صباح الفل عليكم ، أياً كان الوقت 😃
ف شوية لخبطة حالياً ف الهاردوير ف السوق المصري
سواء ف الجديد أو الإستيراد .. تعالوا ندردش شوية و نقولك المفيد
و حال السوق حالياً ...
---
نتكلم سريعاً عن الإستيراد .. سعره غلي بلا مبرر ، ليه ليه ليه !
كدا بيدمر فرصته قدام الجديد ، خصوصاً لو كمل بالشكل دا
و الناس تحوش الزيادة و تجيب جديد بـ كارت مستعمل لو تقدر
او حتى بـ كارت مدمج و يستحمل الأداء ضعيف شويتين
و دا هيكون أفضل بكتير ، و فرقه مش كبير أوي مادياً
المستوردين الحلوين ، صحصحوا معانا و إظبطوا الدنيا
لإنكم كدا بتكسبوا ع المدى القريب ، و بيهرب منكم السوق قدام
----
سوق الجديد بأه .. لقينا الجيل العاشر من إنتل إتوفر من فترة
و ع عكس توقعاتي الشخصية ، و بعد تجربة لـ أي ثري و فايف
إنتل رجعت بحاجة محترمة جداً ، خصوصاً مع تعدد المسارات
إللي بقت 8 فـ الـ أي ثري ، و أعلى من بعض إصدارات الفايف القديمة
و دي نقلة كبيرة ع عكس عادة إنتل ف السنين الأخيرة
كمان إستهلاك كهرباء ف اللذيذ ، حرارة معقولة جداً
بس برضو لسة فيه تاني .. التقيل مجاش
الجيل دا أنا حاسه مقدمة و تصبيرة كدا للناس ، و إنتل هتولعها قدام
---
دلوقتي ما بين 3000-3400 تقدر تشتري معالج أي فايف - جيل عاشر
إللي هو تقريباً نفس سعر رايزن 5 - 3600 .. و هنا المأزق الخطير
و إللي بتلاقي فيه تقريباً أداء موازي جداً كـ جيمنج بين الإتنين
و فرق مش قليل كـ ملتي تاسك و رندر ، لصالح الرايزن
فـ إستخدامك هنا هو الحكم الأكبر + تفضيلك الشخصي
أياً كان الإختيار مش هتخسر خالص ...
-----
كمان عندك أي ثري جيل عاشر .. حصان كسبان جداً للفئة المنخفضة
و أداء فوق الممتاز ، لكننا مستنيين سعره يتظبط شوية
و هيغزو السوق و مش هيلاحقوا ع إنتاجه ، لكن يزال السعر مشكلته
و إن كان معقول مقابل قوته ، لكنه غالي ع الفئة دي تحديداً
----
رايزن من فترة نزلت معالجات ف رأيي الشخصي كانت بلا هدف
فئة ال XT ، عارف إنت إللي هو جئت لا أعلم من أين أتيت
لا وجود قوي أو إنتشار ف السوق ، لا إهتمام و تغطية محترمة
بالظبط زي المعالج 1600AF ، إللي هبط علينا من الفضاء
و حتى مش مكتوب ع علبته و لا موجود ع الموقع إسمه !
و إختفى برضو من سكات !!!
علامات إستفهام بصراحة ع AMD مؤخراً
وارد جداً تصفية ماتريال ، محاولة لضرب شئ معين ف السوق
تجربة فعلية ع المستخدمين لشئ جديد ، الله أعلم
----
المهم إن ف تسريبات ظهرت عن جيل جديد من معالجات AMD
و كانت لمعالج / RYZEN 7 - 5800X
هل معنى كدا إن رقم 4 دا هيكون لـ اللابات فقط
و الديسكتوب جيله الجاي هيكمل من بعده !
لإننا مشفناش معالجات 4*** لـ الديسكتوب حتى الأن !
المهم المعالج دا كان بينافس الـ i9-10900k ف بنشمارك
و النتايج بينهم مكنتش كافية لتقييم كامل أو للحسم
بس كان ف تفوق ف بعض النقط لصالح الرايزن
و لسة الأيام جاية و هنشوف باقي إصدارات الجيل دا
و نتايج إختبارات كاملة ، و تظل تجربة المستخدم أخيراً هي الحكم
هل الجيل دا نازل عشان ينافس الجيل العاشر من إنتل !
و يقضي ع معنوياته بإفتراء زي ما حصل مع الجيل التامن و التاسع
و لا الجيل العاشر من إنتل هيكون حائط صد لـ طوفان AMD !
منتظرين نشوفهم هيقدموا إيه ...
------
البوردات حالها غريب و تسعيرها أغرب ، كل الجديد بلا إستثناء
لازم فوق الـ 2500 جنيه عشان أجيب بوردة محترمة و قوية لقدام
أقل من كدا هاخد حاجة مش إحترافية أوي و بتخدم الفئات المنخفضة
فـ ياريت سعر البورد للجيل العاشر و لـ الرايزن الجديد تتظبط شوية
----
كروت الشاشة ماشية زي السلحفاة
طبعاً زي ما عمو شهاب نبهكم من خطورة المخدرات
إللي بتخليك تبيع كارتك القديم و تجري ع الجديد
حتى لو مكنتش محتاج قوته ، بس هوس التحديث و خلاص
فوجئنا بـ ماتريال خربان من أغلب الشركات
ماعدا إسوس حبيبة قلبي ♥
و كروت بتعمل كراشات و عدم إستقرار تحت ضغط
و مشاكل تانية ، فـ واضح إن كروت ال 3070 - 3080
و الجيل دا بشكل عام ، محتاج شوية كدا عشان يتظبط
و أعتقد معانا لـ شهر 12 ع ما يتوفر كـ نسخة نهائية ف مصر
ممكن قبل كدا ، ممكن ينزل بـ كميات قليلة مبدئياً ، الله أعلم
أدينا بنتفرج ، مين قال هنشتري 😃
-----
دي كانت جولة سريعة رشيقة لذيذة ف حال السوق المصري
لو الكلام عجبك ، لايك و شير
لو معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم