرع عن الطبيعى
بإختصار .. أى حاجة ع الهارد دا هتعملها
إضرب ادائها و سرعتها ف 10 أضعاف فيما فوق
و دا فرق جوهرى و يستاهل دفع فلوس فيه
--------
المعضلة الدائمة ، نقول عليه هارد طيب و لا لأ ؟
لإن بعض المحنكين بيمسكوا فيها و يتريقوا ع الناس
بص ، إحنا مصطلح هارد اتلزق معانا ع انه وحدة التخزين بشكل عام
مش بنبص للترجمة الحرفية لكلمة هارد انها قرص صلب
فـ علمياً مصطلح هارد ssd ، مصطلح غلط طبعاً لإنه مش هارد
لكن عملياً ، كله فاهم إيه هو ال ssd و إنه مختلف عن الهارد
لكننا بنقولها كنوع من الاستسهال و الوصف بشكل عام مش اكتر
فـ لو صاحبك قال هارد اس اس دي ، عادي هو مغلطش
و فاهم جداً ان دا حاجة تاني ، فهمه بالراحة و متحفلش عليه
عشان بعد كدا يقول ssd بس ، و ميغيرش معنى الجملة
-----
فيه ناس دايماً بتشتكى إن جهازها جيل حديث و إمكانياته عالية
لكن ف بطأ غريب و غير مبرر ف الأداء بشكل عام
و دا بيبقى فى أوقات كتيرة بسبب الهارد ال HDD
إللى بعتبره ف التجميعات العالية ف حد ذاته بوتل نك مع الجهاز
و حرام تجيب تجميعة ب 4000 مثلاً فيما فوق و متجيبش هارد SSD
يترجملك قوة التجميعة دى ف الأداء
-----
كمان ال SSD مش بيجيله المشاكل بتاعة الهاردات العادية
بنسبة كبيرة جداً ، يعنى لا هتلاقى عليه باد سيكتور
و لا هتلاقي التقسيم حصل فيه مشكلة زي الهاردات القديمة
هارد بيشتغل ف صمت و سريع و بن حلال
------------------
إيه يعني دي وحدة التخزين المثالية خلاص و نرمي هارداتنا ال hdd
أكيد لا طبعاً ، الحلو ميكملش يا عزيزي ، تعالى أقولك
العيوب /
1 - السعر دا أول شئ طبعاً
إللى رغم النزول الكبير فيه ،يظل غالى برضو مقارنةً بـ ال HDD
كـ مثال / هارد 1000 جيجا HDD بـ نفس سعر هارد 240 جيجا SSD
2 - الهيلث و البرفورمانس .. معرضين لإنهم يقلوا بشكل أكبر ف ال SSD
مش عارف ليه الحقيقة بس هو كدا
كـ مثال / لو هينقصوا ع ال HDD بنسبة 10% ف خلال 5 سنين
على ال SSD هينقصوا نفس النسبة ف سنتين و نصف
و دا تقريباً مش مقياس يعنى
و من خلال تجربتى ل SSD بأكتر من موديل
كله نفس الكلام ف النقطة دى
مع فروق بسيطة حسب الكواليتي و الماتريال ، لكن الكونسبت واحد
------------------
و إللى ميعرفش .. الهيلث و البرفورمانس
فـ دول عبارة عن .. عمر الهارد الإفتراضى و كفائته
و دى حاجات بتتأثر بالإستخدام فترات طويلة للهارد
مثلا إنت واخد الهارد إللى جدك و من بعده والدك كانوا بيستخدموه
حد هيقولى هو كان ع أيام جدي SSD
اقوله أهـ يا بو لسان طويل 😃
------------------
كمان الـ ssd بيتأثر بعدد مرات النسخ ع الهارد و بـ الفورمات
و بـ التقسيمة الصح .. و السيستم إللى عليه
و بـ الإعتناء بيه و المحافظة من أى خبطات أو توصيلات خطأ
هو بيتلكك الحقيقة يعنى و بياخد ع خاطره من أقل حاجة 😃
لكن متقلقش خالص .. أيا كان نسبة الهيلث و البرفورمانس
طالما فوق ال80 % فـ إنت كدا هاردك زى الفل و هيعيش معاك حبة حلوين
و ينصح طبعاً ميقلش عن 95% ف أسوأ الظروف
مش حاجة نادرة يعني الهاردات بشكل عام و لا مجبر تاخد هارد هيلثه قليل
--------
4 - كمان ف صعوبة و أحياناً إستحالة ف إسترجاع الملفات منه لما تمسحها
ع عكس الـ HDD إللي سهل تسترجع منه بياناتك ف ظروف معينة
-----
فباختصار احنا ك طبقة من متوسطة لغاية العالية
عمرنا ما هنستغني عن ال hdd و لا نقدر نلغيه
لان ف معضلة المساحة و السعر و ملفاتنا و ضخامة حجمها
كل دا ال ssd قدامه سنين و سنين ع ما يوفرله بدائل
لكننا نقدر نستخدم ال ssd بطريقة شهابية لعينة
و هي اننا نجيب مثلا هارد بدايةً من 120 جيجا
و نشغل عليه الوندوز و البرامج المهمة
او لو انت غني شوية و هتجيب ssd 500 - 1000
تقدر وقتها تحط عليه ملفات شغلك المهم و كم لعبة بتلعبها دايماً
بحيث تاخد افضل اداء برضو
لكن ال hdd لا غني عنه ، فـ راجع موضوع الهاردات من البوست المثبت
و شوف اسرع نوع hdd تشتريه ايه ، و هاته جمب ال ssd
و عيش ب الاتنين زي ما 95% من الناس بتعمل
و انبسط و ادعيلي 😃
-----------
لو الكلام عجبك ، لايك و شير 👍
و لو معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم