دردشة شهابية ، مع الشهابيين المثقفين الرايقين 😘
إللي ماسكين مج النسكافيه و باصين للسقف زي حالاتي 😃
أما إللي مش بيحب القراية ، نص بطيختك و ع البلكونة لو سمحت
دعنا نهري بـ هدوء ف عالمنا الموازي اللعين
و الأخ إللي ف التالتة شمال هناك ، و هيقولي خليك ف المحتوى
أقوله لا يا أبو لسان طويل ، ما دا برضو محتوى و ليه ناس بتحبه
ثم إني مكمل عادي جداً ف التِك الصريح ، بس دي دردشة مع إخواتشي
إعمل نفسك ميت و متبصش عليها لو عاملالك إزعاج
أو إستهدى بـ الله و روح اقعد ف التالتة يمين و إسمعلك كلمتين حلوين 😛
---------
حوار قديم بس كنت ناسيه و قلت أشاركه معاكم
قوم إيه ، لقيته جاب حوار جديد ، قلت أجي أقعد معاكم و نحكي سوا 😍
من 2017 تقريباً ، بعد قبل بـ حاجات بسيطة
كنت بستكشف ماسورة إللي بيقولوا ع نفسهم (( مهندسين 🤣))
إللي ضربت ف وشنا ، سواء جروبات أو صفحات أو أشخاص
كلهم داخلين فاردين جناحاتهم ، و إحنا بتوع المجال و بتاع
و بنساعد و نقف جمب الكل ، و إحنا معاكم
قلت و الله شئ كويس ، ربنا يكترهم ، و كان عندي حسن نية
جه ف بالي فكرة عجيبة ، عملت حاجة زي التجربة الإجتماعية كدا
و بعتت لكذا حد (( حاجات بسيطة جداً )) ع هيئة إستفسارات
زي مثلاً / عاوز برنامج أنتي فيرس 😃
مثلاً / صفحتي إتقفلت قولي أنشرها إزاي 😛
و حاجات شبيهة لكدا يعني
عملت كدا بـ 2 أكونتات مختلفة + أكونتي الشخصي
الإستفسارات كانت بسيطة و يحلها مبتدئ ف المجال
و هتخلي الشخص دا ياخد مني ضمان لـ الولاء و الحب ليه
لإنه هيبقى ساعدني ف حاجة مش هتضيعله أكتر من 3 دقايق
بس قيمتها عندي كبيرة ، لإنه حل ليا مشكلة !
و النتيجة كانت كارثية ، أغلب الإستفسارات إتشافت و متردش عليها !
بعتت تاني بعد فترة و قلت عادي يمكن نسيوا من الضغط
و برضو نفس الموضوع ، و حتى الأن و مع مرور 4 سنين تقريباً
صوت صرصور الحقل 🙂
و أكيد فيه كتير جداً زيي متردش عليهم
بس الفرق إن هما كانوا محتاجين شئ بجد 🙁
مش زيي بيعملوا تجربة إجتماعية
إستغربت جداً بصراحة و حسيت إني بتعامل مع لصوص الحرب
إللي بيطلعوا ع قفا الشعب ، و ف الأخر نكتشف إنهم سرقونا
بقوا أغنياء ع حسابنا و من فلوسنا ، بدون ما يقدموا لينا أي شئ مفيد
-----------
الهدف من ذكر الموضوع دا إيه
إني بستغرب ع ذاكرة العوام ، إللي زي ذاكرة السمك ، مفيـــــــش !
مش هنلوم شباب سنه صغير و مندفع بلا وعي
أو ناس علمها و خبرتها بسيطة ، و بيجروا ورا أي شئ عليه زحمة
و كل إندفاعهم صياح جاهل ، عادي كلنا كنا صغيرين و بنعمل بلاوي
كل دول بكرة هيفهموا و بإذن الله يبقوا أحسن
دا لو بحثوا عن الصح ، لو بحثوا
ناهيك طبعاً عن أي حاقد و فاشل ، هنعتبره هوا مش موجود أساساً
----------
هتكلم هنا عن أصحاب الشركات أو المحلات أو الوكلاء
إللي مفروض يكونوا واعيين و ناس كبيرة
مش تجار فاكهة ف سوق العبور بـ يشيلوا بـ الكيلو
مع إحترامنا لتجار الفاكهة ، و خصوصاً المانجة ♥
تلاقي الواحد من دول ، جاب ورا و خاف
عشان المراجع الفُلاني عنده عدد كبير من القطيع
و ممكن ينشر بوست أو فيديو يخلي كله يهوهو عليه و يشتمه
فـ يتعاون معاه و يبعتله قطع و بتاع
التاني تلاقيه منبهر برضو من عدد القطيع و بيبعت ع الأساس دا
و كله جاي يقف ف الصف ، و محدش بيبص للمضمون و لا الأصل !
محدش سأل نفسه إنه لو أصلاً كويس ، ليه هيقلق فلان يشتمه !
لو مفيش عليه غبار ، ليه هيضطر يتعاون مع حد سئ السمعة !
و من هنا يأتي السؤال الأهم ، إنتوا ليه بـ تطاطوا ، طن طان طااان 😅
مسخرة بنشوفها و الله من شركات مهزقة ، و وكلاء و محلات مهزقين
و عالم عايشة بـ الأونطة ، بصوت الزعيم 😃
بس الجمهور الغلبان مُغيب و مش شايف ما وراء الكواليس
مش شايف إللي كان فان و بيتعلم من عمو شهاب
النهاردة بيعض فيه
مش شايف مين إنطرد من شغله عشان حرامي و نصاب
النهاردة بيدعي الفضيلة
مش شايف مين بدأ بـ الإسفاف و طلع ع قفا الناس
النهاردة بيتهرب منهم
و غيرها من بلاوي يا أم نياظي ، صحي نياظي عشان تحكيهالوا 😃
-------
بإختصار ، الشركة أو المحل أو الوكيل إللي يتعاونوا مع حد سئ السمعة
أو جديد ف المجال و طلع من تحت الأرض فجأةً ، بدون أصل و لا تاريخ
يبقوا مهزقين و يستاهلوا إللي يحصل فيهم
كان ف وكيل مُضحك جداً لـ براند شهير ف مصر
عمل خناقة كبيرة مع راقصة من البروموترز
و لما المصلحة حكمت ـ و إكتشف إنه أصلاً محتاج راقصة مش مُراجع
بقوا حالياً واكلين شاربين قاتلين نايمين ع قفا الناس سوا 😃
و العميل بيسقف و بيعمل سبسكرايب و لايك للفيديوهات كمان
-----
بخصوص نقطة المساعدات ، و رسالتك ف المجال ، نرجعلها تاني
بيصادفنا ناس كتير جداً و بنساعدهم بإستمرار الحمد لله
إحنا مش بنقول (( معاكم ساعة للرد ع استفسارات ))
إحنا دايماً معاكم و بنساعد و بنرد ع الكل
و يمكن دا هو سر إستمرارنا و كرم ربنا علينا
شطارتي ف تخصصي و مميزات التجميعات و العروض و الحبشتكانات
مش دا إللي مخلي (( شهاب كمبيو )) يكمل ، أبسولتلي
كل دا بلح ، قدام الثواب ف إنك تساعد محتاج و تقف معاه
قضاء حوائج الناس بمختلف الصور و الأشكال
إنك تنشر معلومة تفيد حد و يتداولها ناس كتير
الأمانة نفسها سواء ف التجارة ، أو إلقاء المعلومة و النصيحة
دا شئ عظيم جداً عند ربنا ، و ليه ثواب دنيا و أخرة
إوعى تفتكرها دروشة و مش هتكسب دنيا ، لأ خالص
ربنا هيكافئك برضو بـ مُتع الدنيا ، و بـ الفلوس
عمري ما هنسى العميل إللي كلمني ع الواتس 2 بـ الليل و أنا معرفوش
و قعد يتحايل عليا أرد عليه ، لإني مش بهتم بـ الواتس أوي
و قالي بكرة نازل من محافظتي أشتري الحاجات دي
و إكتشفت إنه كان هيدفع ضعف السعر تقريباً و داخل ع حوار نصب
و حذرته و رشحتله حاجة أفضل و مش من عندي ، و بسعر أحسن
و الراجل كان طاير من الفرحة و عاوز يبعتلي أي فلوس كـ شكر !!!
مش متخيل كم الدٌعا و الكلام الجميل إللي قعد يقولهولي ، و غيره كتير
-----
و أخيراً و بكل إختصار ، حل كل شئ هو إنكم / تتقوا الله
لو الكل إتمسك بضميره و ثقته ف ربنا و مخافش لإنه ع حق
ف الكلمة ، ف التجارة ، ف المعلومة ، ف التعامل
ف إنكم تكونوا رجال أصلاً ، لإن أغلبكم للأسف لا يرتقي لكلمة (( رجل ))
هيبقى الحال أحسن بكتير ، و مش هنلاقي الرويبضة فوق و بيتسقف ليه
هنلاقي الدنيا و ترتيباتها رجعت سليمة من تاني
-----
أنا بتكلم عشان يبقى فيه نموذج للفكرة ، بعيداً عن شخصي تماماً
أي حاجة بعملها ، هي بسيطة ، و ف كتير بيعملوها أحسن مني
الواحد يعتبر صفر ع الشمال كـ قيمة ف الكون دا
و مش بيعمل أي شئ خارق ، أنا مش أكتر من نقطة ف مكاني
بس لو كل واحد ف مجاله ، عمل شئ مفيد أياً كان بسيط
حتى لو شغال بقال ، و إبتسم ف وش حد باعله حاجة
النقطة هتبقى نقطة ضوء ، هتنور و تغير حاجات كتير أوي
لو كل واحد واجه الغلط بقوة و جرأة و إداه ع دماغه
هينقذ ألف واحد ممكن يتضر و عزيمته تتكسر
هينصر ألف عبقري مُحبَط من إن مكانه إتاخد من المنافقين الأغبياء
نقطة المياه بتفتت الحجر ، نقاط الضوء بتتحول لـ نور كبير !
متستهونش بكلمة أو موقف منك ، لعلها تكون الشافية
-------
و هختم بـ كلمات عاجباني من مستر شاهين /
محدش فاهم ، نصهم طرش في الزفة
و كله واحد ، مش فارقة معاهم الماركة
مش فارقة معاهم الطعم ، و مش فارقة النكهة
شاربين العصير ، و هو من غير فاكهة
ما علينا ، ما علينا ، كله ف الزبالة ، و ما علينا
-----
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت لـ الواقع بـ أي صلة 🥺
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم