تحديث وندوز 10 الأخير / 1903 - مايو 2019
التحديث بقاله فترة نازل لكن تم تعديله كذا مرة من ميكروسوفت
لغاية ما النسخة دى نزلت و بقالها فترة متغيرتش و إتأكدت من إستقرارها
كنت محتاج أجربها بشكل كامل ف الجيمنج و البرامج
عشان أعرف أد إيه هى فارقة عن اللى قبل كدا و إيه مميزاتها
أهم شئ عندنا سرعة الأداء ، بعيداً عن أى مميزات بنعتبرها إكسسوار للنسخة
عشان كدا النسخة دى كـ أداء ف الجيمنج و البرامج ، و حتى الشغل ع الجهاز عامةً
محترمة و فيها فرق سرعة ملحوظ عن 1809 فيرجن 2
النسخة دى فيها نعومة و سلاسة هيحسها أى حد بمجرد ما يشتغل عليها
-------------------------------------------------------------
دى شوية مميزات من المتوفرة فى التحديثات بشكل عام /
1 - فى المجمل هنلاقى أيكونات كتير إتغيرت و كذلك الخلفيات و الصور
كمان القوايم إتضافلها تخصيص و أغلب البرامج و النوافذ بقت إحترافية أكتر
2 - نظام البحث بقى غير مرتبط بـ كورتانا زى الأول
كورتانا بقت نظام بحث لوحدها
و السيرش بقى بواجهة منفصلة و فيه خصائص أكتر
3 - النوت باد ، بقت ذكية زى الإستيكى نوت
و بتحفظ أخر حاجة تمت عليها حتى لو الجهاز رستر
هترجع تلاقى اخر شئ كتبته موجود و تكمل عادى خالص
و كمان فيها مؤشر ينبهك لو كنت بتكتب و مسجلتش أخر حاجة ضيفتها
4 - تقدر تعمل إزالة لبرامج كتير من إللى نازلة مع الوندوز
الأول كان لازم تاخدها ع بعضها كدا ، دلوقتى مسموحلك تخصصها أكتر
5 - عندك شريط تحدد بيه سطوع الشاشة ، تعليه و توطيه زى اللابات كدا
أعتقد شفت الميزة دى قبل كدا ف تحديث ، بس قلت أذكرها رخامة يعنى 😃
6 - تقدر تعمل إيقاف لتحديثات الوندوز لمدة 7 أيام
مش عارف بعد ال 7 أيام هعيدها تانى و أفضل ع كدا و لا إيه !
برضو أعتقد شفت دا ف تحديث سابق ، عديها 😃
7 - برنامج SAND BOX و هو عبارة عن وندوز إفتراضى جوا الوندوز
تخش جواه و تتشقلب و تسطب كل إللى نفسك فيه بدون ما يأثر ع الوندوز الأصلى
كإنه Simulation كامل للوندوز العادى
خايف أقول أعتقد شفته ف تحديث سابق لحسن حد يشتم 🙁
8 - ال Dark Mode بقى مفعل ع الوندوز بشكل كامل
و دا كان فى تحديث سابق أعتقد ، إشتم براحتك بأه 😃
-----------------------------------------------------------
وارد يكون فيه مزايا أكتر ، إكتشفوها و إنتوا شغالين أنا مش فاضى 😂
لكنى وضحت إللى لاحظته و شفته مهم من وجهة نظرى
يستحسن تحملوا النسخة كاملة من ميكروسوفت بشكل مباشر
هتلاقوها فيرجن 1 بدون أى تعديلات ، نسخة خام محترمة جداً
و لو مش عاوزين تسطبوا ال Tool و تحملوا من خلالها
ممكن تنزلوا إضافة للمتصفح إسمها Agent Switch
و تخلوا السويتش ع الأيفون ، وقتها هتقدروا تحملوا النسخة مباشر
من خلال ملف iso .. خدعة حلوة أهى 😉
بس كدا ، سالاموووووا عاليكوووووا 🙂
تعليقات
إرسال تعليق
سيب أستفسارك وهرد عليك يانجم