الكروت السوبر .. زى السجاير السوبر كدا 😃
حاجة كدا شبه ريماستر الجيمز القديمة بنسخة حديثة
خطوة عجيبة شويتين من Nvidia
و للوهلة الأولى متفهمش مقصود بيها إيه تحديداً !
لكن لو ركزت هتلاقيها منطقية إلى حد ما
للى ميعرفش الموضوع ، و كان ف البلكونة و مش متابع
شركة Nvidia يا ريس عملت كروت جديدة
بس هى مش جديدة كلياً كفئة ، دى أضافت ع إسم فئة ال RTX
كلمة SUPER .. و نزلتها فى إصدارة منفصلة و محسنة شويتين
أعتقد إنها إعادة إطلاق لجيل ال RTX بشكل عام
لإنه محققش المكاسب و لا المبيعات المتوقعة
و كان نزوله الأسواق مش متحضرله كويس و دا راجع لعوامل كتير
بس بتفكير الشركة زى ما أتوقع و الله اعلم !
إنه بما إن دى فئة جديدة و هى تقريباً ركيزة المستقبل ف عالم الكروت
مينفعش تضيع مننا بدايتها بالشكل دا
إحنا هنروشن الفئة و نعملها شوية تظبيطات تزودها قوة
هنعليلك ال كودا كور ف الكارت دا و هنزودلك ال فى رام ف الكارت دا
و خد شوية بت زيادة ف الكارت دا ، هنشهيصك يعنى 😃
و كمان هنصلح الغلطات إللى حصلت ف أول إطلاق بشكل عام
و هنعرضها بـ نيو لوك من تانى ، و بسعر أغلى كمان
عشان إحنا مش بنعمل حاجة لله 😃
علماً بأن الأرقام المبدئية إللى لسة مش مؤكدة
بتقول إن فرق الأداء ف أحسن الظروف مش هيزيد عن 15% أقوى
و كمتوسط مش هيزيد عن 10%
فهل دا يستاهل إنك تدفع عليه فرق سعر !
من 40 ل 60 دولار تقريباً ، أغلى من سعر النسخة العادية !
إللى هو ما يعادل 1000 جنيه مصرى تقريباً ؟
برضو ملهاش رأى ثابت .. و كل واحد حر ف قناعاته و إختياره
فيه ناس ال 5 فريم الزيادة بيفرقوا معاهم و ممكن يدفعولهم فلوس
فيه ناس الجرافكس و شغله بيفرق معاهم المضمون بتاعه بشكل عام
كل المستخدمين هيختاروا حسب إحتياجهم وقتها
بس الطبيعى إنك تقارن فرق سعر مقابل أداء و تحكم عقلك
هل فعلاً يستاهل و لا لأ
كمان مننساش AMD .. مش هتسكت طبعاً و هتقوم تديلوا 😃
مشفناش ليهم إنتاجات جديدة إلا من خلال
كارت ال RX 5700XT إللى بييجى بسعر 450 دولا تقريباً
و حتى الأن هو ف مواجهة مع نظيره ال RTX 2070
مع العلم إنه متفوقش عليه و يعتبر بيحاول المنافسة فقط !
مش فاهم وضعه أو محله إيه من الإعراب !
بس أهو كارت و موجود و الناس طول عمرها مبسوطة 😃
طب إزاى أصلاً AMD هتواجه فئة ال SUPER ?
أعتقد دى هتبقى مفاجئة حلوة للمستخدمين
بس لسة شوية ع ما نشوف التطورات ...
مش هنهاجم أو هنرحب خالص بفكرة الكروت السوبر
أى قرار دلوقتى للحكم ع الموضوع هيبقى متسرع نوعاً ما
لازم نتقل و نشوف الاسعار هتستقر ع إيه
و نشوف أداء الكروت النهائى هيكون فارق بشكل مؤثر و لا لأ
دا كله هيظهر بعد التحسينات الأخيرة إللى هيعملوها
و بعد طرح الكروت فى السوق للمستهلكين و التجارب الفعلية
بالمناسبة الموضوع مش هيبعد أوى عن النتايج المبدئية ، كسعر و كأداء
متعشموش بتغيير كلى 😃
لكنه على كل حال يستحق الإنتظار عشان نعرف نحكم بشكل دقيق ...
تعليقات
إرسال تعليق
سيب أستفسارك وهرد عليك يانجم