المراجعات و البنشمارك و الفيديوهات على النت !
هل هى صح و لا غلط !
و أعتمد عليها ف المطلق فى كل إختياراتي ؟
و لا الموضوع مختلف فى التجربة الفعلية ؟
------------------
إحنا بنعرض أجهزة وورك ستيشن و إستيراد للبيع
و كروت شاشة بمختلف الفئات .. بجانب الجديد
و بقول للناس دي هتفتح جيمز على الهاي مثلاً
كتير بيعترض و يقول إن كلامى غلط و مستحيل يحصل
و يرزعوني ف وشي بنشماركات خزعبلية
من مواقع أغلبها مش دقيقة أصلاً ، لكن دا للأسف سقف خبرتهم
------------------
لدرجة إن فيه كذا شخص من جروبات مختلفة قابلوني مخصوص
عشان يتأكدوا من الكلام ، و قعدوا معايا أكتر من ساعة
و شافوا أداء كذا لعبة بشكل مستقر و إقتنعوا
و دا كان على جهازي الشخصي من فترة كبيرة جداً
و كان تحت المتوسط و جيل قديم مش high end
دي مواصفاته /
Dell t3500 / w3690 + gtx 1050ti + ram 12
------------------
يعني لما تدخل موقع زي /
Gamedebate - cpuboss - userbenchmark - إلــــخ
و يقولك إن كارتك و جهازك مش هيشغل اللعبة كذا و هيبقي أدائها وحش
فمينفعش حضرتك تسمع الكلام و متجربهاش حتى لو متاح عندك الفرصة
إنت لازم تجرب بنفسك ، و إحتمال تشغل نفس اللعبة على الهاي ، عادي جداً
وقتها هتسمع كلام الريفيو العالمي الفظيع .. و لا هتصدق تجربتك العملية و عينيك !!!
دي نقطة بتحصل من مواقع كتير جداً.. و تخلي كلام الموقع ملوش قيمة .
------------------
من فترة شغلت بيس 17 على كارت شاشة 256 ميجا - 59 بن من أيام الفراعنة !!!
و إشتغلت بدون أى تقطيع ع ال low و ريزولوشن قليل
و جيت أجربها على كارت تانى أحدث منه بسنين ضوئية
و المراجعات مفضلاه ف تشغيلها عن الأول !
و كانت بتهنج و أدائها سئ على نفس الإعدادات و نفس الجهاز !!!
و غيرها من أمثلة كتير .. بتنسف مفهوم الإعتماد الكلي على مواقع المقارنات .
------------------
المقارنات و الريفيوهات.. أغلبها بتبقي مدفوعة للتسويق لفئة معينة
محدش بيعملها لغرض التوضيح و التعليم إلا نسبة قليلة جداً
كمان مش هتلاقى فى متطلبات لعبة إنها محتاجة بروسيسور زيون مثلاً !!!
لإن دا غير مفيد تسويقياً ليهم ، و مش معناه برضو إن الزيون ميشغلهاش !
لكنه فئة مش موجهة للجيمنج ف المقام الأول كتسويق برضو مش ك شئ عملي
------------------
يعنى عندك عربية لاند روفر ، دفع رباعي
لما تيجي تعملها إعلان مش هتجيبها ماشية ف وسط البلد !
أكيد لأ ، إنت هتجيبها ماشية ف الصحراء و بتطلع الجبال
هل معنى كدا إنها مينفعش تمشي ف شارع عادي !
إطلاقاً ، لكنه تسويق لميزة المنتج الأكبر و التركيز عليها مش أكتر
------------------
كذلك مش هتلاقى فى المواصفات بروسيسور كور أى .. من جيل قديم شوية
لإنه مش هيخدمهم فى المبيعات و مش هيضطرك تحدث !
لكنهم بيشوفوا إيه لسه متاح بيعه فى الأسواق أو يقدروا يستفيدوا منه بأى شكل
و يسوقوا بيه و يحطهولك ف المتطلبات
و المتطلبات إللى بتتحط ع المواقع لتشغيل الألعاب الجديدة
ما هي إلا إمكانيات تقريبية و تسويقية للتشغيل
مش حكر عليها هي فقط إمكانية تشغيل الشئ يعني .
------------------
طيب حضرتك أنا لسه هشترى و مش متاح قدامى إنى أجرب كل قطعة
و كل علاقتى بالمجال إستخدامى الشخصى !
و معرفش مختصين يساعدونى .. أعمل إيه ؟
قفلتها ، بصوت القرموطي ، ماشي 😃
------------------
وقتها مفيش قدامك غير المواقع دى للأسف ، لكن متبنيش عليها كل حاجة
لإن مهما بلغت دقة المواقع دى فى توضيح الأرقام
مش هتتحقق عندك زيها بالظبط برضو
الموضوع راجع لتوافق المكونات و للسوفت وير إللى بتستخدمه
و حتى لـ فيرجن القطعة نفسها 🧐
------------------
لكن بيبقى فيه نسبة و متوسط للأداء ككل نقيس عليها
يعنى مثلاً هشترى كارت GTX 1060 و أركبه على جهازى
و أشغل عليه لعبة معينة بإعدادات مرتفعة مثلاً
و هدور ع بنشمارك فيها جهاز زي بتاعي أو قريب ليه حتي
ممكن مثلا يجيب 50 فريم عندي بعد التجربة
و ف البنشمارك يكون جايب 47 أو 54 مثلاً !
طالما المعدل معقول و مش زيادة أو ناقص بشكل أوووفر
كدا حاجتى مش بايظة و لا فيها مشكلة ، دا تفاوت طبيعى جداً و وارد يحصل
لكن ميبقاش فى البنشمارك 50 و يجيب عندى 30 !!!
وقتها هيبقى فيه حاجة غلط إما فى دقة الموقع و أرقامه ، أو فى القطعة إللى معايا .
------------------
كمان غلط جداً تعتمد على موقع واحد فى البنشمارك
أى حد بيرزعلك بنشمارك من موقع و تلاقيه مكرره دايماً ، إبعد عنه
لازم يبقى عندك مجموعة مواقع بتستخدمها فى مقارناتك
و يكون عندك قنوات يوتيوب لناس موثوقين مش غرضهم الربح و الدعاية فقط
و تقارن النتايج و تاخد بالمتوسط بتاعهم كلهم
قمة الخطأ إنك تعتمد على موقع واحد فى كل البنشمارك
لإن فيه مواقع بتدى درجات و تقييم أعلى لكارت
لمجرد إنه أحدث فقط أو إستهلاكه للكهرباء قليل
و إنت تاخد بالرقم الاعلى و تقول الكارت دا أفضل بدون إدراك للتفاصيل كلها .
------------------
أحسن طريقة إنك تدخل على الموقع الرسمى للمنتج و تجيب المواصفات كأرقام
و بعدها تفتح اليوتيوب و تشوف مقارنات فعلية لقنوات محترمة
و بعدها تخش على المواقع الكتابية و تشوف تجارب الأداء إللى عليهم
دا فى رأيى أفضل ترتيب لو عاوزين نعتمد على إختبارات المواقع .
------------------
دا فى حالة عدم توفر التجربة الفعلية طبعاً
لكن لو توفرت التجربة الفعلية إعملها بعد كل دا
متستغناش عن البنشمارك من النت أبداً
لإن إللى عمله مش فضائيين يعنى و لا جايبينه من الخيال
أكيد وسط المراجعات الغلط و التجارية هتلاقى حاجات صح تقدر تعتمد عليها
و عشان برضو يكون عندك فكرة مسبقة عن قوة القطعة إللى معاك
و تقيم أدائها معاك بنائاً على دليل و متسيبش الموضوع للتجربة فقط
إللى ممكن تكون إنت بتجربها غلط أصلاً
-----------------
حاجة مهمة جداً
لو محتار تجيب زيون موديل معين ، و لا كور أي ، و لا رايزن
متروحش تجيب نتيجة من أى موقع و تقولي بس كدا همشي عليها
مقارنة الفئات المختلفة من أصعب المقارنات
و لازم فيها تشوف كل شئ و البنشمارك بتاعه بالتفصيل
زي مثلاً / شغل الملتى تاسك ، شغل الرندر ، شغل السنجل كور
عوامل كتير أوي بنقيس عليها و نشوف دا مميز ف إيه و العكس
و بنختار منها حسب إستخدامنا هيكون إيه بالأكتر
------------------
غير لما تقارن فئتين من نفس النوع ، الفرق هو أجيال فقط
كمثال / كور أى فايف جيل رابع ، و جيل تالت
وقتها الموضوع بيبقى سهل جداً و مش فيه تفاصيل كتير
-----------------
هتسمع كلام كتير من التجار بيستخدموه ف التسويق /
زيون 15 كور ، أعلى من أى سفن
الكيسة العملاقة الشقية ، أعلى من جيل تالت و رابع
و خرافات و أساطير غريبة كدا 😱
------------------
و بيتجاهلوا فرق الأجيال ، و إن دا بيدعم حاجات أحدث هتفيدني
و تفاصيل كتير أوى ، بيختذلوها ف كورز و كاش بـ الكيلو
و قلناها قبل كدا هى مش بكترة الكورز و الكاش أبداً
وارد يكون جهازك الزيون 6 كور ، و جهازى 4 كور فقط
لكنه من فئة مختلفة أحدث و تكنولوجي أفضل
و أعلى من أداء جهازك ، عادي خالص ، و دا بيحصل كتير جداً
------------------
بالرغم إنى فوق ضارب مثل ب جهاز زيون كان عندي
لكن لازم نعرف كويس جداً إن لكل شئ حساباته
الموضوع مش سهل للتقييم و لا إنك تثبت قاعدة للكل
لازم تبقى فاهم أوي عشان تقدر تحدد كل حاجة مميزة ف إيه
و تشتري المناسب ليك
-----------------
المقصود من الكلام هو إن مش كل المراجعات إللي على النت
حقيقية بالكامل ، و برضو مش كلها غلط !
و مينفعش نستخدمها مرجع ف المطلق و نتجاهل التجربة العملية
لكنها دليل و مؤشرات مؤقتة ف حال عدم توافر التجربة
------------------
و ميكونش بحثنا من موقع واحد فقط ، أو قناة واحدة !
دا إحنا بناخد لفة حلوة ف أكتر من موقع و قناة
و نشوف متوسط الأرقام و نحسب و نجمع براحتنا
لإن ف مواقع كتير بتسوق لشركات معينة ، و بتعمل مراجعات مدفوعة
و بتديلك نتايج مش صحيحة و بيتلاعبوا بـ الأرقام
------------------
من فترة شفت قناة عاملة بنشمارك لكارت 1060
ع جهاز قريب جداً لجهازى كـ مكونات
و جايب نفس أداء كارتي ال 2060 و أحياناً أعلى !
فـ خرجت و قلت سبحان الله 😆
------------------
فـ لازم ناخد بالنا كويس و منعتمدش ع موقع واحد أبداً
و نتفرج ع فيديوهات تجارب فعلية كتير ، بحيث نوصل لأقرب شئ للصح
و متبصش ع قديم و لا جديد و لا فئة ، ف إختيارك
فكر بس إستخدامك هيكون إيه ، و إيه أقوي جهاز يشغلهولك !
هو دا المعيار السليم ف الإختيار ...
أو وفر التعب دا كله ، و تعالى إسألنى هنا و أنا هرد عليك يا صديكي 😍
-------------------------------------------------
لو الكلام عجبك .. لايك و شير
لو معجبكش .. إعتبره من وحى الخيال و لا يمت للواقع بـ صلة
و لايك و شير برضو .. متبقاش غلس 😃
تعليقات
إرسال تعليق
سيب أستفسارك وهرد عليك يانجم