باقات WE الجديدة للإنترنت ، مؤامرة كونية لعينة 😃
بعيداً عن إنهم كرييتيف جداً فى إختيار الإسم
باقات We SPACE ! و مش بنقلد إسم إيلون ماسك Space X
إوعى تفهمنا صح 😃 .. نفسى أشوف مين مسئول عن الإبداعات دى !
بعيداً عن أى أسلوب تعامل سئ من الشركة تجاه العملاء
أسلوب عقيم ، أنا من إللى مضرورين منه شخصياً
الشركة تفتقد جداً للإحترافية و المرونة فى التعامل
لكن دلوقتى هنتكلم كخبراء و فنيين على العرض الجديد
و دا بغض النظر عن الشركة كـ كيان يفتقد المينتاليتى 😃
أنا مش فاهم ليه فى هجوم كبير على الموضوع
لأسباب غير مبررة و ترديد كلام و خلاص !
و كله ماسك فى نقاط فرعية و بلا قيمة فى المجمل
يعنى هنسيب كل الحلو و نمسك فى الوحش و بس
هو إنتوا مخدتوش مينتاليتى فى الإسكول 😂
النظام جميل جداً و مفيد ، و فيه توفير فلوس
و جيجات زيادة ، و كمان أسرع من العرض القديم
كله قافش فى جزئية إن الباقة هـ تداون جريد لـ 256 كيلو
على أساس إنها لما كانت بـ تداون جريد لـ 1 ميجا ، كنتوا بتعرفوا تشتغلوا !
و مين أصلاً بيشتغل على النت و محتاجه بإستمرار
بيسيبه يتعمله داون جريد و مش بيزود كوتا إضافية !
فى كل الحالات السرعة بعد الداون جريد مش مرضية أياً كانت كم
أنا شايف النظام ممتاز بشكل كبير جداً
لإنى كواحد كنت ع نظام / ميجا بلس - أب تو 15 ميجا ، و باخد 200 جيجا
و بدفع أكتر من 250 جنيه شهرياً
لما أتحول و أبقى ع نظام / سوبر - أب تو 30 ميجا ، و باخد 250 جيجا
و بدفع أقل من 250 جنيه شهرياً ، يبقى كدا مينفعش أقول عليه نظام وحش
و قياساً عليه باقى السرعات ، لكن دى عينة من الفرق إللى فى العرض الجديد
و عشان نبقى منصفين .. الموضوع محاولة بائسة للضغط على فئة معينة
و توجيههم للباقات الإضافية غصب عنهم ، و تحقيق أعلى ربح من خلال كدا
لإنهم غالباً لقوا ناس كتير بيحصلها داون جريد و مش بتشحن كوتا إضافية
فقالوا نعصرهم أكتر و طالما هما راضيين بقرف الميجا نوديهم لقهر ال 256 🙁
و القصة دى بدأت أصلاً من الوقت إللى الإنترنت فيه إتحدد بشكل عام
فمنجيش دلوقتى و نستغرب من مجرد تحايل و تلاعب بشروطها مش أكتر
الموضوع مش هيفرق مع شريحة كبيرة و هيشوفوه ممتاز
و هيفرق مع شريحة تانية و هيشوفوه مضر جداً
لكن فى المجمل هو مش وحش و مش غلط بالكامل
لإنى زى ما وضحت إن الأساس الغلط هو فكرة التحديد من البداية مش التعديل دلوقتى
ركز و مترددش كلام و خلاص لمجرد كرهك أو مشاكلك السابقة مع كيان معين
لكل مقام مقال .. متدخلش الدنيا فى بعضها و حكم عقلك فى كل موقف على حدا
بس كدا ، إتمسوا بالخير 😃
تعليقات
إرسال تعليق
سيب أستفسارك وهرد عليك يانجم