إنت قاعد بتلعب !!!
يبني ركز ف مستقبلك ، إنت كبير ع الجيمز و الكلام دا
عالم تافهة العيال بتوع الجيمز دول ، ألعاب ايه و بتاع ايه بس ــــــــ
الجيمز .. تضييع وقت أم تنمية عقلية و مهارات !!!
----
أي نشاط الإنسان بيعمله بأي شكل ، سواء بدني أو عقلي أو حتى كلامي
دا بيأثرع أفكاره و شخصيته و بينعكس على الناس إللى بيتعامل معاها
إللى بيغني بيدخل أجواء الأغنية و يبقى ف عالم تاني
و بيسلي إللي بيسمعوه و يخليهم يتبسطوا
بس ممكن يغني أغنية حزينة و يبكيهم و ينشر جو من الكئابة !!!
إللى بيلعب كورة ممكن يجيب جون و يخلى فريقه ياخد بطولة و يفرح الألاف
و ممكن يضيع بطولة و ينهار حلم فريقه و المشجعين و يخلي الناس تكرهه !!!
و هكذا بتعدد الأمثلة ، إذاً أى نشاط أياً كان نوعه
ممكن يبقى مفيد أو ضار
----
من زمان و لغاية دلوقتي الناس بتلعب ع القهوة
( دومينو و طاولة و كوتشينة )
و العبقري فيهم كان بيلعب شطرنج 😃
و فى البيوت كانوا بيلعبوا بنك الحظ و السلم و التعبان
ألعاب ممتازة و لها تأثير كبير جداً ع الثقافة وقتها
مع إن مش إنت المتحكم الكامل ف مجراها و فيها نسبة حظ كبيرة
إلا أن فيها تفكير بنسبة مش قليلة
----
و برضو وقتها كان ف ناس بتهاجم إللى بيلعبوا الحاجات دى و بتتفه منها
و هما مش مدركين فايدتها و لا إيه عمقها بعيد عن كونها تسلية !
لكن مكنش بالشكل بتاع دلوقتي
لإنها كانت التسليات الوحيدة ف ظل عدم التطور وقتها
و لعبها سهل كمان ، فـ كبار و صغار بيلعبوها و مفيش مشكلة
---
دلوقتي حصل تطور و بقى فيه حاجات كتيرة جداً
تقدر تسميها بدائل التسليات القديمة ، أو تنمية عقلية حديثة
زي الاتاري إللى ظهر ف التسعينات و من بعده البلاى ستيشن
و الكونسولز ، و أخيراً الكمبيوتر
---
الألعاب الإستراتيجية ، تقدر تعتبرها بدائل أفضل لـ الشطرنج مثلا !!!
تخيل إنك قائد لـ جيش كامل و متحكم ف كل شئ بأدق التفاصيل
بتجند محاربين ، بتبنى مصانع حربية تطلع منها دبابات و طيارات
بتحط خطة للهجوم و الدفاع ، حرب كاملة إنت قائدها
الموضوع ممتع بـ الحكي بس ، ما بالك بـ لعبة و تحكم ف كل تفاصيلها !
دا ف حياتك الحقيقية هينمي جواك روح قيادة الفريق
و هتعرف إزاي تبقى مدرب أو قائد ناجح
هتتعلم الصبر و القرار المناسب ف الوقت المناسب
---
الألعاب الأكشن ، تخيل إنك بتشوف كمية كبيرة من الأشخاص ف وقت واحد
و مفروض تركز بعدد معين من الحركات و الدقة ف التصويب
إنك تقتلهم أو تتعامل معاهم بأى شكل
سرعة رد فعل هتتولد جواك بشكل غريب و هتنعكس ع حياتك و تصرفاتك
هتلاقي نفسك بقيت إنسان سريع البديهة
مش بتقف ف مواقف و تتلخم زي الأول ، ردك دايماً حاضر
بدون ما تدرى هتلاقى شخصيتك بتتغير للأحسن
---
الألعاب الرعب ، تخيل إنك محبوس ف بيت مسكون و مش عارف تخرج
و معاك عدد بسيط جداً من الموارد سواء أكل و شرب أو أسلحة
و مطلوب تستخدمها ف وقتها و بنظام و حرص شديد
لإنها لو خلصت هتموت !
أسلوبك جوا اللعبة بتنظيم إستخدام كل الأدوات
و التفكير أكتر من مرة ف كل شئ بتعمله
هينمى جواك الطريقة دي ف التعامل مع حاجات كتير ف الحياة الحقيقية
زي إزاي تدخر فلوسك ، إزاي تتصرف ف المكان و الوقت المناسبين
و حاجات تانية كتير هتتطور ف شخصيتك و هيبقى عندك حُسن تصرف
----
و الأمثلة كتيرة جداً بإختلاف نوع و أسلوب كل لعبة مفضلة ليك
و حاسس إنك عاوز تعيش تجربتها
---
الكلام إللى قلته فوق دا علمي مش مجرد رأي خاص
ودا بيأكده دكاترة كتير جداً ع مستوى العالم
كانوا بيعملوا أبحاث عن تطور شخصية الناس
إللى بيلعبوا جيمز بإختلاف أنواعها
و لقوا بالإضافة لـ إن ف مهارات كتير بتتضاف ليهم
بعد ساعات و أيام من اللعب ، كمان نظرهم و سمعهم بيتحسنوا !
و دي نتيجة كانت غريبة شوية !
لكن لما فسرتها ببساطة منطقياً ، وصلت لنفس نتيجتهم
و هو إن العين لما بتركز ع ألاف الصور قدامها ف شاشة
وظايف المخ كـ الإدراك و غيرها بتنتبه و بتبقى أسرع ف العمل و بتتطور
و كذلك السمع ، لما بتتعرض لأصوات كتيرة جوا اللعبة و بتنتبه ليها
دا بيأثر ع السمع و بيقويه و يخليه أكثر دقة و تحليل للاصوات
زيك بالظبط لما تتدرب ف الجيم
إيدك مش هتبقى أضعف لإنها بتشيل الحديد
مع انك بتجهدها ف وقتها و بتوجعك !
لكنها هتقوى بـ الممارسة و تبقى أقوى بعد كدا
---
و دلوقتي أحدث الجيوش زي الجيش الأمريكي و غيره
بيتدربوا ع ألعاب حربية من أنواع معينة
سواء لعمل تخيل كامل لـ وضع معين ف الحروب
أو لـ تنمية مهارات معينة عند الجنود ، أو لأسباب تانية
و دي حاجة كبيرة جداً لازم نقف قدامها و تبين لنا أهمية الجيمز
----
خلينا نتكلم ف نقطة تانية ، العامل النفسى
زي ما واحد من أفضل المتخصصين ف مجال الجيمز
قال قبل كدا / عمر وحيد ♥
الجيمز عموماً جايزتها حاضرة ، موجودة ف الحال و هتاخدها
هتعدي المرحلة ، هتعلى ف المستوى و تاخد جايزة
هيتكتبلك إنك الفائز و تاخد التحية المستحقة
لو كسبت هتحتفل بإنتصارك ف وقتها و كل مجهوداتك هتتقدر
ع عكس الحياة ، جوايز الدنيا مش حاضرة دايما
ف مكافئات كتير ف حياتنا بتتأخر علينا أوب حتى لو مستحقة
ف هدايا مش بتوصل إلا بعد كتير و وقتها ممكن تكون رغبتنا فيها زالت
و دا كله بينعكس ع العامل النفسي
بيخليك إما متحفز لإنك تبذل أكتر عشان تتقدر
أو خلاص صبرك نفد و مش لاقى تقدير فـ هتبطل تقدم أي شئ
و الجيمز بتعوض النقطة دى بشكل ممتاز
إعمل كذا و هتاخد مكافئتك ف الحال
---
طيب كدا يعني نقعد نلعب ع طول و الجيمز جميلة و مش مضرة
عاوز كدا حضرتك يعني ، لا خالص ع فكرة
كل شئ زي ما وضحت ف الأول ، سلاح ذو حدين
بإيدك تستخدم أى حاجة أياً كانت ماهيتها بطريقة سليمة
متسيبش شغلك أو مذاكرتك و تقعد تلعب
متبيعش عفش بيتكم و تجيب بتمنه جهاز للجيمنج
متستلفش و تتداين عشان تشترى هاردوير
---
إشتغل و حوش و طور و هات حاجة ع أدك
و بكرة هتعمل الجهاز إللى بتحلم بيه بدون ما تأثر ع حياتك بـ السلب
كلنا إبتدينا بأجهزة قليلةجداً ، و واحدة واحدة الحلم بيتحقق
خلي الجيمنج حافز يقويك في الحياة مش يغيبك عنها ويعزلك
خلي تنمية عقلك و مهاراتك خلال الجيمنج
تنعكس ع شخصيتك و تعاملك مع الناس ف الحياة
خليك دليل حي مرسوم قدامهم على فايدة الجيمز
---
و كلمة لـ أي حد بـ يسخر من الجيمرز و الالعاب
أنا عاوزك متتفهش من الجيمز و لا من إللى بيلعبوها إطلاقاً
إفهم فكر ركز ، إعرف كل مجال كويس قبل ما تحكم عليه و لا ع أصحابه
لإنك إحتمال لو قعدت ع أقل جيم حد بيلعبها
بعيد عن معرفتك بـ تلعب إزاى كـ كنترول
ممكن مستوى ذكائك ميعرفش يفك لغز فيها أو يحلله !
ممكن سرعه البديهة عندك تكون زيرو و تصدع من الأكشنات !
كمان إوعى تقول ع الجيمز تضييع وقت أو حرام ، إنت فاهم غلط
إن لبدنك عليك حق ، و إن لنفسك عليك حق
و دا ترفيه بيخليك مبسوط و مفيهوش معصية و لا شئ غلط
---
الجيمز دي كيان عظيم ، مزاج بياخدك لـ دنيا تانية
بـ يبعدك عن العالم ، و بيعيشك ف أجواء و قصة و مزيكا
و حالة كاملة ف عالم موازي
بتنمي عقلك و مهاراتك و شخصيتك ، بتنمي لغتك و إدراكك و حواسك
بتبعدك عن حاجات غلط كتير ، بتعرفك بـ مجتمع و ناس كويسين
لو إستخدمت الجيمز صح و بـ تعقل ، هتبقى إنسان أرقى و أفضل بكتير
بس إوعى تخليها تيجي ع حساب حياتك الشخصية و تعزلك
أو تأثر ع واجباتك تجاه ربنا و إلتزامك بدينك
أو تضرك ف دراستك و شغلك و تضيعهم منك
إفتكر دايماً ، إن كل ما زاد ع حده بينقلب إلى ضده
----
فى مقولة ع الصورة دي بتعجبنى جداً و معناها عميق لـ إلى يركز
(( أنا مش جيمر عشان معنديش حياة ،
لكني إخترت إنى يكون لي أكتر من حياة 🙂 ))
------
الجيمرز مش أغبياء و لا تافهين ، الجيمرز متميزين و عباقرة
قدرهم ، إفهم شغفهم ، إدعمهم و شاركهم
و لو مش هتقدر ، يبقى متهاجمهمش
إللي مش بيلعب جيمز ، دا فايته كتير من متع الحياة 😍
----
لو الكلام عجبك .. لايك و شير 👍
لو معجبكش ، إعتبره من وحي الخيال ، و لا يمت للواقع بـ صلة !
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم