صباح الفل عليكم ♥
الفترة دي بتصادف رحيل زميل كنت أعرفه من حوالي 10 سنين
كان ماشي بـ سرعة جنونية و مات ف حادثة تصادم
تقريباً عربيته طلعت مقسومة نصين
و بمناسبة أخبار كتير الفترة دي عن حوادث الطرق
قلت أدعيله بالرحمة ، و أقول الكلمتين دول 😥
------
تنبيه للكل ، يا جماعة بالله عليكم السرعة ع الطرق
خلوا بالكم و اتعاملوا بقواعد السلامة المعروفة
الحوادث كترت و الموضوع بقى أوفر الفترة الأخيرة
المُفجع إن الحوادث بقت تحصل ع طرق سريعة بنمشي عليها يومياً
و إحنا رايحين شغلنا و مشاويرنا ، مش طرق سفر طويل يعني 🙁
أطفال و أُسر كاملة بينتهي تاريخها ف حادثة
إنت متخيل أسرة من 5 - 6 أفراد ، كلهم يموتوا ف نفس الحادثة !
متخيل طفل يلاقي نفسه لوحده عايش و أسرته ماتت قدامه !
و سيناريوهات كتير أوي مؤلمة
حوادث الطرق بقت شبح مرعب أكتر من كورونا 🥺
---------
خد الأرقام الخيال العلمي دي /
فيه إحصائيات لـ حوالي 8.500 قتيل سنوياً ف حوادث الطرق !
يعني تقريباً كل شهر بيموت 700 شخص !
يعني يومياً 23 حالة وفاة !!!
و 30% من الضحايا بيكونوا أطفال تحت سن الـ 15 سنة !
بالإضافة لـ حوالي 35.000 مصاب أو معاق سنوياً !
و مصر تعتبر واحدة من أعلى دول العالم ف حوادث الطرق
-------
المسافة بينك و بين إللي قدامك ، 90% من السواقين مش بيهتموا بيها
كلوا بيكبس و يزنق ف إللي قدامه بشكل غبي
أنا لما كنت بنزل بعربيتي و بسيب 5 متر بيني و بين إللي قدامي
كانت الكلاكسات بتخرم دماغي عشان أقرب للي قدامي
و كأني بعمل شئ شاذ و لسة بتعلم السواقة !
مع إن دا الطبيعي و الصح إللي مفروض كله يعمله !
بس تقريباً أنا لوحدي إللي كنت فاهم إنه طبيعي
لغاية ما إتخنقت و مبقتش أسوق داخل القاهرة خالص 🙁
أغلب الحوادث بتحصل من عدم ترك المسافة اللازمة
من السرعة العالية بالعربيات النقل و الميكروباصات
من المشي عكس ، من الإستهتار ، الأسباب كتير أوي
و الراعي الرسمي هو التسرع و الغباء
--------
خلوا بالكم من حياتكم و حياة غيركم ، بلاش تهور و إستعجال
إعرف إن دا إسمه قتل نفس ، سواء لـ نفسك أو لـ أسرتك
أو لـ حد تاني ماشي جمبك ، و ف الحالتين هتبقى قاتل 🙁
ربنا يحفظكم جميعاً إنتوا و كل حبايبكم ♥
تعليقات
إرسال تعليق
سيب أستفسارك وهرد عليك يانجم