إتكلمنا من فترة عن إزاي تختبر كارت الشاشة قبل ما تشتريه
و تعرف إذا كان فيه أى مشاكل و لا لأ ، كان موضوع عظيم حقيقةً 😇
اللينك ف البوست المثبت لو حد حابب يشوف الموضوع
----------------
النهارده هنتكلم عن إزاى تختبر الجهاز بشكل عام
و تعرف تشتري كيسة سليمة بلا أى عيوب
محدش هيضحك عليك تاني أزميلي 😉
-------------------------------------------
1 / إختبار ضغط عن طريق برنامج / AIDA 64
هنضغط ع المعالج و الرام ، Stress Test بشكل عام
حوالي 5 دقايق إ ، و نشوف هل الموضوع هيمشي تمام !
و لا الجهاز هيهنج أو هيحصل مشاكل من أي نوع !
كمان فيه بنشمارك تيست لحاجات مخصصة ع البرنامج
نقدر من خلالها نضغط ع الرامات و المعالج و نجرب كذا نوع تيست
و نقارنها بـ بنشمارك لمعالجات و رامات مختلفين موجودين ف قاعدة البيانات
البرنامج دا كمان عليه كل مواصفات الجهاز بشكل دقيق جداً
نقدر نشوفها منه و نوصل لكل المعلومات 🧐
-------------
2 / برنامج Furmark بالرغم إنه مخصص لكروت الشاشة بالتحديد
لكننا لما نعمل بيه تيست ع الكارت ، بنبقى بنعمل تيست ع الجهاز ب الكامل
لإن إستهلاك الكارت بيسحب من البوردة و الباور و المعالج و باقي القطع
عشان كدا لو مركبين كارت خارجي هنضغط عليه بـ الفير مارك
و هيبقى إختبار 7 ف 1 .. تيست شامل الجهاز و الكارت مع بعض
و بارك الله فيما رزق 😍
-------------
3 / برنامج 3dmark فيه بعض الإختبارات بتحمل ع المعالج بجانب الكارت
و بتدوس ع الجهاز بشكل عام زي ما وضحنا ف أي برنامج إختبار
إنه شامل أكتر من كونه مخصص لقطعة معينة
----------
4 / هتحتاج تشوف هيلث الهارد ، و هل عليه باد سيكتور ولا لأ
و هتلاقي موضوع مُفصل عن الهاردات ، ف البوست المثبت
روح بص دي كنوز و دُرر و الله 😃
و أفضل البرامج ف الكشف ع الهارد و صيانته و تعديله
هما / HD Sentinel .. دا هنعرف منه هيلث الهارد و معلومات عنه
و / Hdd Regenerator .. و هنعرف منه ف باد سيكتور و لا لأ ، و نحلها
و / Mini tools Partition .. لو عاوز تقسم الهارد و تعدله
-------------
5 / لو فيه فرصة تجرب الجهاز فعلياً ، هتنزل نسخة وندوز
و تشغل لعبة تقيلة ربع ساعة بالكتير , ملناش فيه لو صاحب المحل شتمك 😃
لكني بعتبر التجربة العملية من أهم المؤشرات
و ممكن يظهر فيها مشاكل متظهرش أثناء تيست البرامج المُجرد
------------
6 / لو قدرنا نفتح وندوز و نشتغل ع الجهاز
هنتابع حرارة القطع من برامج زى / MSI After Burner
أو / HW Monitor .. أو / Speccy
و عندنا مؤشرات كمتوسط درجات الحرارة تحت الضغط و الجو السئ
للمعالج و الكارت مثلاً ، إنها متزيدش عن 80 ، ف أقصي الظروف
غير كدا ف الطبيعي بتكون أقل من كدا ، و كل معالج و كارت لهم تفاصيلهم
و ظروف تهوية الجهاز نفسه كذلك بتفرق ، دا متوسط ف المُجمل مش أكتر
-------------
7 / الشكل العام للجهاز من جوا ، البوردة و الباور و القطع
أحياناً بيبقى فيه مكثفات منفوخة أو لحامات أو علامات تصليح
و الباور غالباً مفيش تاجر هيسيبك تفكه طبعاً ، و دا مش منطقي أكيد
لكنك ممكن تبص عليه من الفتحات كدا ع أد ما تقدر
و تسمع لو بيطلع زنة مزعجة أو ريحة شياط أو حاجة مش مظبوطة
و الكلام دا ببساطة لو حد متخصص هيفهمه بسرعة بمجرد النظر
و لو مش معاك حد ، إلقى نظرة ثاقبة كدا ع البوردة و المكونات
--------------
8 / زي ما وضحنا قبل كدا إن من أهم النقاط هى أمانة التاجر و سمعته
نختار كويس و منبصش للأرخص فقط ، لإن المستعمل مليان تفاصيل كتير
نشوف بنتعامل مع مين ، و نهتم كمان بخدمة ما بعد البيع و فترة الضمان
إللى ف الأجهزة بشكل عام مفروض متقلش عن شهر ، إن مكنتش أكتر
---------------------------------------
نفس التوضيح إللى قلناه قبل كدا بنكرره تاني ، بخصوص الضمان المُطلق
لأى قطعة إلكترونية ، إنها تفضل شغالة معانا لمجرد إننا عملنا تيست سليم
للأسف مفيش شئ إسمه كدا ، دى قطعة كهربائية و وارد جداً تكون زي الفل
و مرة واحدة تفصل أو تقطع ، ف المستعمل و الجديد كمان
دا مش قاعدة و إستثناء أكيد ، لكنه بيحصل أحياناً
لو إنت مُبخت و حظك حلو يعني 🤪
-------------
فـ عشان كدا إحنا بنمشي تبع القاعدة الأساسية
و بنعمل إختبار لكل القطع بتاعتنا زى ما وضحتلكم
و بنشتري من مكان ثقة و سمعته طيبه و عنده خدمات ما بعد البيع
و بناخد كمان ضمان ع القطع بتاعتنا
و بكدا نبقى خلصنا كل حاجة و عدانا العيب
و بقينا ناس واعية و فاهمين بنشتري إزاي
و بإذن الله الحاجة تشتغل معانا و متبوظش 👍
أما لو هتشتري مننا ، فـ سيبلنا نفسك خالص
و إحنا هنعملك كل الإختبارات المهمة و نبعتلك صور لـ نتايجها
عقبال ما تخلص كوباية الشاي بـ حليب 😃
---------------------------------------
لو الكلام عجبك لايك و شير ، لو معجبكش !
إعتبره من وحي الخيال ، و لا يمت للواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم