إتكلمت يوم مؤتمر نفيديا من كم يوم عن الكروت الجديده RTX
كنت متفائل و متحمس جدا بس قلقان برده !
وضحت كلام إتقال ف المؤتمر و عرضت وجهة نظر شخصيه عن الجيل دا
الموضوع ع البيدج لـ إلى عاوز يشوفه ...
--------------------------------------------------------------------
دا التقييم النهائى لـ الكروت الجديده من Nvidia
---------------------------------------------
مبدئيا كدا .. إحنا إتضحك علينا .. أو عشمونا بزياده
أو بالغوا ف الكلام و الوصف .. لأ .. هو إتضحك علينا 😃
الكروت مقدمتش فرق 3 أضعاف و لا 5 و لا 7 و لا الخزعبلات الى اتقالت دى
و الكلام للأسف إتمرر ف المؤتمر بشكل خبيث .. كان لمجرد الخداع
و ظهرت نيتهم فيما بعد إنهم كانوا يقصدوا التقنيه الجديده هى إلى أقوى أضعاف
مش الأداء العام كـ جيمنج أو كـ جرافكس عموما
يعنى تقنيه حديثه مطوره بتتعرض لأول مره و منزل جيل بإسمها
بيقارنوها بـ كروت فيها التقنيه شكلا فقط و تقولى تتفوق عليهم !
سبحان الله ! هما عملوا زى نظام ( تطبق الشروط و الأحكام ) شغل رخيص
المهم .. كلامى دا من الدهشه فقط مش أكتر .. الكروت كويسه مش وحشه
و التحديث مطلوب طبعا .. و الكروت دى بوابه ذى ما ذكرت قبل كدا لحاجات أكبر
------------------------------------------------
هقولك الزتونه ف الموضوع دا ...
ف الصور دى هتلاقى أداء كارت زى ال RTX 2080 ف مجموعة جيمز
ع ريزولوشن 4K و معدل 60HZ .. لو قارنتهم بـ الكارت الموازى ليه
إلى هو GTX 1080 .. هتلاقى الفرق بيبتدى من 15 فريمـ و بيوصل لـ 35 فريم !
متتصدمش .. هو دا الفرق بين الكروت الى نزلت و تم عمل إختبار أداء جيمنج ليها
قياسا ع كدا الـ كارتين التانيين .. برده نفس النسبه
و هتلاقى ف الصور مقارنه لأداء الجيمز ع GTX 1070 ---- RTX 2070
فروقات مش شاسعه بـ توضح التفوق بمعدل الفريمات الى قلناه
-------------------------------------------------
و دا نفس الفرق تقريبا إلى بين الجيل التاسع و العاشر ف الـ GTX
15 لـ 35 فريم تقريبا برده !
مش أضعاف زى ما الشركه قالت و لا 100% حتى !
نفس التفوق بـ نفس النسبه المعتاده إلى الشركه بتعملها دايما .. مفيش جديد
و طبعا تقنية الإنعكاسات و الظلال و الإضائه .. دى من أهم المميزات
إلى هتعتمد عليها ألعاب كتيره الفتره الجايه .. و هتدى شكل مميز لـ التجربه
بس للأسف الحلو ميكملش .. و التقنية دى بتنسف معدل الفريمات
هى متطبقتش بالكامل إلا ع لعبة واحدة فقط و هى BATTLEFIELD V
و من خلال التجارب لقينا الفريمات تقريبا بتقل النص عند تفعيل ال RTX
و دا طبعا معدل كبير ف ال دروب و نذير فشل ياريت ميبقاش مؤكد
-------------------------------------------------
كمان كروت RTX بتستهلك كهربا أكبر من الجيل السابق !!!
هنلاقى تقريبا معدل 50 / 100 وات .. زيادة ف متطلبات كل كارت
مش عارف دا راجع لإيه الحقيقه .. وارد يكون إنه متعلق بتقنية الـ RTX
أو بدواير الطاقه ف الكارت نفسه .. أو إحتياج المعماريه نفسها !
مع إن الطبيعى إن الأجيال الاحدث إستهلاكها أقل !!!
بس دى حاجه عكس التوقعات برده ...
-----------------------------------------------------
طيب يعنى كدا منشتريش الكروت دا و لا إيه !!!
الموضوع دا راجع لإحتياجاتك و لـ ميزانيتك و لـ قناعاتك الشخصيه
الفرق واضح قدامك بين الجيلين بشكل مبسط جدا
سواء كـ أداء جيمنج أو إستهلاك كهرباء .. و وضحناه فوق
------------------------------------------------------
و بالنسبة لـ السعر .. دى متوسط أسعار كل كارت و ما يوازيه
سعر ... RTX 2080 TI /// 1200$
سعر ... GTX 1080 TI /// 700$
سعر ... RTX 2070 /// 600$
سعر ... GTX 1070 /// 400$
-----------------------------------------------------
أما بالنسبه لـ الرندر أو شغل الجرافكس المختلف
فـ لسه مفيش تجارب أداء محدده بشكل دقيق
لكن يكفى أسلوب الرندر المميز و الأسرع
و يكفى تقنية RTX إلى هتساعد جدا ف الابحاث
و هيستفيد منها المصممين و الدكاتره و المهندسين و غيرهم
ذى ما ذكرت ف الموضوع الأول
-------------------------------------------------
لو الكلام عجبك .. لايك و شير
لو معجبكش .. إعتبره من وحى الخيال و لا يمت لـ الواقع بـ صلة
و لايك و شير برده .. متبقاش غلس 😃
تعليقات
إرسال تعليق
سيب أستفسارك وهرد عليك يانجم