صباح الفل عليكم ، بوست ماكر ف الصباح الباكر ♥
حابب أتكلم عن منتج مشفتش ليه ريفيوهات خالص 🙁
كلامي من مبدأ دعم الشئ الكويس و المنفعة العامة
مش إعلان و لا أي شئ ، أنا معرفش أصلاً مين مسؤل عن البراند 🤔
شركة Philips ، لما رجعت السوق بـ شاشات من فترة
محدش تحمسلها و لا إهتم إصلاً ، و كله ركز مع البراندات المعروفة
و البروموترز ركزوا مع إللي هيدفع أكتر ، محدش بص للمصلحة العامة
فــ طبعاً مش هتشوف و لا هتسمع عن الشاشة ف أغلب ترشيحاتهم 🤮
---------
بـ النسبة ليا الموضوع كان صدفة بـ الأكتر
و حصل و جربت موديلين من البراند دا ✌️
الأول / شاشتي الخاصة / Philips 246E ، شاشة بسيطة خالص
بانل IPS ، و تردد 75hz ، و ريزولوشن 1080p ، و إستجابة 5ms
بعد تجربتي لـ أكتر من شاشة ف نفس الفئة السعرية و المواصفات
من شركات زي / Asus - Acer - LG ، و تركيزي مع درجات الألوان
و الخطوط المتباينة إللي بتظهر ف الشاشة لما تقرب عينك أوي
و تفاصيل اللون نفسه ، لقيت فرق كبير سواء ف الجودة أو راحة العين !
البانل الـ IPS بتاع شاشة فيلبس ، ف حتة تانية
الألوان و الرؤية من الزوايا ، هي الأفضل ف وجهة نظري 👌
تاني موديل جربته هو / Philips 242M8
لا يختلف إطلاقاً ف جودة الصورة و الوضوح و تباين الخطوط
نفس الجودة الرائعة ، مع زيادة بعض إمكانيات الشاشة
و هي إنها بقت 144hz - 1ms ، و باقي المواصفات نفسها تقريباً
------
مهما يكتبولك أرقام و يقيسوا بـ أجهزة ، تبقى عينك هي الحكم النهائي
و أنا من نوعية الناس إللي حاطط منديل جمب الشاشة دايماً
و مش بعرف أشتغل لو فيه ترابة طارت ع الشاشة
دا مرض شهابي لعين 🤪
عشان كدا تركيزي ف التفاصيل و التقريب من الشاشة ، بيخليني أدقق جداً
و مع كتر شغل المونتاج و الجرافكس إللي بعمله
كل الكلام دا بيديني حكم واضح جداً ع أي شاشة بستخدمها 🧐
و الموضوع مش تعود خالص ، لإني بغير جهازي بالكامل كل شوية
و تقييمي بنائاً ع تجارب عملية و مقارنات ، مش مجرد تجربة سطحية
-----
كل دا بـ الإضافة للسعر المناسب ، الأرخص حوالي 200-300 جنيه
عن الموديلات و الفئات الموازية !
مش عارف ليه ناس عاملين منتج بالشكل دا ، و محدش عارفه
و براندات أقل جودة منه ، هي المعروفة و فوق !
سبحان الله ، عشان كدا كان لازم أوضح الكلام دا للأمانة و للدعم 🤝
----------
طبعاً الكلام دا رأيي الشخصي ، و مش معناه إن الباقي وحش
بس دايماً فيه الحلو و الأحلى ، و إحنا بنحاول نرشحلكم الأحسن
لكني شخصياً إختياري الأول ف تجميعاتي ، ف الفئة دي
هي / شاشات فيلبس 🥰
و أي حد بيفَضل منتج تاني ، ليه كل الإحترام طبعاً
أنا بشارككم مج النسكافيه كالعادة مش أكتر ♥
-----
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت لـ الواقع بـ أي صلة 🥺
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم