إستنيت الدوشة تخلص عشان أتكلم ف هدوء 😃
من كم يوم ف بوست ملخص أخبار السوق
ذكرنا إن ف معالج هينزل من AMD و دا الجيل الجديد
و هيكون بـ رقم 5 مش 4
و قلنا هنشوف هينافس إنتل بجيلها الجديد و لا لأ
و كمان كنا منتظرين كروت الشاشة الجديدة من AMD
---
المؤتمر إتعمل و بعتولي بس كنت نايم وقتها 😅
الملخص ف السريع ، إن بنشماركات الجيل الجديد حتى الأن مبشرة
إستهلاك كهربا معقول ، معالجات للمستخدم العادي بالأداء دا
تعتبر نقلة كبيرة بشكل عام ، و مقارنةً بالجيل السابق فرقها مش قليل
لكن تسعير سئ ، نظراً للمنافسة و ظروف الإقتصاد العالمي
لكن ف عالم موازي ، التسعير إجمالاً عادل نظراً للقوة
----
تعالوا نلقي نظرة ع أهم الموديلات إللي تم الإعلان عنها /
AMD RYZEN 9 - 5900X
12 كور - 24 ثريدز - 70 ميجا كاش - تردد 3.7 جيجا بـ يوصل لـ 4.8
إستهلاك كهرباء 105 وات - تكنولوجي تصنيع 7 نانو المُعدلة
السعر / 550 دولار تقريباً .. يعني بدون إضافات = 8.800 جنيه مصري
أما لو ضيفنا زيادة 18% بأقل تقدير = 10.500 جنيه تقريباً
---
AMD RYZEN 7 - 5800X
8 كور - 16 ثريدز - 36 ميجا كاش - تردد 3.8 جيجا بـ يوصل لـ 4.7
إستهلاك كهرباء 105 وات - تكنولوجي تصنيع 7 نانو المُعدلة
السعر / 450 دولار تقريباً .. بدون إضافات = 7.200 جنيه مصري
أما لو ضيفنا زيادة 18% بأقل تقدير = 8.500 جنيه تقريباً
------
AMD RYZEN 5 - 5600X
6 كور - 12 ثريدز - 35 ميجا كاش - تردد 3.7 جيجا بـ يوصل لـ 4.6
إستهلاك كهرباء 65 وات - تكنولوجي تصنيع 7 نانو المُعدلة
السعر / 300 دولار تقريباً .. بدون إضافات = 4.800 جنيه مصري
أما لو ضيفنا زيادة 18% بأقل تقدير = 5.700 جنيه تقريباً
---
فرق ألفين جنيه بين R7-5800X - R9-5900X
مقابل زيادة كـ أرقام حوالي 30% ، منطقي نوعاً ما
و دا هيحصر ال R9 لـ فئات الفلاج شيب إللي عاوزين أقصى إستفادة
و هو أصلاً موجه ليهم ، فـ أظن فرق السعر معقول
مع تحفظي شويتين ع 5600X و شايف إنه مبيقدمش أرقام كبيرة
و سعره غالي رغم كدا ! منتظر مقارنات مع R7-3700X مثلاً
و دا هيخلينا نشوف قوته الحقيقية
كل الكلام دا قياساً ع السعر العالمي و ع توقعي للسعر داخل مصر
وارد جداً يحصل تغيير ف الأسعار ، و نتمنى إنه يكون للأقل أكيد
---
بالنسبة لكروت الشاشة فـ تم الاعلان عن حاجة عجيبة كدا
إسمها / RX 6900 XT - أو BIG NAVI
هييجي بـ 16 جيجا ميموري - من نوع GDDR6
و ميموري باص 256 بت - و باندويدث 512 جيجا
تكنولوجي تصنيع 7 نانو - إستهلاك كهرباء 300 وات
تحسين لتقنية تتبع الأشعة ، PCIE 4
سعره المتوقع / 500 دولار .. بدون إضافات = 8000 جنيه
مع إضافة 18% = حوالي / 9500 جنيه
يعني نفس سعر الـ / 3070 RTX تقريباً
---
الكارت دا من الأخر و بنائاً ع الأرقام و البنشماركات البسيطة
نازل يضرب الـ 3070 ، و يشتم و يجري الـ 3080 🤣
و لسة المقارنات و اختبارات الأداء جاية أكتر و هنشوف كل شئ
-----
المؤتمر كان مليان شروحات و حاجات لذيذة نظرياً
بس لسة عملياً و ع أرض الواقع مفيش شئ ظهر للمستخدم النهائي
و كالعادة منتظرين توافر القطع ف الأسواق بسعر مناسب
و منتظرين كمان رد إنتل ف مجال المعالجات ، و إنفيديا ف الكروت
و إحنا هنشجع اللعبة الحلوة ف النهاية
------
لو الكلام عجبك ، لايك و شير
لو معجبكش ، إعتبره من وحي الخيال و لا يمت لـ الواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم