المُختصر المفيد لقصة (( أمازون مصر )) Amazon Egypt
الحوار مش مُبهر يا جماعة ، ع الأرض مفيش أي إستفادة عظيمة
أو ع الأقل حتى الأن مظهرش شئ ثوري و مفيد للمستهلك
و الموضوع تم تداوله بشكل أوفر جداً من المواقع و الصفحات
عاوزين بـ ربع جنيه مصداقية و إحترافية يا جدعان
مش عشان تمهيد تعاونات مع كيان جديد ، أو ركوب تريند
تعملوا كدا ، عيب و الله ، الناس البسيطة وِرمت منكم 🙁
-------
الزتونة كالتالي /
1 / نفس البائعين المُسجلين ع سوق هيتنقلوا
مع شوية تعديلات ع أنظمة البيع و التوريد
2 / نظام الشحن و التوصيل و أي كلام عن شئ جديد مجاني
هو غير صحيح ، غير صحيح ، غير صحيح
الإسترجاع أساساً فـ العادي من سوق كوم ، بيكون مجاني
و الطلبات فوق الـ 350ج من البائع سوق ، بتكون شحن مجاني برضو
مفيش شئ جديد ، نفس السياسة العادية ف كل حاجة
3 / مفيش منتجات هتجيلك من برا ، زي أمازون أمريكا مثلاً
كل المنتجات الخاصة بـ سوق كوم العادية نفسها هي هي
و مش هتاخد شئ عالمي إلا منتجات Amazon Basics
المتوفرة حالياً ع سوق كوم ، كابلات و غيرها
4 / مخازن أمازون هي برضو نفسها القديمة بتاعة سوق كوم
مع شوية توسعات ، و مفيش أي شئ رسمي لشركة كبيرة
إنها هتعمل مخزن محلي و توفر منتجات عالمية بالسعر العادل
و التسريبات عن بعض الشركات الكبيرة إللي هتتواجد
فـ دول هيعرضوا المنتجات أغلى من سعر السوق ف الأغلب
و بكدا وجودهم مش هيفيدني ، و المحلات إختيار أفضل وقتها
5 / ف شوية وظائف لو حد مهتم ممكن يقدم و يشوف نظامهم
خدمة عملاء و مهندسين و إداريين و غيره
و بس كدا ، أه و الله زمبقولك كدا
بإختصار بدل ما هتخش ع موقع سوق ، هتخش ع موقع أمازون
مش هتلاحظ غير إختلاف الواجهات !
طيب التغيير دا هيفيدك بـ إيه عملياً ؟ لسة منعرفش
---------
كله عنده أمال و طموحات إن منتجات متاجر أمريكا وغيرها تتوفر
و إن خدمة البرايم تبقى بشكل مميز ، و يتعمل عروض و تخفيضات
و حاجات تانية كتيرة ، كلنا نفسنا ف دا أكيد
و كان نفسنا برضو ف كدا من فترة
لما سوق إنضمت للشركات التابعة لـ أمازون ، و كله قعد يتكلم وقتها
لكن كذلك نفس الحال ، ملقيناش جديد ، كان تغيير أسامي فقط
مكنش فيه أكتر من تظبيطات ف سرعة الشحن و خدمة العملاء
أما من ناحية توافر منتجات و خدمات و إشتراكات مميزة
ع الأرض و حتى اللحظة دي ، مفيش أي شئ ـــــــ
-----
لسة بدري شويتين ع الحكم الكامل ، ف خلينا منتسرعش
و الأيام جاية و هنتابع معاكم لو ظهر شئ يخدم المستخدم بجد
-------
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت لـ الواقع بـ أي صلة 🥺
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم