الجيل الـ 11 من إنتل ، إللي هيكون بإسم Rocket Lake
يعني لا مؤاغذة / بحيرة الصاروخ 😃
كالعادة بنوعدكم هنقدم أداء أفضل من الجيل السابق
بنسبة حلزون و 2 من عشرة
كمان تفوق من ناحية الجرافكس و تطوير كبير ليه
بلا بلا بلا ، و يبقى الأداء الفعلي هو الحكم النهائي
المعالجات جاية بمعمارية 14 نانو المعدلة
و كان ف محاولة إنها تبقى بمعمارية 10 نانو
لكن حصل مشاكل و إضطرينا نخليها 14 معلش
نفس السوكيت الـ 1200 بتاع الجيل العاشر
مفيش تطوير لفت انتباهي و لا إستحق التوضيح الشهابي
كله عادي زي كل جيل بإستثناء حاجات طفيفة جداً
-----
من ضمن الحاجات المؤسفة و إللي كانت مفاجئة
هو عدم دعم البورد من شريحة H410 - B460
للجيل الـ 11 من إنتل !!!
و إن الدعم هيكون فقط لـ Z490 - H470
إللي هما محدش إشتراهم تقريباً ف الفئة دي
فـ بيحاولوا ينشطوا مبيعاتها عن طريق
قتل البوردتين المنخفضة و المتوسطة للجيل الـ 10
-----
يعني نخلي عندنا دم و إحنا شايفين AMD
بتدعم بـ الجيلين و التلاتة ع نفس البورد
فـ إحنا نسكت ، لأ طبعاً ، لازم نتميز حتى لو بالغباء
و طل علينا 3 بورد بشرايح جديدة للجيل دا /
الهاي إيند / Z590 ، و دي لأصحاب الكسر و الميول السادية
الميد رينج / B560 ، و دي للفئة المتوسطة الجميلة
البدجت رينج / H510 ، و دي للأغلبية العظمى من الشعب و الحمد لله
و البورد الجديدة دي هتدعم الجيل العاشر بـ الكامل
بالإضافة لـ الجيل الـ 11 إللي نازلة عشانه
------
يعني من الأخر و نصيحة لأي حد هيشتري بوردة حالياً
من فئة الميد رينج B460 ، و تكون فل أوبشن و فوق الـ 2000 جنيه
إوعى ترتكب الغلطة الشنيعة دي ، إرجع يا مجنون
حتى لو مش هتحدث خلال سنتين فيما فوق
أخرك للجيل العاشر ، ف فئة البدجت و الميد
إنك تشتريله بوردة ف رينج 2000 جنيه فيما تحت
أكتر من كدا تبقى بتخسر ع المدى البعيد
و هتضطر تغير بوردة ف التحديث للجيل الـ 11 قدام
كمان إوعى تروح تشتري Z490 - H470 دلوقتي بحجة قابليتها للتحديث
خليها عندهم عشان يعرفوا غلطتهم و ميضغطوش علينا تاني
و مشي نفسك بـ أي حاجة دلوقتي ، و لما بورد الجيل الـ 11 تتوفر
هاتلك حاجة زي الـ B560 مثلاً ، هتبقى إقتصادية و مناسبة جداً
و إختيار أرخص و فيه دعم و أوبشنز أكتر لقدام
بس يارب وقتها ميكونوش عملوا خازوق تاني 😃
-------
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم