رسايل كتيرة إتبعتتلنا بتسخننا عملياً 🤣
لكن علمياً هي بتقولنا محتاجين رد منكم لإننا واثقين فيكم 😉
عاوزين نفهم إيه الحكاية بتاعة التجميعات الرخيصة دي
و ليه أشتري إستيراد قديم أصلاً ، طالما ف جديد بنفس السعر ؟
و الفيديوهات الكتير إللي بتهاجم الإستيراد إيه حكايتها و مدى صحتها ؟
---
و طبعاً لإننا عندنا مجموعة من أحسن الناس ف مجتمع التكنولوجي
سواء إللي إشتروا مننا ، أو إللي متابعين المحتوى فقط
كله عندي واحد بنفس القدر ♥ ، و بحبكم كلكم 😂
هنرد ع كل شئ و نشرحلكم الحقيقة الضائعة كالعادة
إنتوا عارفين إني دايماً بجيب التايهة و بحر مفهومية ملوش أخر 🧐
بعيداً عن المقدمة اللعينة دي ، يلا نبدأ 😃
----
السؤال التاني بخصوص مهاجمة الإستيراد ، دا متجاوب قبل كدا
إحنا عاملين عليه موضوعين هتلاقيهم ف البوست المثبت
موضوع بيشرح مفهوم الأجهزة الإستيراد ، عيوبها و مميزاتها
و إمتى إشتريها و إمتى متكونش مناسبة
و موضوع بيرد ع فيديو ملوش أساس من الصحة من قناة عددها كبير
و بيحلل كل نقاط هجومهم ع الإستيراد بدون أي دليل أو سبب مقنع
تقدر تشوفهم ف البوست المثبت ، و هحطلك لينكاتهم ف التعليقات
----
السؤال الأول هو دا موضوعنا /
الرد ببساطة ف كلمتين ، قلة الخبرة 🙂
و أنا و الله بتفاجئ كل مرة من قلة الخبرة للناس دي
و بحس إن الموضوع أرزاق بحت و كلها بتاكل عيش
مش مهم مين يستحق إيه .. فوضى 🙁
ما علينا .. زي ما الناس إللي بتهاجم الإستيراد قالت ف فيديو
إنهم مجربوش إلا كيستين إستيراد طول عمرهم
و أخرهم كان ف 2014 تقريباً ، فـ دا يتحط تحته ألف خط
و يعكسلك هو شايف الدنيا إزاي .. تعالى هوضحلك أكتر
----
المفيد ، لما ترشح لحد شئ ، لازم أولاً يكون متوفر
مش مجرد أحلام و تمنيات بأفضل تجميعة و أرخص سعر
كلنا و الله عاوزين كدا .. بس الواقع بيقول إيه ؟
لما ترشح لحد معالج زي i3-9100f مستعمل بـ بوردته
بـ باقي قطع التجميعة ، أو ما يوازيهم من الموديلات
إنت كدا زي الفل ، و مدمر خرافة الإستيراد اللعينة 🥵
أهـ جيبت جهاز حديث بيقدم سعر مقابل أداء
إختيار ذكي مفيش كلام ، و كل الحاجات الحلوة دي
السؤال هنا ، فين حضرتك توافر القطع دي !!!
و هل هي أصلاً بند مطروح ف السوق أقدر أشتريه أي وقت ؟
و لا بتبقى صدفة إن يوزر و لا إتنين و لا حتى عشرة
بيحدثوا و عارضين حاجتهم المستعملة
و الكلام دا مش إختيار متوفر بإستمرار و لا أقدر أشتريه
و مفيش منه إلا جديد بس ف الطبيعي !!!
----
بمنتهى السطحية و قلة الخبرة إللي كل مرة بتفاجئني
الناس دي بتستغل الأعداد الكبيرة عندها زي القطيع
و تقعد تتخيل حاجات نظرياً صح و عملياً غلط ، و تطرحها كـ إكتشاف !
و بالمناسبة إبقى قولي كم واحد نزل إشترى التجميعة دي
ياريت يقولوا لينا لقوها فين لإنها مطلوبة جداً 😃
-----
و هنا تكمن الخدعة ، تعالى بس أنا هستنزفك و هوديك للجديد برضو
و هعملك تنويم مغناطيسي ـ تعالى يا جناوي يا ولدي 🤣
------
كان عندنا من فترة تجميعات أجيال حديثة زي I3-8100 مثلاً
و معاها كارت شاشة خارجي ، و كانت ب 6000 جنيه تقريباً
و كانت التجميعة كلها جديدة مش مستعملة ، ماعدا الكارت و الهارد
و مع ذلك محققتش نجاح كبير و الناس كانت بتطلب إستيراد بنفس السعر
و بتختار كارت يكون أقوى شوية أو معالج أي فايف من جيل أقدم !
إقتناع و راحة عميل ، متطلبات سوق ، عوامل كتير أوي !
إنت عليك تشرح الصورة كاملة و توجه للصح ، الصح و بس
مش رأيك ، خد بالك ، رأيك شئ ، و الصح شئ تاني .. خلي عندك ضمير
دي الأمانة إللي ربنا هيحاسبك عليها .. بعيداً عن اللهث ورا المكسب
----
أنا أوقات كتير بيجيني عملاء بميزانيات عالية نوعاً ما
و دماغهم مقتنعة أوي بـ الإستيراد ، فـ بفضل أتخانق معاهم
عشان ميشتروش إستيراد ، و أفهمهم إن الجديد أفضل
كذلك بيجيلي حد بميزانية متوسطة فـ بشرحله الفرق بين جديد و إستيراد
و أديله حرية الإختيار بعد توضيح مزايا و عيوب الإتنين
-----
لكل مقام مقال ، الإختيار بتاعك يا فندم بخصوص التجميعة الجديدة
ممتاز ، لكنه مش إختيار أصلاً زي ما وضحنا فوق
مينفعش نعمم قاعدة ع شئ إستثنائي ، غير موجود ف العادي
لو المكونات دي متوفرة بشكل كبير و مغطية إحتياجات السوق
بحيث 3 ع الأقل من كل 5 عاوزين يشتروا ، يقدروا يلاقوها
وقتها أتفق معك عزيزي عصام 😃
هقولك إوعى تشتري إستيراد ف الفئة دي طبعاً
و الجيل الحديث له مزايا كتيرة تغنيك عن المستعمل
لكن طول ما الكلام دا مش حاصل ، يبقى إنت مطرحتش بديل
و لا جيبت التايهة ، كل ما هنالك إنك بتتخيل تجميعة حلوة
لقيت يوزر عارضها ع أولكس و إنت قاعد بتشرب الشاي
فـ عملته موضوع و حلقة و هوبا هيصا نزود الهجوم ع الإستيراد
و الناس مش فاهمة للأسف ، إن كل كلامك ملوش أي أساس 🙂
-----
تعالى بأه أنا أوريك التجميعات بتتعمل إزاي 🙂
دا أقل جهاز جيل حديث بـ كارت خارجي و أداء جيد ف رأينا الخاص
هنجيب كل دا جديد بضمان محلي .. مش مستعمل /
i3-9100f / 1450
أو Ryzen 3 - 3100
h310 / 1250
أو A320
ddr4-8-2666 / 575
case+psu 500w / 1400
إجمالي تقريباً / 4600 - 4750 جنيه
دول هنجيبهم مستعملين /
+ هارد 500 جيجا / 250
+ كارت أر إكس 570-4 جيجا / 1800
يعني الجهاز بالكامل بأقل المواصفات المعقولة
هيبقى بـ / 6.600 - 6.800 جنيه ( تقريباً )
مع إحتمال تفاوت بسيط ف الأسعار بإختلاف المحلات
و عدم توافر كل القطع ف العموم ، لكنه ف أغلب الأماكن موجود
-----
نصيحة و رأي شهابي لأي حد لو إنت ميزانيتك 6500-7000
و عاوز جهاز للجيمنج و الإستخدامات المكتبية أو الدراسة
متجيبش إستيراد ، و هات التجميعة المكتوبة دي
-----
أتمنى خير بإن الموضوع يكون طلع من القناة دي بـ قلة خبرة
دا مفيهوش مشاكل كلنا بنتعلم ، العذر بالجهل أساس
لإنه لو طالع بتوجيه و تضليل ، و أنا فعلاً متمناش دا
هيكون حرام كبير جداً إنت مش أده
----
لو الكلام عجبك ، لايك و شير
لو معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم