شركة AMD ، بتحاول بكل قوة تسيطر ع سوق الهاردوير
سواء معالجات أو كروت شاشة .. و داخلة بغشم الصراحة
و من اهم أسلحتها .. بعد السعر و الهاردوير
هو / السوفت وير ! 😵
---------------------------------------------------------
بغض النظر عن تطوير الهاردوير إللى بيتم
و السعر المنافس إللى بيتعرض بيه المنتجات
و وصولها لتكنولوجيا ال 7 نانو ف المعالجات و الكروت قبل أى حد
كل دا خلاها تتفوق ف مجال المعالجات ل 3 اجيال ع التوالى
و أخدت إنتل فوق سطوح الواد حمادة .. حرفياً 😱
---------------------------------------------------------
لكن حالياً فيه ألاعيب جديدة بتحصل ف مجال الكروت
لإن AMD ناويين يعملوا حاجة مُبشرة جداً
و هنشوفها بوضوح مع ال RX 5700 - XT
لما ينزل بنسخ الأفتر ماركت و ينتشر
كمان هنشوف اللعب بجد .. مع تفعيل خاصية ال Ray Tracing
على الكروت ال AMD .. إللى هتبقى ضربة قاضية ل NVIDIA
و هفكركم 😊
---------------------------------------------------------
أغلب الناس اللى بتحدث تعريفاتها هتكون عارفة إن انجح سوفت وير
بيدعم الأداء و يطوره بشكل ملحوظ ، هو سوفت وير AMD
ع عكس سوفت وير NVIDIA إللى من فترة كان بيقلل الفريمات
و بيتحيز لكروت ال RTX فقط و يوقع الأداء ف الجيل العاشر
لكن المشكلة دى شبه إتحلت تقريباً ، لكن إحنا بنوضح بس 😉
---------------------------------------------------------
انا عن نفسى من فترة بنزل سوف وير ل AMD
لقيتهم كاتبين ف النوتس عيوب التحديث .. أه و الله !!!
إللى هو إحنا ناس جامدين جداً و عارفين عيوب التحديث
لكن برضو هتشوف مميزاته بعينك و ممكن العيوب متأثرش معاك
و دى حاجة تُحترم .. و صعب تشوفها ف NVIDIA 😤
---------------------------------------------------------
الكلام مش تحيز لكروت AMD إطلاقاً
أنا عن نفسى كارتى GTX .. و متحيز شويتين ل NVIDIA أصلاً !!!
لكننا هنا بنشرح الحقايق .. بعيداً عن الراحات النفسية لكل شخص 😇
---------------------------------------------------------
سوفتوير AMD قوى جداً ، و بيطور الأداء بشكل يخليك تسأل
هو الكارت دا قوته أد إيه ؟ .. و يقدر يشغل إيه و إزاى !!! 🧐
---------------------------------------------------------
الموضوع دا تقدر تشوفه بإستمرار ف كروت AMD
لكن مؤخراً ف أخر تعريف .. إتعمل مقارنة لكارت RX 570
قدام كارت GTX 1060 ، إللى من المفترض إنه من فئة RX 580
و أعلى من 570 بفرق محترم
لكن النتيجة كانت تساويهم ف الفريمات ف بعض الجيمز !
و تفوق ال 1060 بفرق 13 فريم كمتوسط ف جيمز تانية
مع العلم إن الفرق الطبيعى بين الكارتين دول قبل التحديثات
كان من 10 ل 20 فريم متوسط !
الموضوع إللى يخليك تفكر كدا و تقول /
باينوا هيعملها و لا إيه .. بصوت حسن شحاتة 😅
---------------------------------------------------------
فرق السعر أصلاً بين الكارتين دول تحديداً كبير
لو قلنا ال 570-4 مستعمل ب 2000 جنيه
و ال 1060-3 مستعمل ب 3000 جنيه
كمتوسط أسعار ف السوق .. يعنى الفرق 1000 جنيه تقريباً
هل المبلغ دا يستاهل فرق الأداء بينهم ؟ 🤨
---------------------------------------------------------
من الأخر .. جوا كل كارت AMD قوة روحية يا محيي
بتطلع لما الدرايفر يتحدث 😂
---------------------------------------------------------
و دا يخليك تقف ف حيرة .. و مش عارف تعمل إيه 😕
---------------------------------------------------------
بس أكيد مش هنسيبك تحتار .. أومال إحنا بنعمل إيه
لو عاوز أى ترشيح او استفسار تقنى .. إبعتلنا
و أنا هتواضع و هاجى ع نفسى .. و أرد عليك .. يلا يا عم 😬
---------------------------------------------------------
و مش محتاج أقولك .. لو الكلام عجبك لايك و شير
و لو معجبكش .. إعتبره من وحى الخيال و لا يمت للواقع بـ صلة
و لايك و شير برضو .. متبقاش غلس 🥰
تعليقات
إرسال تعليق
سيب أستفسارك وهرد عليك يانجم