خلي بالك أوي من الكلمتين دول عشان محدش هيقولهم لك
عمو شهاب بس إللي بيخاف عليك و هيوعيك للصح 😎
---
مع كل جيل جديد ف الهاردوير ، و خصوصاً كروت الشاشة
بتسمع رابطة الإخوة المحنكين و الزياطين يقولولك إيه /
و الله يا برنس إنت غلطت إنك إشتريت دلوقتي ، فلوسك ضاعت
دا كارتك مبقاش يسوى خلاص و الجيل الجديد هيدوس عليه
بيع بأه بـ ربع التمن ، ما الجديد خلاص هيخلي الحاجة ببلاش
هو هو هو 😃 إلــخ ، لهذه العبارات التي لا أساس لها من الصحة
-----
و كأنه بمجرد نزول جيل جديد أقوى
خلاص الدنيا خربت و حاجتنا حَلِت عليها لعنة ثانوس و إتبخرت 😱
و الكلام السلبي دا بيأثر ف نفوس ناس كتير مش فاهمين أوي
و بيخليهم إما يبيعوا حاجتهم بـ تسرع و بـ تراب الفلوس
أو يكرهوها و يحسوا إنها دون المستوى
مع إنها بتبقى معطلتش و مشغلة كل شئ معاهم
لكن نفسهم بتقفل لمجرد الكلام الكتير إللي بيسمعوه ☹️
لكل أصحاب الكلام السلبي دا ، ياريت تفهموا قبل ما تتكلموا
و متضروش حد بكلامكم و تخميناتكم الخزعبلية
----
أجيال كتير بتنزل و فيها قوة مستخدمنهاش حتى الأن و لا فادتنا بشئ !
مش كل قوة و لا إمكانية ف الكارت إنت هتاخدها 100%
دا كله لعب ماركتنج و إغراء ، و بيلعب ع حب الإستحواذ
هوس التحديث مياخدكش معاه بلا وعي
و ينسيك متطلباتك الأساسية و هل إنت محققها و لا لأ !
يارب يكون كارتك بقاله 10 سنين
ما لو مكفي إحتياجاتك خلاص ، عاوز تحدث ليه ؟
الجيل التاسع حتى الأن بيبيع بشكل كبير
و سادد ع كل حاجة نزلت و بيشغلها بشكل محترم
ف أجهزة حتى الأن شغالة بـ كروت جيل سابع
و معندهاش مشاكل ضخمة مع ألعاب 2020 !
الجيل العاشر جيد جداً و مشتكاش
جيل ال RTX العادي و السوبر ، أدائهم ممتاز
و كذلك مفيهمش مشاكل
مش بمجرد نزول حاجة جديدة هجري زي العيال
و أرمي إللي ف إيدي ، دا مش منطقي و لا تصرف سليم !
-----
لازم تدرك قيمة كل شئ و متجريش ورا النداهة و إنت مغمي
محدش يضحك عليك و يقولك الجيل الجديد هيبهدل القديم
كل جيل بنسمع الكلام دا و مفيش شئ بيحصل بيشقلب الدنيا
و لا بـ الوصف المبالغ فيه إللي بيتقال
أهـ ف تفوق ملحوظ و لعبة وضحناها قبل كدا
بس برضو مش بالشكل إللي يخلي حاجتي خردة !
و الدليل هو أسعار الكروت و المعالجات القديمة و مبيعاتها حتى الان
كل كارت أو معالج محترم بيبقى ماسك نفسه و إن سعره قل شوية
بس برضو بيفضل محتفظ بقيمته بشكل عام مقابل السعر
متبيعش حاجتك بـ خسارة ، و لا تتسرع
الجيل الجديد عادي جداً و حدث بيحصل كل سنة و نص تقريباً
لا هو شئ جديد مفاجئ ، و لا مستاهل تتعقد من حاجتك
-----
دول كلهم بيضحكوا عليك و بيخدموا الشركات و مصالحهم فقط
و الباقيين بيرددوا الكلام بدون وعي وسط الزيطة
حَكِم عقلك و شوف إحتياجاتك إيه ، و بص لإنها متحققة
متبصش متحققة بـ إيه و لا إزاي ، عيش و إنبسط بجهازك ♥
-----
لو محتاج تحديث بـ 100.000 جنيه و قدامه عائد كويس و هيخدمك
إعمله بدون تفكير ، لكن لو مش محتاج تحديث و لا قدامه عائد
و هتصرف فيه 100جنيه ، إوعى تعمله و وفر فلوسك
------
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس
تعليقات
إرسال تعليق
سيب أستفسارك وهرد عليك يانجم